អ្នកកើតម៉ោងមាសទាំងបីនេះ អាចមានសម្ពាយបុណ្យក្លាយជាអ្នកមាននៅថ្ងៃមុខ

2018-06-23 01:37:08
ចំនួនមតិ 0 | ចំនួនចែករំលែក 0

ម៉ោង ថ្ងៃ ខែ និងឆ្នាំកំណើតគឺជាធាតុទាំង៤ដែលអាចកំណត់និងមើលដឹងពីបុគ្គលិកលក្ខណៈរបស់បុគ្គលម្នាក់ៗបានយ៉ាងច្បាស់។ យោងតាមហោរាទស្សន៍ទាយដោយគន់គូរលើម៉ោងកើត បានចែកចេញជាម៉ោងមាស៣ធំៗដូចខាងក្រោម។ បានន័យថា អ្នកដែលកើតក្នុងចន្លោះម៉ោងទាំងនេះអាចនឹងសំណាងនៅថ្ងៃក្រោយជាមិនខាន។

ម៉ោងមាសទីមួយ៖ ពីម៉ោង២៣ ដល់ម៉ោង១រំលងអាធ្រាត្រ

ចន្លោះម៉ោងនេះគឺជាម៉ោង ទឹក! ទឹកនៅពេលយប់តែងតែថ្លាស្អាត និងមានពន្លឺព្រិចៗ។ ការទស្សន៍ទាយផ្នែកលេខវិទ្យាបានរកអះអាងថា អ្នកដែលកើតម៉ោងចន្លោះនេះតែងមានអារម្មណ៍ស្ងប់ស្ងាត់ល្អ ជាមនុស្សចូលចិត្តភាពសាមញ្ញ និងតែងតែមានការគិតល្អិតល្អន់ចំពោះគ្រប់កិច្ចការងារ។ ពួកគេមិនត្រឹមតែមានទេពកោសល្យពិសេស ឆ្លាតវៃទេ តែក៏ជាមនុស្សចេះដាក់ខ្លួននិងចេះគិតពីអ្នកដទៃ។

មនុស្សបែបនេះចេះពេញចិត្ត និងសរសើរនូវអ្វីដែលខ្លួនមាន មិនថាពួកគេកើតមកជាអ្នកមានឬក្រនោះទេ។ ពួកគេតែងចេះថ្លឹងថ្លែងបានល្អ ចេះការពារគោលជំហររបស់ខ្លួន និងចេះជួយអ្នកដែលទន់ខ្សោយជាងខ្លួន។

ពេលឈានដល់វ័យជំទង់ មនុស្សប្រភេទនេះមានសមត្ថភាពចេះរកប្រាក់ ទុកដាក់ទ្រព្យសម្បត្តិបានយ៉ាងល្អប្រសើរ និងអាចធ្វើឱ្យកើនបានច្រើនសម្រាប់ខ្លួននិងគ្រួសារបានទៀតផង។ ជាពិសេស អ្នកដែលកើតឆ្នាំឆ្លូវ រោង និងកុរ អាចមានឱកាសច្រើនក្នុងការទទួលបានសំណាងទាំងក្នុងការងារ ជីវិតគូ និងលុយកាក់។

ពេលចូលដល់វ័យចាស់ ពួកគេមិនបាច់ភ័យព្រួយរឿងលុយកាក់ឡើយ ព្រោះទ្រព្យសម្បត្តិដែលរកបានពេលនៅវ័យក្មេងអាចចាយសម្រាប់ជីវិតចុងក្រោយនេះយ៉ាងសប្បាយរីករាយ។

ម៉ោងមាសទី២៖ ពីម៉ោង៧ព្រឹកដល់៩ព្រឹក

នេះជាម៉ោង នាគ។ វាជាពេលវេលាដ៏ស្រស់ស្អាតបំផុត និងពោរពេញដោយភាពក្លៀវក្លាជាងគេក្នុងមួយថ្ងៃ។ ម៉ោង៧ព្រឹកដល់៩ព្រឹកនេះ គឺជាពេលវេលាដែលសត្វទាំងឡាយពោរពេញដោយកម្លាំងថាមពល ដើម្បីត្រៀមខ្លួនចាប់ផ្ដើមថ្ងៃថ្មី។ ដូចគ្នាដែរ អ្នកដែលកើតម៉ោងនេះតែងជាមនុស្សដែលប្រកបដោយសុទិដ្ឋិ មានក្ដីស្រលាញ់ និងភាពឆ្លាតវៃពីធម្មជាតិដែលទទួលបានការកោតសរសើរ។

និយាយពីចិត្តគំនិតវិញ មនុស្សនេះមានភាពរហ័សរហួនផ្នែកខួរក្បាល និយាយ១អាចយល់ដល់១០ ដូច្នេះពួកគេអាចចូលទៅក្នុងសង្គមបានយ៉ាងងាយ និងមានទំនាក់ទំនងល្អ អ្នកណាក៏ស្រលាញ់ចូលចិត្ត។

អ្នកដែលកើតម៉ោងចន្លោះនេះតែងអាចមានជីវិតហូរហៀរដោយទ្រព្យសម្បត្តិ មិនចាំបាច់ប្រឹងធ្វើការក៏អាចបានប្រាក់ទិញបាយហូបដែរ។ បើអ្នកជំនួញ ពួកគេនឹងរកប្រាក់បានយ៉ាងងាយ ហើយមានបណ្ដាញដែលអាចពឹងពាក់បានច្រើនទៀតផង។

អ្នកកើតម៉ោងនេះនឹងឈានដល់វ័យសម្បូរសប្បាយនៅអាយុ៣៥ឆ្នាំ។ បើជាមនុស្សប្រុស អាចមានភ័ព្វសំណាងរកប្រាក់បានហូរហៀរដោយសមត្ថភាពខ្លួនឯង ហើយបើជាមនុស្សស្រីវិញអាចមានសំណាងបានប្ដីជាអ្នកមានស្ដុកស្ដម្ភ។

ម៉ោងមាសទី៣៖ ពីម៉ោង៣រសៀល ដល់ម៉ោង៥ល្ងាច

ពេលវេលានេះត្រូវបានចាត់ទុកថាជាពេលវេលាចន្លោះរវាងថ្ងៃនិងយប់ ដែលជាពេលវេលាព្រះអាទិត្យលិចចោលរស្មីដ៏ស្រស់ស្អាតបំផុត។ អ្នកដែលកើតម៉ោងនេះនឹងទទួលបានសំណាងល្អ និងពរជ័យតាំងពីកំណើតតែម្ដង។ ភាគច្រើននៃពួកគេគឺនឹងមានទ្រព្យសម្បត្តិស្ដុកស្ដម្ភ និងកិត្តិយស ថ្លៃថ្នូរ។

បើនិយាយពីបញ្ញាឆ្លាតវៃ ការគិតបានរហ័ស កម្រមានអ្នកណាអាចមកប្រៀបធៀបជាមួយអ្នកកើតម៉ោងចន្លោះនេះណាស់។ ពួកគេមានទេពកោសល្យខ្ពស់ក្នុងការកំណត់គោលដៅ និងឈានដល់ការសម្រេចវាឱ្យបាន។

ចូលដល់អាយុ៣៥ឆ្នាំ មនុស្សប្រភេទនេះនឹងអាចមានទ្រព្យសម្បត្តិដែលខ្លួនប្រាថ្នាជាមិនខាន៕

ចុចអាន៖

ប្រភព៖ bestie ប្រែសម្រួល៖ សរ សុគន្ធី