ពីកម្មកររោងចក្រ ក្លាយជាមហាសេដ្ឋីស្រីមានបំផុតក្នុងលោក

2017-08-07 08:44:09
ចំនួនមតិ 0 | ចំនួនចែករំលែក 0

អ្នកស្រី Zhou Qunfei ត្រូវបានគេចាត់ទុកជាមហាសេដ្ឋីស្រីកើតចេញពីកម្លាំងញើសឈាមខ្លួនឯងសុទ្ធសាធដែលមានទ្រព្យសម្បត្តិច្រើនជាងគេបំផុតក្នុងលោកក្នុងឆ្នាំ ២០១៧។ អ្នកស្រីជាស្ថាបនិកក្រុមហ៊ុន Lens Technology ។

ក្រុមហ៊ុនរបស់អ្នកស្រី ផ្គត់ផ្គង់កញ្ចក់ទូរសព្ទឲ្យក្រុមហ៊ុន Apple និងមានក្រុមហ៊ុនបច្ចេកវិទ្យាតូចៗមួយចំនួនទៀត។ តាមការចាត់ថ្នាក់របស់គេហទំព័រ Forbe ឆ្នាំ ២០១៧ អ្នកស្រីមានទ្រព្យសម្បត្តិ ៧,៤ពាន់លានដុល្លារអាមេរិក។ តើអ្នកស្រីមានប្រវត្តិការងារដូចម្ដេច មុនក្លាយជាមហាសេដ្ឋីលំដាប់ពិភពលោកបែបនេះ?

អ្នកស្រីមានប្រាក់ច្រើនបែបនេះ គឺមិនមែនជាការសល់កេរ្តិ៍មរតកពីឪពុកម្ដាយក្រុមគ្រួសារ ឬត្រូវកំណប់អ្វីទេ តែជាការខិតខំប្រឹងប្រែងពីបាតដៃទទេ។ នៅអាយុ ១៦ឆ្នាំ អ្នកស្រី Zhou បានបោះបង់ការសិក្សារួចទៅធ្វើជាកម្មករក្នុងរោងចក្រមួយក្នុងទីក្រុង Shenzhen ផ្នែកផលិតកញ្ចក់ (Lenses) នាឡិកា។

“ខ្ញុំធ្វើការចាប់ពីម៉ោង ៨ព្រឹក ដល់ម៉ោង ១២រសៀល ហើយជួនកាលដល់ម៉ោង ២ជិតភ្លឺក៏មាន។ កាលនោះធ្វើការមិនមានវេន និងមនុស្ស ២០ទៅ ៣០នាក់ប៉ុណ្ណោះ ហើយយើងទាំងអស់គ្នាគិតតែពីកែច្នៃកញ្ចក់។ ខ្ញុំមិនពេញចិត្តការងារនោះឡើយ"។ អ្នកស្រីរៀបរាប់ប្រាប់កាសែតអាមេរិក New York Times កាលឆ្នាំ ២០១៥។

មិនសប្បាយចិត្តនឹងបរិយាកាសការងារ អ្នកស្រីក៏សម្រេចចិត្តបោះបង់ រួចផ្ញើសំបុត្រមួយច្បាប់ទៅកាន់ម្ចាស់រោងចក្រ ពេលនោះគេបានដំឡើងតំណែងឲ្យគាត់ ជំនួសនឹងការចាកចេញ។ នៅពេលរោងចក្រនេះដួល អ្នកស្រី Zhou សន្សំប្រាក់បានជាង ៣ពាន់ដុល្លារ រួចទៅបង្កើតក្រុមហ៊ុនផ្ទាល់ខ្លួននៅផ្ទះល្វែងមួយមាន ៣បន្ទប់។ ក្រុមហ៊ុនអ្នកស្រីភាគច្រើនផលិតកញ្ចក់នាឡិកាមានគុណភាពខ្ពស់រហូតទទួលបានជោគជ័យ និងមានអ្នកកុម្ម៉ង់ឲ្យផលិតកញ្ចក់ទូរសព្ទទៀតផង។

ការចាប់យកអាជីពមួយនេះ គឺជាផ្លូវជោគជ័យដ៏ធំរបស់អ្នកស្រី។ បច្ចុប្បន្ន អ្នកស្រីជាមហាសេដ្ឋីស្រីរកស៊ីដោយកម្លាំងញើសឈាមឈានមុខគេក្នុងចំណោមទាំង ៥៦នាក់ប្រចាំឆ្នាំ ២០១៧ ពីជុំវិញពិភពលោក៕