បញ្ហា ៧យ៉ាង នឹងកើតឡើង បើអ្នកចូលគេងទាំងមិនបានលាងម្សៅក្រែមជ្រះល្អ

2017-06-06 04:16:40
ចំនួនមតិ 0 | ចំនួនចែករំលែក 0

ជារឿងមិនអាចប្រកែកបានឡើយដែលថាគ្រឿងសម្អាងគឺជារបស់ដែលមនុស្សស្រីស្ទើរតែគ្រប់គ្នាតែងមាននិងប្រើប្រាស់រៀងរាល់ថ្ងៃ។ ក៏ប៉ុន្តែក្រៅពីជួយឲ្យនារីៗយើងកាន់តែស្អាត និងកាន់តែជឿជាក់ហើយ វាក៏អាចបង្កឲ្យមានបញ្ហាបានដែរប្រសិនបើយើងមិនបានសម្អាតស្បែកមុខឲ្យបានស្អាតល្អ ជាពិសេសការចូលគេងដោយមិនបានសម្អាតម្សៅក្រែមចេញ។ ថ្ងៃនេះយើងនឹងនាំប្រិយមិត្តមកស្វែងយល់ទាំងអស់គ្នាថានឹងមានអ្វីខ្លះកើតឡើងនៅពេលដែលយើងចូលគេងដោយមិនបានលុបលាងគ្រឿងសម្អាង៖

១. ស្បែកស្ងួត

ការដែលមិនបានលាងគ្រឿងសម្អាតមុនចូលគេងនឹងធ្វើឲ្យស្បែកគ្របដណ្ដប់ដោយសារធាតុគីមី និងជាតិខ្លាញ់ ដែលសុទ្ធតែជាមូលហេតុដែលធ្វើឲ្យស្បែកមិនអាចរក្សាសំណើមបានតាមធម្មជាតិ ហើយទីបំផុតនឹងធ្វើឲ្យស្បែកស្ងួតគ្រើម។

២. ស្បែកជាំ

ប្រិយមិត្តដឹងឬអត់ថាមូលហេតុមួយដែលធ្វើឲ្យស្បែកមុខរបស់យើងជាំខ្មៅនោះគឺដោយសារការកើនឡើងនៃកោសិកាស្បែកងាប់នៅលើផ្ទៃមុខរបស់យើងនេះឯង ដែលប្រសិនបើយើងមិនបានសម្អាតស្បែកមុខឲ្យបានស្អាតល្អ វានឹងធ្វើឲ្យកោសិកាស្បែកងាប់ទាំងនោះនៅផ្ដុំគ្នាកាន់តែច្រើន។ ដូច្នេះត្រូវលាងសម្អាតម្សៅក្រែមឲ្យបានស្អាតគ្រប់ពេលមុនចូលគេង ហើយកុំភ្លេចប្រើផលិតផល Scrub ខ្លះផង។

៣. កើតមុន

បណ្ដាសារធាតុកខ្វក់ៗមិនថាធូលី ញើស ឬគ្រឿងសម្អាងដែលជាប់នៅលើមុខរបស់អ្នកពេញមួយថ្ងៃនឹងក្លាយជារបស់ដែលរាំងស្ទះស្បែកមុខរបស់អ្នក និងធ្វើឲ្យស្បែកអ្នកកើតមុន។

៤. ស្បែកចាស់ជាងវ័យ

ការដែលអ្នកមិនបានសម្អាតស្បែកមុខឲ្យបានម៉ត់ចត់ នឹងធ្វើឲ្យសារធាតុកខ្វក់កើនឡើងកាន់តែច្រើនលើស្បែក ហើយនឹងធ្វើឲ្យរន្ធញើសស្ទះ រួមទាំងធ្វើឲ្យកើតមានពពួករ៉ាឌីកាល់សេរីដែលនឹងបំផ្លាញខូឡាជែន (Collagen) នៅខាងក្រោមស្បែក ដូច្នេះមិនមានអ្វីប្លែកឡើយដែលអ្នកនឹងមើលទៅចាស់ជាងវ័យ។

៥. កើតពពែភ្នែក និងឆ្លងមេរោគ

ប្រសិនបើនារីៗមិនបានលាង Make Up មុនចូលគេងទេ បញ្ហាមួយដែលអាចកើតឡើងបានគឺ រោគពពែភ្នែក។ ក្រៅពីនេះប្រសិនបើអ្នកមានរបួសអ្វីមួយនៅលើស្បែកមុខហើយចូលគេងទាំងមិនបានសម្អាតមុខ នោះនឹងធ្វើឲ្យកើតមានការឆ្លងមេរោគ។

៦. ស្បែករលាក

ការដែលមិនបានលាងគ្រឿងសម្អាងចេញមុនចូលគេងនឹងធ្វើឲ្យសារធាតុកខ្វក់ដក់ជាប់នៅលើស្បែក និងធ្វើឲ្យស្បែកមិនរឹងមាំ ដែលនោះអាចនឹងធ្វើឲ្យកើតមានការរលាកបាន ដូចជា មានស្នាមកន្ទួលក្រហម មានអាការៈរមាស់ ក្រមរ ។ល។

៧. បបូរមាត់ក្រៀម និងរបក

ស្បែកនៅបរិវេណបបូរមាត់របស់យើងមានសភាពស្ដើងជាងស្បែកនៅផ្នែកផ្សេងៗទៀតនៃរាងកាយ ដូច្នេះហើយការដែលមិនបានលាងក្រែមចេញមុនពេលគេងអាចនឹងធ្វើឲ្យកើតមានការរលាក ឬរបកមាត់បាននៅពេលព្រឹកបន្ទាប់ ដែលធ្វើឲ្យការតុបតែងមុខរបស់អ្នកមិនរលូនដូចធម្មតា៕