ញ៉ាំម្នាស់ក្រោយបាយ ជួយរំលាយអាហារបានល្អ

2023-12-30 01:01:00
ចំនួនមតិ 0 | ចំនួនចែករំលែក 0

ម្នាស់ក្រៅពីសម្បូរដោយវីតាមីន C ល្អសម្រាប់ប្រព័ន្ធភាពស៊ាំ ក៏មានផ្ទុកសារធាតុសំខាន់ៗផ្សេងទៀតពិសេសជាតិសរសៃដែលល្អសម្រាប់ប្រព័ន្ធរំលាយអាហារ និងសុខភាពពោះវៀន។ ម្នាស់មានប្រយោជន៍ចំពោះការរំលាយអាហារក៏ដោយសារមានវត្តមានសារធាតុជាក់លាក់ អង់ស៊ីម និងជាតិសរសៃ។

ម្នាស់និងការរំលាយអាហារ៖ បើសិនជាយើងញ៉ាំអាហារមានសាច់ច្រើន វាអាចត្រូវការពេលយូរក្នុងការរំលាយ។ ការញ៉ាំម្នាស់ក្រោយពេលញ៉ាំបាយ អាចជួយឲ្យមានការរំលាយអាហារបានល្អ នេះក៏ដោយសារម្នាស់ជាប្រភពនៃ bromelain ដែលជាអង់ស៊ីមជួយបំបែកប្រូតេអ៊ីន។ ដោយសារតែមានអង់ស៊ីមប្រភេទនេះហើយបានជាម្នាស់ត្រូវគេប្រើសម្រាប់ជួយធ្វើឲ្យសាច់ផុយ។ Bromelain ជួយបំបែកប្រូតេអ៊ី និងធ្វើឲ្យសាច់ដែលយើងញ៉ាំចូលទៅមានសភាពទន់ ធ្វើឲ្យកាន់តែងាយរំលាយ និងឲ្យរាងកាយស្រូបយកសារជាតិចិញ្ចឹមបានល្អ។

ម្នាស់ជួយឲ្យបត់ជើងស្រួល៖ ម្នាស់ជាប្រភពនៃជាតិសរសៃ ពិសេសសរសៃមិនរលាយ ដែលវាជួយធ្វើឲ្យយើងអាចបត់ជើងបានស្រួល និងទៀងទាត់។ ដូចគ្នាដែរ វាក៏អាចជួយបង្ការបញ្ហាទល់លាមក និងពង្រឹងសុខភាពប្រព័ន្ធរំលាយអាហារ។

គាំទ្រសុខភាពពោះវៀន៖ ដោយសារតែភាពសម្បូរបែបនៃជាតិសរសៃធ្វើឲ្យម្នាស់មានប្រយោជន៍ចំពោះសុខភាពក្រពះពោះវៀន។ ជាតិសរសៃដើរតួជាប្រ៊ីបាយអូទិក ជំរុញដល់ការលូតលាស់បាក់តេរីល្អក្នុងពោះវៀន។ តុល្យភាពបាក់តេរីក្នុងពោះវៀនជួយប្រព័ន្ធរំលាយអាហារដំណើរការបានល្អ និងជួយដល់សុខភាពទូទៅផងដែរ។

ម្នាស់ជួយប្រឆាំងអាការៈចង្អោរ៖ ម្នាស់ត្រូវគេរកឃើញថាមានប្រយោជន៍ជួយកាត់បន្ថយអាការៈចង្អោរ។ ដើម្បីកាត់បន្ថយអាការៈចង្អោរ យើងអាចញ៉ាំម្នាស់ ឬទឹកម្នាស់។ ជាតិផ្អែមធម្មជាតិ និងអង់ស៊ីម bromelain ក្នុងផ្លែម្នាស់ជួយឲ្យក្រពះដំណើរការបានល្អ។

ប្រភព៖ webmd ប្រែសម្រួល៖ សុខា