៤ វិធីកាត់បន្ថយអាការៈភ្នែកស្ងួត ភ្នែកឆាប់នឿយហត់ និងសញ្ញាគ្រោះថ្នាក់ផ្សេងៗបាន

2020-04-27 07:15:00
ចំនួនមតិ 0 | ចំនួនចែករំលែក 0

បញ្ហាស្ងួតភ្នែក គឺជារឿងដែលងាយប្រឈមសម្រាប់មនុស្សទូទៅនាពេលបច្ចុប្បន្ន។ នេះបណ្តាលមកពីប្រើភ្នែកច្រើននៅមុខកុំព្យូទ័រ មើលទូរសព្ទ ឬមកពីពាក់ Contact lenses រយៈពេលយូរម៉ោងពេក។ ភ្នែកងាយនឹងស្ងួត នឿយហត់ និងប្រែជាឈឺចាប់។ បើសិនជាបណ្តោយរយៈពេលយូរ វាធ្វើឲ្យខូចកែវភ្នែកទាំងមូលតែម្តង។ ដូច្នេះដើម្បីចៀសវាងបញ្ហាធំបែបនេះ អ្នកគួរអនុវត្តនូវវិធីមួយចំនួន សម្រាប់ការពារភ្នែកឲ្យនៅមើលឃើញច្បាស់ល្អបាន។

រូបតំណាង

**១. បន្ថែមជាតិសំណើមដល់ភ្នែក**

ការរក្សាភាពសំណើមដល់កែវភ្នែក វានឹងជួយកាត់បន្ថយការស្ងួតភ្នែកបានយ៉ាងត្រឹមត្រូវ ដោយអ្នកអាចប្រើថ្នាំបន្តក់ភ្នែក។ វិធីសាស្ត្រនេះនឹងជួយបង្កើតសារជាតិទឹកក្នុងកែវភ្នែក នៅកម្រិតដែលភ្នែកកំពុងរងការស្ងួតខ្លាំង ឲ្យមកធូរស្រាលឡើងវិញ ព្រោះវាជួយបង្កើនជាតិសំណើម និងកាត់បន្ថយការអស់កម្លាំងរបស់ភ្នែកបាន។ ក្នុងករណីដែលអ្នកតែងពាក់ Contact lenses គួរពាក់ឲ្យបានតិចជាង៨ម៉ោង និងបន្តក់ថ្នាំនៅពេលថ្ងៃឲ្យបានញឹកញាប់។

រូបតំណាង

២. សម្រាកភ្នែក

ការមើលកុំព្យូទ័រ ឬទូរសព្ទយូរម៉ោងជាហានិភ័យដល់ភ្នែកយ៉ាងធ្ងន់ធ្ងរ ដូច្នេះកុំភ្លេចឆ្លៀតរកពេលបន្តិចដើម្បីឲ្យភ្នែកបានសម្រាក។ នៅពេលអ្នកសម្លឹងកុំព្យូទ័រ ឬទូរសព្ទអស់ពេល ១ -២ ម៉ោង ដូចនេះគួរសម្រាកភ្នែកប្រហែល៥នាទីម្តង ដោយការបិទភ្នែក ឬមើលទៅទីតាំងផ្សេងឲ្យបានឆ្ងាយ ព្រោះកាលណាមើលជិតពេក ងាយនឹងឲ្យភ្នែកមានសភាពតានតឹងណាស់។ លើសពីនេះ គួរតែបិទ screen ដែលមិនចាំបាច់ចោល ឬអ្នកអាចសម្លឹងលើរុក្ខជាតិបៃតង ដែលវិធីនេះជួយឲ្យភ្នែកបានសម្រាកខ្លះដែរ។ ម្យ៉ាងទៀត គួររកពេលគេងឲ្យបានគ្រប់គ្រាន់ ដើម្បីឲ្យភ្នែកបានចៀសផុតពីការហត់នឿយ កាត់បន្ថយភ្នែកស្ងួត និងការឈឺចាប់កែវភ្នែកដោយសារតែប្រើប្រាស់យូរម៉ោងពេកផងដែរ។

រូបតំណាង

៣. បិទម៉ាសលើភ្នែក

បន្ថែមភាពទន់ អ្នកគួរបិទម៉ាសលើភ្នែក ដូចជាចិតត្រសក់ជាចំណិតស្តើងៗរួចយកមកបិទលើបរិវេណភ្នែកប្រមាណ១៥ -២០ នាទីមុនចូលគេង។ ម្យ៉ាងទៀត អ្នកអាចម៉ាស្សាថ្នមៗជារង្វង់ ដោយវិធីងាយស្រួលដូចជា បិទភ្នែកបន្ទាប់មកយកម្រាមដៃសង្តត់តិចៗលើបរិវេណភ្នែកនិងត្របកភ្នែកទៅមក ម៉ាស្សាជុំវិញទីតាំងនេះចុះក្រោមនិងឡើងលើម្តងទៀត បន្ទាប់មកយកបាតដៃទាំងពីរ ដាក់លើត្របកភ្នែកទាំង២ ធ្វើបែបនេះប្រមាណ៣នាទី នឹងជួយពង្រឹងចលនាឈាមនៅជុំវិញភ្នែកឲ្យរត់បានស្រួល និងធ្វើឲ្យភ្នែកបំបាត់ការនឿយហត់ផងដែរ។

រូបតំណាង

៤. ញ៉ាំអាហារល្អៗដើម្បីបង្កើតជីវជាតិដល់ភ្នែក

បើសិនអ្នកចង់បានកែវភ្នែកភ្លឺច្បាស់ពីខាងក្នុងមក គួរយកចិត្តទុកដាក់លើរបបអាហារ ដែលជំនួយឲ្យភ្នែកមើលឃើញច្បាស់បាន។ អាហារដែលសម្បូរវីតាមីន A ដូចជាការ៉ុត ផ្ទី ជាដើមសុទ្ធតែជួយការពារភ្នែកមិនឲ្យស្ងួត និងឈឺចាប់បាន។ ទន្ទឹមនឹងនេះ គ្រាប់អាល់ម៉ុន និងផ្លែប្លូបឺរីក៏ល្អចំពោះសុខភាពភ្នែកផងដែរ ព្រោះវាផ្ទុក Anthocyanins រួមទាំងវីតាមីនE , A និងអាមីណូអាស៊ីតផ្សេងៗទៀត ដែលទប់ស្កាត់មិនឲ្យភ្នែកស្ងួត ព្រមទាំងពង្រឹងសុខភាពភ្នែករយៈពេលយូរទៀតផង៕