រាងកាយ និងផ្លូវចិត្តអ្នកហត់នឿយជ្រុលហើយ បើលេចចេញសញ្ញាទាំង ៥នេះ
- 2019-12-02 02:35:00
- ចំនួនមតិ 0 | ចំនួនចែករំលែក 0
រាងកាយ និងផ្លូវចិត្តអ្នកហត់នឿយជ្រុលហើយ បើលេចចេញសញ្ញាទាំង ៥នេះ
ជីវិតមនុស្សយើងមានតួនាទីដែលត្រូវទទួលខុសត្រូវជាច្រើន ទាំងការងារ និងរឿងគ្រួសារ ហើយកម្រិតស្រ្តេសក៏ចេះមានការកើនឡើងពីមួយថ្ងៃទៅមួយថ្ងៃ។ អ្នកអាចជាមនុស្សដែលអាចធ្វើការងារដែលមានសម្ពាធបានគ្រប់ស្ថានការណ៍ ហើយជួនកាលដល់យប់ជ្រៅទៀតដើម្បីឲ្យបានទាន់ពេលកំណត់។ តែក៏ត្រូវទទួលស្គាល់ថា អ្នកគឺជាមនុស្សធម្មតាដែលត្រូវការការបន្ថែមថាមពល មិនមែនមនុស្សយន្តដែលមិនត្រូវការអ្វីនោះទេ។ ប្រសិនបើអ្នកកំពុងមានអាការដូចប៉ុន្មានយ៉ាងខាងក្រោមនេះ នោះបង្ហាញថាដល់ពេលវេលាហើយដែលអ្នកត្រូវសម្រាកផ្លូវចិត្តខ្លះ និងផ្ដល់រង្វាន់ឲ្យខ្លួនឯងដោយការផ្លាស់ប្ដូរទម្លាប់រស់នៅក្នុងពេលអនាគត៖
**១. នៅពេលអ្នកចាប់ផ្ដើមឈឺជាប់ៗគ្នា**
ការឈឺនៅក្នុងអំឡុងពេលដែលយើងរវល់បំផុតនោះគឺមិនមែនជារឿងចៃដន្យទេ ដោយសារបញ្ហាសំខាន់ៗក្នុងជីវិតយើងនឹងជំរុញឲ្យកើតមានភាពស្ត្រេសខ្លាំងដែលច្រើនជះឥទ្ធិពលដល់រាងកាយ។ អ្នកអាចជៀសវាងបញ្ហាបែបនេះដោយការសម្រាកផ្លូវចិត្ត និងត្រៀមខ្លួនស្វាគមន៍សប្ដាហ៍ដ៏សែនមមាញឹក មិនថាតាមរយៈការគេងឲ្យគ្រប់គ្រាន់ ឬការទទួលទានអាហារដែលមានប្រយោជន៍ចំពោះសុខភាព។
២. នៅពេលអ្នកស្រ្តេសពីរឿងអតីតកាលច្រើនជាងតាំងសតិនៅជាមួយបច្ចុប្បន្ន
ពេលខ្លះមិនថាអ្នកនឹងប្រើជីវិតរស់នៅតាមធម្មតា ប៉ុន្តែក៏ចេះតែនឹកឃើញកំហុសឆ្គងនានាក្នុងអតីតកាល ហើយក្នុងចិត្តវិលវល់ក្នុងភាពងងឹត មានអារម្មណ៍ថារងសម្ពាធ និងរងការវាយប្រហារជានិច្ច។ បើបែបនេះ អ្នកគួររកឱកាសឲ្យផ្លូវចិត្តរបស់ខ្លួនបានសម្រាកខ្លះ និងជ្រើសរើសគិតតែរឿងល្អៗបានហើយ។
៣. នៅពេលអ្នកចាប់ផ្ដើមព្រងើយកន្តើយជាមួយខ្លួនឯង
ប្រសិនបើកាលវិភាគរបស់អ្នកចាប់ផ្ដើមមានការបង្អត់អាហារដើម្បីការងារបញ្ចប់បានលឿន ឬសុខចិត្តខកណាត់ជាមួយគ្រូពេទ្យដើម្បីទុកពេលធ្វើការនោះ គឺអ្នកគួរតែពិចារណាជាថ្មី។ បើទោះបីទំនួលខុសត្រូវការងារគឺជារឿងសំខាន់ ប៉ុន្តែសុខភាពរបស់អ្នកត្រូវនៅមុខគេជានិច្ច។
៤. នៅពេលអ្នកមានអារម្មណ៍ហត់នឿយ និងគេងមិនលក់
ដើម្បីស៊ូនឹងជំងឺផ្សេងៗ យើងត្រូវការគេងលក់ឲ្យបានស្កប់ស្កល់នៅពេលយប់ ប៉ុន្តែយើងនឹងមានអារម្មណ៍ក្ដៅក្រហាយភ្លាមនៅពេលគេងមិនលក់តាមសេចក្ដីត្រូវការ។ បើអ្នកគិតថារឿងពិបាកចិត្តពេញខួរក្បាល មិនយូរទេជំងឺបាក់ទឹកចិត្តនឹងតាមមកពីក្រោយ។ ដូច្នេះអ្នកគួររកពេលឲ្យផ្លូវចិត្តបានសម្រាក និងមានអារម្មណ៍ស្រស់ថ្លា ទើបអាចគេងលក់ស្រួលឡើងវិញ។
៥. នៅពេលអ្នកមានអារម្មណ៍សោកសៅរហូត
វាជារឿងគួរឲ្យបារម្ភប្រសិនបើគ្រប់ពេលអ្នកមានតែអារម្មណ៍សោកសៅជាប់ក្នុងចិត្ត។ អ្នកត្រូវទទួលស្គាល់ថា ដល់ពេលដែលត្រូវសម្រាកហើយ ដើម្បីឲ្យខ្លួនឯងត្រលប់មករឹងមាំជាងមុន ៕
ចុចអាន៖
ចង់ស្វែងរកសុភមង្គលពិតឲ្យខ្លួនឯង គួរតែទន្ទេញរឿងទាំងនេះជាប់ខួរក្បាល
ចង់ធ្វើកិច្ចការធំ សូមកុំចែករំលែករឿង ៥ យ៉ាងនេះប្រាប់ទៅអ្នកដទៃ