ធ្វើបែបណាទើបកុំឲ្យរឿងអនាគតក្លាយជារឿងស្ត្រេស និងស្មុគស្មាញ?

2017-12-19 02:07:02
ចំនួនមតិ 0 | ចំនួនចែករំលែក 0

ឆ្នាំចាស់នឹងកន្លងផុតក្នុងពេលឆាប់ៗ ហើយឆ្នាំថ្មីក៏កំពុងតែត្រៀមខ្លួននឹងចូលមកដល់ដូចគ្នា។ អាយុកាន់តែច្រើនជាងមុន អ្នកក៏ប្រហែលកំពុងគិតថាខ្លួនឯងបានរីកចំរើនដល់កម្រិតណាហើយ គួរតែរៀបគម្រោងបែបណាខ្លះសម្រាប់ភាពជោគជ័យបន្ថែមក្នុងឆ្នាំថ្មី។ រឿងអនាគតគ្មានអ្នកណាអាចទាយដឹងមុនទេ ហេតុអ្វីទើបអ្នកត្រូវគិតច្រើន រហូតធ្វើឲ្យខ្លួនពិបាក ស្មុគស្មាញដល់ម្ល៉ឹង? ប្រើវិធីទាំង៤ខាងក្រោមដើម្បីបញ្ឈប់ការខ្វល់ខ្វាយទាំងឡាយ នោះអ្នកនឹងអាចរីករាយ ធូរស្រាលបានខ្លះ៖

១. កុំរៀបគម្រោងអនាគតមហាសាលខ្លាំងពេក

ប្រសិនបើអ្នកគិតគូរ រៀបគម្រោងរយៈពេលពេញមួយឆ្នាំ ច្រើន ល្អិតល្អន់ពេក អ្នកប្រាកដជាមានអារម្មណ៍ខ្វល់ខ្វាយ ភ័យព្រួយខ្លាំងជាមិនខាន។ មុននឹងឈានដល់គម្រោងធំ អ្នកគួររៀបចំផែនការ កំណត់គោលដៅតូចៗប្រចាំខែវិញទើបជារឿងដែលគួរធ្វើ។ បែបនេះអ្នកក៏មិនសូវមានសំពាធផ្លូវចិត្តខ្លាំង។

២. ទទួលស្គាល់នូវអ្វីដែលអ្នកមិនអាចផ្លាស់ប្ដូរបាន

ទោះអ្នកជាមនុស្សរឹងមាំ ឆ្លាត ឬពូកែប៉ុណ្ណា ក៏មានរឿងជាច្រើនដែលអ្នកនៅតែមិនអាចផ្លាស់ប្ដូរបាន ព្រោះវានៅក្រៅរង្វង់គ្រប់គ្រង និងសមត្ថភាពរបស់អ្នក។ ដូច្នេះកុំចំណាយកម្លាំងអត់ប្រយោជន៍ទៅគិតរឿងដែលមិនទាន់កើតឡើយថ្វី។

៣. វាជាក្ដីស្រមៃរបស់អ្នក ដូច្នេះអ្នកប្រាកដជាធ្វើបាន

ព្រួយបារម្ភពីរឿងអនាគត មិនបានជួយអ្វីក្រៅពីបន្ថែមភាពធុញថប់ ភ័យខ្លាចឲ្យអ្នកមុននោះទេ។ រឿងដែលសំខាន់ គឺអ្នកត្រូវសាងភាពជឿជាក់ឲ្យខ្លួនឯង។ បើវាជារឿងដែលអ្នកស្រមៃចង់ធ្វើ អ្នកប្រាកដជាអាចធ្វើវាបាន ព្រោះអ្នកបានត្រៀមខ្លួននឹងធ្វើវាឲ្យបានល្អបំផុតរួចរាល់យូរមកហើយ។

៤. ផ្ដោតអារម្មណ៍លើរឿងផ្សេង

កុំចេះតែអង្គុយខ្វល់ ដោយមិនបញ្ចេញសកម្មភាពអ្វីសោះនោះ។ ដើម្បីធ្វើឲ្យខ្លួនឯងរវល់ អ្នកត្រូវចាប់ផ្តើមធ្វើរឿងមានប្រយោជន៍តូចៗ មួយចំនួនជារៀងរាល់ថ្ងៃ ដូចជា ប្រឡងយកប័ណ្ណបើកបរ ឧស្សាហ៍ទៅពិនិត្យសុខភាព ឬទម្លាប់អានសៀវភៅជាដើម ៕

ចុចអាន៖

ប្រភព៖ Careergirldaily ប្រែសម្រួល៖ អូន បញ្ញា