បោះចោល១០យ៉ាងនេះបាន ទើបជីវិតអ្នកបានសុខ និងជោគជ័យពិតប្រាកដ

2017-12-14 05:02:00
ចំនួនមតិ 0 | ចំនួនចែករំលែក 0

ខាងក្រោមនេះគឺជាអ្វីដែលអ្នកអាចនឹងកំពុងមានជាប់ខ្លួន។ បោះបង់គំនិត និងទម្លាប់ទាំង១០យ៉ាងនេះបាន ជីវិតអ្នកនឹងកាន់តែមានសេចក្ដីសុខ និងភ្លឺស្វាងជាងបច្ចុប្បន្ន៖

១. បោះចោលចរិត “ច្រណែន”

នៅពេលអ្នកប្រៀបធៀបខ្លួនឯងជាមួយអ្នកដទៃ វាអាចនឹងល្អបើវាជាកម្លាំងជំរុញទឹកចិត្តឲ្យអ្នកកាន់តែតស៊ូ និងអភិវឌ្ឍខ្លួនឯង ប៉ុន្តែវានឹងក្លាយជារឿងអាក្រក់ភ្លាម បើភាពជោគជ័យរបស់អ្នកដទៃធ្វើឲ្យអ្នកមានអារម្មណ៍មិនល្អ និងមិនអាចសាទរជាមួយគេបាន។ នេះហើយគឺជាការនាំទុក្ខដល់ខ្លួនឯង។

២. បោះចោលចរិត “ខ្លាចការផ្លាស់ប្ដូរ”

ជាច្រើនលើក សូម្បីកំពុងស្ថិតក្នុងស្ថានភាពពិបាកយ៉ាងណាក្ដី មនុស្សយើងក៏មិនចង់ធ្វើការផ្លាស់ប្ដូរ ព្រោះខ្លាចថាអ្វីដែលថ្មីអាចពិបាកជាងនេះ។ ប៉ុន្តែអ្នកដឹងទេថា ពេលខ្លះអ្វីថ្មីៗអាចនឹងល្អជាងអ្វីដែលអ្នកកំពុងជួបជាច្រើនដងក៏ថាបាន។ ដូច្នេះហើយសូមកុំខ្លាចការផ្លាស់ប្ដូរ បើអ្នកចង់បានអ្វីដែលល្អជាងបច្ចុប្បន្ន។

៣. បោះចោលចរិត “គ្រប់គ្រងគ្រប់រឿង”

មនុស្សមិនតិចនាក់ឡើយ ដែលចូលចិត្តគិតគ្រប់សព្វ ចូលចិត្តឲ្យគ្រប់យ៉ាងអាចស្ថិតក្រោមការគ្រប់គ្រងរបស់ខ្លួន ដំណើរតាមផែនការរបស់ខ្លួន ប៉ុន្តែពេលវាមិនបានតាមនោះ ក៏កើតទុក្ខភ្លាម។ ដូច្នេះហើយត្រូវចេះបណ្ដោយៗខ្លះ ខំប្រឹងធ្វើឲ្យអស់ពីសមត្ថភាព លទ្ធផលយ៉ាងណាក៏ទទួលយកវាតាមនោះ ព្រោះគ្មានអ្វីដែលយើងអាចគ្រប់គ្រងបានទាំងស្រុងនោះទេ។

៤. បោះចោលចរិត “ធ្វើការច្រើនជ្រុល ជាពិសេស OT”

ដើម្បីសម្រេចជោគជ័យ ដើម្បីតំណែងការងារ ឬលុយ ធ្វើឲ្យមនុស្សជាច្រើនខំប្រឹងធ្វើការធ្ងន់ លើសកម្រិតដែលសមគួរ។ ដូច្នេះបើកំពុងវក់នឹងការងារខ្លាំង សូមអ្នកឈប់បន្តិច ហើយពិនិត្យមើលឡើងវិញថារវាងជីវិត និងការងារ របស់អ្នកតើវាមានតុល្យភាព ឬ Balance ហើយឬនៅ? សូមកុំខំប្រឹងហួសហេតុ ព្រោះទម្រាំដល់ថ្ងៃអ្នកទទួលបានជោគជ័យ អ្នកអាចបាត់បង់អ្វីច្រើនទៀតដែលមិនអាចទាញយកមកវិញបាន ដូចជាសុខភាព និងទំនាក់ទំនងផ្សេងៗ។

៥. បោះចោលចរិត “បន្ទោសអ្នកដទៃ ឬបញ្ហា”

មនុស្សជាច្រើន នៅពេលមានបញ្ហាកើតឡើង គឺត្រូវស្វែងរកមនុស្ស ឬអ្វីផ្សេងដើម្បីមកទទួលខុសជំនួសខ្លួន ដោយបន្ទោសនេះ បន្ទោសនោះគ្រប់ពេល។ សូមបញ្ឈប់ទម្លាប់បែបនេះ ហើយងាកមកអង្គុយគិត និងជួយគ្នាស្វែងរកវិធីដោះស្រាយបញ្ហាវិញប្រសើរជាង។

ចុចអាន៖ មើលតែ ៩ចំណុចសាមញ្ញទាំងនេះក៏អាចដឹងខ្លះដែរថាអ្នកក្លាយជាមនុស្សជោគជ័យឬអត់

៦. បោះចោលចរិត “រអ៊ូរ ឬរិះគន់គ្រប់ពេលវេលា”

ជំនួសឲ្យការរអ៊ូរ រិះគន់ ពីរឿងមិនល្អ ដែលមិនបានដូចចិត្តខ្លួនឯងគ្រប់ពេលនោះ អ្នកគួរផ្លាស់ប្ដូរការគិត និងការសម្លឹងមើលបញ្ហាជាថ្មី ថាតើបញ្ហាកើតឡើងដោយសារអ្វី ហើយត្រូវដោះស្រាយបែបណា។ ធ្វើបែបនេះជីវិតអ្នកនឹងមានក្ដីសុខកាន់តែច្រើន។

៧. បោះចោលចរិត “គិតថាខ្លួនឯងត្រូវរហូត”

“ដំរីជើងបួនគង់មានភ្លាត់ អ្នកប្រាជ្ញចេះស្ទាត់គង់មានភ្លេច” គ្មានអ្នកណាទៅពូកែបានគ្រប់រឿងនោះទេ។ ការដែលត្រូវមកអង្គុយស្ត្រេស ខ្លាចថាខ្លួនឯងមិន Perfect នោះនឹងធ្វើឲ្យអ្នកមិនអាចរកក្ដីសុខឃើញនោះឡើយ។ ដូច្នេះហើយ គួរតែបណ្ដោយ និងទទួលស្គាល់ធម្មជាតិរបស់មនុស្សថាមិនអាចល្អឥតខ្ចោះបាននោះទេ។

៨. បោះបង់ចរិត “ជឿថាខ្លួនឯងធ្វើមិនបាន”

មនុស្សមួយចំនួនចូលចិត្តជឿថា ខ្លួនឯងធ្វើនេះមិនបាន ធ្វើនោះមិនបាន ឬធ្វើបានតែប៉ុណ្ណេះ... ការគិតទាំងអស់នេះគឺជាឧបសគ្គដែលសំខាន់បំផុតក្នុងជីវិត ដែលធ្វើឲ្យយើងមិនអាចធ្វើអ្វីដែលខ្លួនស្រឡាញ់បាន ឬមិនអាចតស៊ូពុះពារដើម្បីទៅដល់ភាពជោគជ័យបានឡើយ។

៩. បោះចោល “មិត្តអាក្រក់ៗ”

មនុស្សគឺជាសត្វក្នុងសង្គម និងអាចទទួលឥទ្ធិពលពីអ្នកនៅជុំវិញខ្លួនបានខ្ពស់បំផុត ដូច្នេះហើយបើអ្នកចង់ក្លាយជាមនុស្សបែបណា ការសេពគប់មិត្តភ័ក្ដិគឺជាចំណុចសំខាន់ បើមិត្តល្អ អ្នកនឹងបានល្អ បើមិត្តមិនល្អ អ្នកនឹងបណ្ដោយខ្លួនឲ្យមិនល្អទៅជាមួយដែរ។

១០. បោះចោល “អតីត”

អតីតកាលគឺជាបទពិសោធន៍ដែលមានទាំងល្អ និងមិនល្អ។ វាជាអ្វីដែលនាំយើងឲ្យមានថ្ងៃនេះ ប៉ុន្តែអ្វីដែលយើងគួរចាំនោះមិនគួរជាអ្វីដែលជារឿងឈឺចាប់ក្នុងអតីត និងធ្វើឲ្យយើងមិនអាចដើរទៅមុខបាននោះទេ ៕