រឿង៤យ៉ាង បើគូស្នេហ៍អ្នកធ្វើបាន នឹងមានសុភមង្គលជាងគូស្នេហ៍ទូទៅ

2017-08-21 08:42:33
ចំនួនមតិ 0 | ចំនួនចែករំលែក 0

ការស្វែងរកដៃគូចេះយល់ចិត្តគ្នា ស្រលាញ់គ្នា និងមាននិស្ស័យនឹងគ្នា គឺជារឿងលំបាកមួយចំពោះមនុស្សគ្រប់រូប ព្រោះត្រូវការចំណាយពេលវេលាមើលចិត្តគ្នាជាយូរខែឆ្នាំ។ អ្នកខ្លះរកបានហើយ ក៏ប្រេះឆាទៅវិញ ព្រោះតែភាគីម្ខាងចេះតែបង្កើតបញ្ហាធ្វើម្ខាងទៀតទើសចិត្ត ឬរងគំនាបពីភាគីទី ៣។

តាមរយៈការសិក្សាស្រាវជ្រាវពីអ្នកចិត្តសាស្ត្រ និងអ្នកជំនាញគ្រួសារ បានបង្ហើបឲ្យដឹងថា កត្តាសំខាន់ៗទាំង ៤ខាងក្រោមនេះ អាចជួយឲ្យគូស្នេហ៍ ឬប្ដីប្រពន្ធកាន់តែរីករាយមានសុភមង្គលច្រើនជាងគូស្នេហ៍ទូទៅ។

១. សើចសប្បាយជាមួយគ្នា

ការសិក្សាមួយរកឃើញថា ទោះបីជាអ្នកមិនធ្លាប់ស្គាល់គ្នាពីមុនមក តែបើបាននៅក្បែរគ្នា និងសើចសប្បាយជាមួយគ្នា នោះទំនាក់ទំនងនឹងកាន់តែជិតស្និត ឬឆាប់ស្គាល់គ្នាតែម្ដង។ តែបើសិនជាគូស្នេហ៍ ឬប្ដីប្រពន្ធវិញ ពួកគេរឹតតែភាពស្និតស្នាល ទំនាក់ទំនងល្អ និងមានសុភមង្គលទ្វេដង។

២. ធ្វើអំពើល្អ ឬធ្វើបុណ្យរួមគ្នា

ប្រសិនបើអ្នកទាំងពីរចំណាយពេលធ្វើអំពើល្អជួយសង្គម បរិច្ចាគទ្រព្យបន្តិចបន្តួច ឬធ្វើបុណ្យជាមួយគ្នា ប្រាកដណាស់ចិត្តដ៏ជ្រះស្រលះរបស់ពួកគេ នឹងធ្វើឲ្យគេកាន់តែសប្បាយចិត្តមួយកម្រិតទៀត អមជាមួយពាក្យកោតសរសើរពីអ្នកជុំវិញ។

៣. ណាត់ជួបគ្នាពេលល្ងាច

នៅពេលល្ងាច ជាពេលដែលគ្រប់គ្នាចេញពីធ្វើការ ឬពេលមនុស្សភាគច្រើនបានសម្រាក ក្រោយធ្វើការដ៏តានតឹងរយៈពេលមួយថ្ងៃពេញ ដូច្នេះបើអ្នកទាំងពីរយកពេលទាំងនោះមករក្សាទំនាក់ទំនងស្នេហ៍តាមរយៈចេញទៅញ៉ាំអីជុំគ្នា មើលភាពភាពយន្ត ឬជជែកគ្នាលេង នោះនឹងធ្វើឲ្យពួកគេកាន់តែស្និតស្នាល និងរីករាយបន្ថែមទៀត។

៤. ដើរលំហែកន្លែងឆ្ងាយៗជាមួយគ្នា

ជាគូស្នេហ៍ ឬប្ដីប្រពន្ធ ពិតណាស់ខាងស្រីប្រាកដជាចូលចិត្តទៅលេងនៅតំបន់ឆ្ងាយៗដូចជា មាត់សមុទ្រ ព្រៃឈើ ភ្នំ បឹងបួ ចម្ការផ្កា និងតំបន់ប្រវត្តិសាស្ត្រនានា ដើម្បីបានថតរូប និងសាងអនុស្សាវរីយ ផ្អែមល្ហែមនានា។ គូស្នេហ៍មានចំណុចល្អៗប៉ុន្មានខាងលើ ត្រូវបានគេចាត់ទុកថា ជាគូស្នេហ៍មានសុភមង្គលច្រើនជាងគូស្នេហ៍ធម្មតា៕