អាយុដើរទៅមុខ ប៉ុន្តែសុខភាពនិងសម្រស់មិនចាញ់ក្មេង បើចេះគន្លឹះ ៥យ៉ាងនេះ

2019-05-17 08:05:00
ចំនួនមតិ 0 | ចំនួនចែករំលែក 0

អាយុកាន់តែច្រើន សុខភាពរបស់មនុស្សយើង នឹងវិវឌ្ឍទៅរកភាពទន់ខ្សោយបន្តិចម្តងៗ ប៉ុន្តែឲ្យតែអ្នកអាចអនុវត្តគន្លឹះសំខាន់ៗ៥យ៉ាងខាងក្រោមនេះ មិនថាអាយុកើនឡើងប៉ុណ្ណា ក៏នៅតែអាចមានសម្រស់ស្រស់ស្អាត សុខភាពមាំទាំមិនចាញ់ក្មេងប៉ុន្មានទេ។

១. មិនគេងយូរ

ការគេងយូរម៉ោងពេក ធ្វើឲ្យអ្នកឆាប់ចាស់ខ្លាំងណាស់ ព្រោះរាងកាយមិនបានសម្រាកក្នុងពេលវេលាសមរម្យមួយ។ ពេលខ្លះអ្នកក្រចូលគេងពេក ហើយក៏ភ្ញាក់ជ្រុលម៉ោង ជាហេតុបណ្តាលឲ្យសុខភាពចុះខ្សោយ ស្បែកប្រែក្លាយជាជ្រួញមុនវ័យ។ ត្រូវចូលគេងឲ្យបានទៀតពេល មិនត្រូវនៅចុចទូរសព្ទយូររហូតដល់ខកម៉ោង ពុំដូច្នោះទេអ្នកនឹងគេងមិនលក់ រាងកាយមិនអាចផលិតអ័រម៉ូនថ្មី សុខភាពនិងសម្រស់ក៏ទ្រុឌទ្រោមទៅតាមនឹងដែរ។

២. ញ៉ាំបន្លែឲ្យបានទៀងទាត់

គួរតែចោលទម្លាប់ស្អប់បន្លែចេញទៅ។ ប្រសិនបើអ្នកស្រលាញ់ស្បែកត្រូវព្យាយាមញ៉ាំបន្លែឲ្យបានច្រើនដូចគ្នា។ ដោយសារបន្លែ មានផ្ទុកវីតាមីនសំខាន់ៗនិងជាតិរ៉ែ ដែលអាចជួយឲ្យអ្នកមានសុខភាពល្អ។ មិនតែប៉ុណ្ណោះ វាមានតួនាទី ធ្វើឲ្យសម្រស់ក្មេងស្អាត ស្បែកភ្លឺ និងមានសារប្រយោជន៍ចំពោះប្រព័ន្ធរំលាយអាហារផងដែរ។ កាលណាអ្នកព្យាយាមញ៉ាំបន្លែល្អៗឲ្យបានច្រើន នោះអ្នកនឹងទទួលបានលទ្ធផលជាទីគាប់ចិត្តមិនខាន។

៣. ឈប់ញ៉ាំអាហារដែលសម្បូរជាតិខ្លាញ់ខ្ពស់

ពពួកអាហារដែលមានជាតិខ្លាញ់និងកាឡូរីខ្ពស់ តែងផ្តល់នូវគុណវិបត្តិច្រើនជាងគុណសម្បត្តិ។ មិនថាជារបស់បំពង ជូរ ហឹរ ប្រៃក៏ដោយ វាសុទ្ធតែអាចបង្កគ្រោះថ្នាក់ដល់សុខភាពរបស់អ្នកទាំងអស់។ អាហារទាំងនោះ មិនត្រឹមតែធ្វើឲ្យធាត់ប៉ុណ្ណោះទេ វាថែមទាំងធ្វើឲ្យស្បែកក្រៀមស្រពោនឆាប់ចាស់ និងចូលទៅបំផ្លាញរាងកាយពីមួយថ្ងៃទៅមួយថ្ងៃ។

៤. កាត់បន្ថយភេសជ្ជៈមានហ្កាសនិងជាតិស្ករខ្ពស់

ភេសជ្ជៈដែលមានរស់ជាតិផ្អែមនិងមានជាតិហ្កាសច្រើន ពេលអ្នកផឹកចូលពោះទៅច្បាស់ជាមានរសជាតិឆ្ងាញ់និងធ្វើឲ្យអារម្មណ៍ស្រស់ថ្លា ប៉ុន្តែបើអ្នកញៀនជាមួយវាខ្លាំង ខ្វះមួយថ្ងៃមិនបាន ជាតិស្ករនៅក្នុងភេសជ្ជទាំងនោះ នឹងចូលទៅបង្កឲ្យកើតជំងឺផ្សេងៗនឹកស្មានមិនដល់ ដូចជាជំងឺបេះដូង ទឹកនោមផ្អែម និងលើសឈាមជាដើម។

៥. ញ៉ាំអាហារពេលព្រឹកកុំបីខាន

អាហារពេលព្រឹក សំខាន់ជាងគេបង្អស់ក្នុងចំណោមអាហារទាំង៣ពេល ដូច្នេះហើយអ្នកមិនអាចមើលរំលងដាច់ខាត។ អាហារពេលព្រឹក មាននាទីបញ្ជូនជីវជាតិសំខាន់ៗ ទៅឲ្យរាងកាយទាំងមូល ដើម្បីជួយឲ្យរាងកាយរឹងមាំ មានកម្លាំងធ្វើកិច្ចការផ្សេងៗពេញមួយថ្ងៃ ជំនួយដល់ប្រព័ន្ធរំលាយអាហារ និងដំណើរការនៃខួរក្បាល។

គន្លឹះ៥ ខាងលើនេះ មើលទៅសាមញ្ញពិតមែន ប៉ុន្តែបើអ្នកអាចអនុវត្តបានជារៀងរាល់ថ្ងៃ នោះអ្នកនឹងមានសុខភាពល្អ ទាំងផ្នែកខាងក្នុងនិងខាងក្រៅ ស្រស់ថ្លារឹងមាំដូចពេលនៅជាយុវវ័យអីចឹងដែរ៕

ចុចអានបន្ត៖