មិនមែនខំរៀនតែមួយមុខទេ! ៧យ៉ាងដែលសិស្សមហាវិទ្យាល័យត្រូវដឹងដើម្បីជោគជ័យទៅអនាគត

2018-07-02 07:36:17
ចំនួនមតិ 0 | ចំនួនចែករំលែក 0

៧យ៉ាងដែលសិស្សមហាវិទ្យាល័យត្រូវដឹងដើម្បីជោគជ័យទៅអនាគត ដែលអ្នកអាចនឹងមិនដឹងទេថាអ្វីដែលអ្នកធ្វើក្នុងកំឡុងពេលរៀននៅមហាវិទ្យាល័យនេះ អាចជះឥទ្ធិពលដល់អ្នកទាំងល្អ និងអាក្រក់ទៅអនាគត។ សាកល្បងមើលទាំងអស់គ្នាខាងក្រោមនេះថា អ្វីដែលគួរធ្វើ និងត្រូវប្រយ័ត្នឲ្យបានច្រើនបើមិនចង់ឲ្យមានផលប៉ះពាល់ដល់ជីវិតធ្វើការទៅថ្ងៃមុខ៖

១. មិនបង្ហោះអ្វីដែលមិនល្អក្នុងបណ្ដាញសង្គម

ក្រៅពីការកំណត់ពេលវេលាលេងបណ្ដាញសង្គមឲ្យសមរម្យហើយ ការប្រយ័ត្នប្រយែងក្នុងការបង្ហោះ Status ឬរូបភាពផ្សេងៗ ក៏ជារឿងសំខាន់មិនចាញ់គ្នាដែរ ព្រោះបើអ្នកបង្ហោះនូវអ្វីដេលមិនល្អ វានឹងធ្វើឲ្យកើតមានរូបភាពមិនល្អសម្រាប់ខ្លួនឯង។ វាអាចផ្ដល់ផលអាក្រក់ក្នុងករណីដែលអ្នកទៅសម្ភាសការងារទៅថ្ងៃមុខ ហើយអ្នកសម្ភាសអាចលួចចូលមើល Profile របស់អ្នកហើយឃើញអ្វីៗទាំងនោះ។

២. ការងារហាត់ការ (Intern)

នៅឆ្នាំចុងៗក្រោយនៃការសិក្សាមហាវិទ្យាល័យអាចជាពេលសម្រាប់ហាត់ការ ដែលមហាវិទ្យាល័យខ្លះគឺតម្រូវឲ្យនិស្សិតចុះធ្វើការហាត់ការតែម្ដង។ ប៉ុន្តែបើទោះបីមហាវិទ្យាល័យមិនតម្រូវ វានៅតែសំខាន់ព្រោះវាគឺជាឱកាសល្អបំផុតដែលអ្នកអាចរៀនសូត្រពីជីវិតធ្វើការ និងវិធីរៀបចំខ្លួនក្នុងសង្គម ដែលសំខាន់ខ្លាំងសម្រាប់ការធ្វើការទៅអនាគត។ ក្រៅពីនេះ ការហាត់ការក៏ដូចជាការងារក្រៅម៉ោង ក៏អាចឲ្យអ្នកយកអ្វីដែលខ្លួនបានរៀនមកសាកល្បងជាក់ស្ដែងក្នុងការធ្វើការផងដែរ។

៣. អានសៀវភៅបន្ថែម

ពិតមែនហើយថានៅពេលរៀនមហាវិទ្យាល័យអ្នកបានអានសៀវភៅមួយគំនរពីរគំនរទៅហើយដើម្បីប្រឡង ប៉ុន្តែបើអ្នកមានពេលទំនេរ គឺគួរតែអានសៀវភៅប្រភេទផ្សេងៗក្រៅពីសៀវភៅរៀនខ្លះ ជាពិសេសសៀវភៅដែលជួយសាងកម្លាំងជំរុញចិត្ត ឬផ្ដល់គំនិតល្អៗសម្រាប់អ្នក ព្រោះវានឹងធ្វើឲ្យអ្នកទទួលបានទស្សនថ្មីៗ និងអាចនាំមកនូវគំនិតច្នៃប្រឌិតល្អទៅអនាគត។

៤. សន្សំលុយ

ការសន្សំលុយមិនចាំបាច់ត្រូវតែចាប់ផ្ដើមនៅពេលអ្នកចាប់ផ្ដើមធ្វើការនោះទេ ព្រោះយើងអាចសន្សំលុយបានដែរតាមរយៈលុយចំណាយដែលទទួលបានពីឪពុកម្ដាយ។ បើទោះបីជាមើលទៅជារឿងតិចតួច ប៉ុន្តែបើអ្នកឧស្សាហ៍សន្សំវាដោយយកចិត្តទុកដាក់ វានឹងក្លាយជាលុយមានចំនួនច្រើនបានទៅអនាគត។ ក្រៅពីនេះ អាចចាត់ទុកថាជាការហ្វឹកវិន័យក្នុងការចាយលុយមុននឹងយើងមានលុយដែលរកបានដោយខ្លួនឯង។

៥. រកបណ្ដាញទំនាក់ទំនង (Connection)

ក្រៅពីផ្ដោតលើការសិក្សាជាចម្បងហើយ ការមានមិត្ត ឬការស្វែងរក Connection កំឡុងពេលរៀនមហាវិទ្យាល័យនោះក៏សំខាន់មិនចាញ់គ្នាដែរ ព្រោះអ្នកទាំងអស់នោះនឹងអាចជួយ ឬផ្ដល់ការណែនាំសម្រាប់អ្នកទៅអនាគតពាក់ព័ន្ធនឹងរឿងការងារ។ អ្នកអាចកសាងមិត្តភាពថ្មីៗតាមរយៈការចូលរួមការងារសង្គមរបស់មហាវិទ្យាល័យ ឬកន្លែងផ្សេងៗបាន។

៦. ទំនាក់ទំនងជាមួយសាស្ត្រាចារ្យ

អ្នកអាចនឹងគិតថាគ្រូបង្រៀន ឬសាស្ត្រាចារ្យនៅមហាវិទ្យាល័យមានតួនាទីត្រឹមតែបង្រៀនតែប៉ុណ្ណោះ ប៉ុន្តែការពិតទៅពួកគាត់ក៏អាចផ្ដល់ការណែនាំល្អៗ ពាក់ព័ន្ធការជ្រើសរើសការងារបានដែរ។ ក្រៅពីនេះ បើអ្នកស្គាល់ ឬស្និទ្ធស្នាលជាមួយគ្រូបង្រៀន វាក៏នឹងងាយស្រួលសម្រាប់អ្នកនៅពេលចង់ស្នើសុំឲ្យគាត់សរសេរលិខិតធានា (Reference Letter) ដែលជាឯកសារចាំបាច់មួយដែរសម្រាប់ការស្នើសុំអាហារូបករណ៍ ឬការងារផ្សេងៗ។

៧. រៀនធ្វើបទបង្ហាញ

ក្នុងកំឡុងពេលរៀននៅមហាវិទ្យាល័យចាត់ទុកថាជាឱកាសដ៏ល្អដែលអ្នកបានហ្វឹកហាត់ការនិយាយសាធារណៈ ឬការធ្វើបទបង្ហាញ។ វានឹងអាចឲ្យអ្នកព្យាយាមនិយាយឲ្យបានរលូន និងចេះពន្យល់ឲ្យអ្នកស្ដាប់ឆាប់យល់ រួមទាំងមានតិចនិកផ្សេងៗ ដែលជួយឲ្យអ្នកអាច Present ការងារបានរលូន ព្រោះនៅពេលចូលប្រឡូកសង្គមការងារ ការធ្វើបទបង្ហាញគឺពិតជាសំខាន់ខ្លាំងណាស់។

ជួនកាលអ្វីដែលកញ្ញាលើកឡើងនេះ អាចជាអ្វីដែលនិស្សិតទូទៅបានដឹងស្រាប់ទៅហើយ ប៉ុន្តែមិនបានយកចិត្តទុកដាក់ច្រើន។ យ៉ាងណាមិញ បើអ្នកខិតខំប្រឹងប្រែងច្រើន អ្នកក៏នឹងមានឱកាសច្រើនតាមនោះដែរទៅអនាគត ៕

ចុចអាន៖

ប្រភព៖ Orami ប្រែសម្រួល៖ ស្វាយ វ៉ាន់ថន