ចង់ឃើញខ្លួនឯងរីកចម្រើនខ្ពស់ទៅអនាគត រឿង៧យ៉ាងនេះត្រូវធ្វើឲ្យបាន

2018-06-13 06:53:32
ចំនួនមតិ 0 | ចំនួនចែករំលែក 0

មនុស្សកើតមកអាចមានដើមទុនសម្រាប់ជីវិតមិនស្មើគ្នា តែទោះយ៉ាងណាគ្រប់គ្នាតែងប្រាថ្នាចង់បានជីវិតដែលមានក្ដីសុខមួយទាំងនៅក្នុងបច្ចុប្បន្ន និងទៅអនាគត។ ការពិតទៅគ្រប់យ៉ាងអាចកើតឡើងបាន ប្រសិនបើយើងមានការតស៊ូខ្ពស់។ វិធីសាស្ត្រមួយចំនួនខាងក្រោមនេះនឹងអាចដឹកដៃអ្នកឆ្ពោះទៅរកជីវិតល្អមួយទៅថ្ងៃមុខ៖

១. រៀបចំផែនការជីវិត

គ្មានទូកឯណាអាចទៅមុខដោយគ្មានចង្កូតនិងស្លាបចក្រនោះទេ។ ប្រៀបដូចជាជីវិតរបស់យើង គឺគួរមានការរៀបចំផែនការ រួមទាំងគោលដៅដែលត្រូវសម្រេច ដូចជាការកំណត់គោលដៅថា ១ឆ្នាំទៀត ឬ១០ឆ្នាំទៀត យើងនឹងក្លាយជាអ្វី ដើម្បីអាចចាត់ចែងពេលវេលាដែលជាទ្រព្យមានកំណត់របស់យើង ឲ្យមានប្រយោជន៍ និងមានតម្លៃបំផុតតាមដែលអាចធ្វើបាន។

២. រៀនសូត្រតាមបុគ្គលគំរូ

បុគ្គលគំរូ ឬ Idol គឺមនុស្សដែលយើងស្ញប់ស្ញែងហើយចង់បានដូចគេខ្លាំងបំផុត។ បុគ្គលគំរូម្នាក់ៗសុទ្ធតែមានតិចនិក អាថ៌កំបាំង និងវិធីសាស្ត្រគិតផ្ទាល់ខ្លួន។ អ្នកខ្លះអាចជាមនុស្សធម្មតាដូចជាយើងអីចឹងកាលពីមុន ប៉ុន្តែហេតុអ្វីបានជាគេអាចទទួលជោគជ័យ? បើអ្នកស្រមើស្រមៃចង់ឲ្យខ្លួនឯងបានដូចបុគ្គលគំរូរបស់ខ្លួនឲ្យបាន ចូរសាកល្បងតាមដាន និងរៀនសូត្រនូវគំនិតល្អរបស់គេ និងសាកល្បងយកមកអនុវត្តក្នុងជីវិតរបស់ខ្លួន។ មិនមែនខំធ្វើគ្រប់យ៉ាងឲ្យដូចគេនោះទេ ប៉ុន្តែត្រូវចាប់យកចំណុច និងគន្លឹះដោះស្រាយបញ្ហានានារបស់គេ មកប្រើដើម្បីសម្រេចគោលដៅផ្ទាល់ខ្លួនរបស់យើងបាន។

៣. ចាត់ទុកខ្លួនឯងជាគូប្រកួត

បើយើងរវល់តែយកខ្លួនឯងទៅប្រៀបធៀបជាមួយអ្នកដែលគេមានជីវិតល្អស្រាប់ហើយនោះ វាអាចធ្វើឲ្យយើងឆាប់រាថយ អស់កម្លាំងចិត្តបាន។ ប៉ុន្តែបើយើងសម្លឹងមើលខ្លួនឯងចាត់ទុកជាគូប្រជែង ព្យាយាមយកឈ្នះខ្លួនឯងកាលពីមុន វានឹងអាចឲ្យយើងទទួលបានទាំងការអភិវឌ្ឍខ្លួនឯង និងអារម្មណ៍វិជ្ជមាន ដូចដែលគេនិយាយថាយើងអាចទទួលបានជោគជ័យរៀងរាល់ថ្ងៃ ដោយការយកឈ្នះលើខ្លួនឯង ពោលគឺអភិវឌ្ឍល្អជាងមុនរាល់ថ្ងៃ។

៤. មិនរំពឹងខ្ពស់ខ្លាំងពេក

ការរំពឹងទុកខ្ពស់ គឺជាសត្រូវគ្រោះថ្នាក់មួយដែរសម្រាប់ការគិតរបស់យើង។ បើយើងរំពឹងខ្ពស់ពេក នៅពេលមានអ្វីខុសឆ្គង មិនដូចបំណង យើងនឹងឈឺចាប់ខ្លាំង រហូតពេលខ្លះដល់ថ្នាក់មិនអាចចាប់ផ្ដើមជាថ្មីបាន។ ដូច្នេះគួរតាំងការរំពឹងទុកក្នុងកម្រិតមួយដែលមិនខ្ពស់ខ្លាំងពេក ហើយបើមានអ្វីភ្លាត់ស្នៀត ត្រូវប្រាប់ខ្លួនឯងថាថ្ងៃស្អែកនៅមានជានិច្ច។

៥. ស្មោះត្រង់នឹងខ្លួនឯង

ត្រូវលះបង់ជាមួយអ្វីដែលយើងធ្វើហើយមានក្ដីសុខ ឬមានកម្លាំងចិត្តនឹងធ្វើ។ កុំបង្ខំចិត្តធ្វើនូវអ្វីដែលយើងមិនចូលចិត្ត ឬធ្វើអ្វីដែលមិនមែនជាខ្លួនឯង ជាពិសេសរឿងការងារ ព្រោះអ្នកនឹងត្រូវនៅជាមួយវាមួយជីវិត។ បើមានអារម្មណ៍ថាជីវិតតម្រូវឲ្យយើងចាំបាច់ធ្វើអ្វីដែលយើងមិនចូលចិត្តនោះ ចូរព្យាយាមស្វែងរកចំណុចល្អរបស់វាឲ្យបាន។

៦. កុំភ្លេចគិតគូរដល់សុខភាព

បើចង់មានជីវិតដែលល្អមួយ អ្នកអាចនឹងត្រូវហត់នឿយជាមួយការងារជាច្រើន ប៉ុន្តែសូមកុំប្រឹងប្រែងភ្លេចខ្លួន រហូតបំផ្លាញ ឬមិនយកចិត្តទុកដាក់នឹងសុខភាពខ្លួនឯង។ ជីវិតដែលល្អ គឺត្រូវតែមានសុខភាពល្អជាគូដែរ ព្រោះគ្មានអ្នកណាចង់ចាយលុយដែលខ្លួនខំរកទាំងប៉ុន្មាននោះក្នុងមន្ទីរពេទ្យនោះទេ។

៧. ឲ្យតម្លៃលើមិត្តភាព

សាកល្បងសម្លឹងរកមនុស្សដែលយើងនៅជាមួយហើយមានអារម្មណ៍ស្រណុកចិត្ត និងមានក្ដីសុខ មនុស្សដែលអាចពឹងពាក់គ្នាទៅវិញទៅមកបាន អាចផ្ដល់អារម្មណ៍ល្អៗ អំពើល្អឲ្យអ្នក។ បើរកឃើញហើយ ចូររក្សាមិត្តភាពនោះឲ្យបានយូរអង្វែង ដោយផ្ដល់ឲ្យពួកគេនូវទំនុកចិត្ត ភាពកក់ក្ដៅ ស្នាមញញឹមត្រលប់ទៅវិញ ព្រោះនៅពេលពេលវេលាកន្លងផុត គឺមានតែមិត្តភាពល្អៗនេះហើយដែលអាចនៅជាមួយអ្នក ៕

ចុចអាន៖

ប្រភព៖ goodlifeupdate ប្រែសម្រួល៖ ស្វាយ វ៉ាន់ថន