រឿងសំខាន់ៗដែលប្ដីប្រពន្ធដាច់ខាតត្រូវផ្ដល់ឲ្យគ្នាទៅវិញទៅមក

2018-04-30 07:32:40
ចំនួនមតិ 0 | ចំនួនចែករំលែក 0

បុរសម្នាក់បានរៀនដល់ថ្នាក់មហាវិទ្យាល័យ ប៉ុន្តែរៀនមិនចប់ ឪពុកម្ដាយក៏ចាត់ចែងរកប្រពន្ធឲ្យ។ ក្រោយរៀបការរួច គេក៏បានដាក់ពាក្យធ្វើជាគ្រូបង្រៀននៅសាលាបឋមសិក្សាមួយនៅក្បែរផ្ទះ។ ដោយសារគ្មានបទពិសោធន៍បង្រៀន ចូលបង្រៀនមិនបានមួយអាទិត្យ គេក៏ត្រូវបានបណ្ដេញចេញ។

ពេលត្រលប់មកដល់ផ្ទះ ប្រពន្ធបានលួងលោមគេថា៖

“កុំបារម្ភច្រើនពេកបង អាចមានការងារសក្ដិសមជាងនេះដែលកំពុងរង់ចាំបងក៏ថាបាន"

ក្រោយមកគេក៏បានទៅធ្វើការជាកម្មករស៊ីឈ្នួល ប៉ុន្តែមិនបានប៉ុន្មានក៏ត្រូវថៅកែដេញត្រលប់មកផ្ទះវិញទៀត ព្រោះគេធ្វើការយឺតយ៉ាវ។ ម្ដងនេះ ប្រពន្ធរបស់គេបានលួងលោមទៀតថា៖

“មនុស្សយើងធ្វើការមិនបានលឿនដូចគ្នាទេបង អ្នកផ្សេងគេធ្វើរាប់សិបឆ្នាំទៅហើយ ចំណែកបងធ្លាប់តែរៀន ចង់ទៅធ្វើឲ្យបានលឿនដូចគេម្ដេចនឹងកើត?”

រូបតំណាង

គេបានទៅធ្វើការងារច្រើនយ៉ាងទៀត ប៉ុន្តែលទ្ធផលក៏មិនសូវខុសគ្នា គឺបរាជ័យជាបន្តបន្ទាប់។ គ្រប់ពេលដែលជួបរឿងបែបនេះ ប្រពន្ធរបស់គេក៏ចេះតែលួងចិត្ត ដោយមិនដែលជេរស្ដី ឬចោទប្រកាន់អ្វីឡើយ។ លុះដល់គេអាយុជិត ៣០ឆ្នាំ ដោយសារមានសមត្ថភាពផ្នែកភាសា គេក៏ដាក់ពាក្យធ្វើជាជំនួយការគ្រូបង្រៀននៅសាលារៀនមួយ។ ក្រោយមក នៅពេលមានបទពិសោធន៍ផ្នែកបង្រៀនហើយ គេក៏ចេញមកបើកសាលារៀនផ្ទាល់ខ្លួន ហើយក្រោយមកទៀតក៏បានបើកហាងលក់ផលិតផលដែលធ្វើដោយជនពិការ ជាច្រើនសាខាទៀត។ ពីមនុស្សប្រុសម្នាក់ដែលមិនទទួលជោគជ័យក្នុងការងារ ពេលនេះគេបានក្លាយជាសេដ្ឋីបណ្ដើរៗបាត់ទៅហើយ។ លុះដល់ថ្ងៃមួយ គេក៏បានសួរប្រពន្ធថា៖

“សូម្បីតែខ្លួនបងផ្ទាល់ នៅតែមានអារម្មណ៍ថាខ្លួនរសាត់អណ្ដែតគ្មានគោលដៅ ហេតុអ្វីអូននៅតែជឿជាក់លើបង?”

ប្រពន្ធក៏ឆ្លើយតបថា៖

“ដីល្អ ប៉ុន្តែបើដាំស្រូវមិនបាន យើងគួរតែសាកដាំសណ្ដែក បើដាំសណ្ដែកមិនបាន យើងដាំឪឡឹក បើដាំឪឡឹកមិនបានទៀត យើងគួរតែសាកដាំផ្កា។ វាត្រូវតែមានគ្រាប់ពូជណាមួយដែលសក្ដិសមនឹងដីប្រភេទនេះ។ នៅពេលរកបានគ្រាប់ពូជដែលសក្ដិសមនឹងវាហើយ យើងនឹងទទួលបានផលល្អពេញចិត្ត”

ស្ដាប់ប្រពន្ធនិយាយចប់ហើយ គេក៏រលីងរលោងទឹកភ្នែក

“អរគុណអូនសម្រាប់ក្ដីស្រលាញ់ ក្ដីអត់ធ្មត់ និងការជឿជាក់ដែលមានចំពោះបង។ អូនគឺជាគ្រាប់ពូជដែលមានកម្លាំងខ្លាំងក្លា និងពូកែអត់ធ្មត់បំផុត។ បើគ្មានអូនជាកម្លាំងចិត្តរហូតមក បងក៏គ្មានថ្ងៃនេះដែរ”។

ប្រពន្ធនិយាយចុងក្រោយ៖ “លើលោកនេះ គ្មានអ្នកណាគ្មានប្រយោជន៍ទេបង គ្រាន់តែពេលខ្លះ យើងនៅខុសកន្លែង និងខុសពេលតែប៉ុណ្ណោះ” ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន