ស្វាមីល្អពិតតាមឱវាទព្រះពុទ្ធ ត្រូវមានគុណសម្បត្តិ ៥ប្រការនេះ

2018-04-27 07:51:29
ចំនួនមតិ 0 | ចំនួនចែករំលែក 0

មនុស្សស្រីទាំងឡាយ តែងប្រាថ្នាស្វែងរកបុរសណាដែលមានគុណសម្បត្តិគ្រប់គ្រាន់ដែលនាងអាចផ្ញើជីវិតបាន ព្រមទាំងកាន់ដៃគ្នាដើរទៅរហូត ទាំងពេលមានទុក្ខ និងមានសុខ។ ម្ល៉ោះហើយតួនាទីជាស្វាមីដ៏ល្អម្នាក់គឺត្រូវអាស្រ័យការទទួលខុសត្រូវ និងការអត់ធន់ខ្លាំង មិនចាញ់តួនាទីជាប្រពន្ធល្អនោះឡើយ។ ខាងក្រោមនេះគឺជាតួនាទីទាំង ៥របស់ស្វាមីល្អ តាមឱវាទព្រះពុទ្ធអង្គ៖

១. លើកតម្កើង ផ្ដល់កិត្តិយសភរិយា

ការលើកតម្កើង ផ្ដល់ការគោរពចំពោះភរិយាយ៉ាងបើកចំហក្នុងសង្គម ចាត់ទុកថាសំខាន់ណាស់សម្រាប់ភរិយា ព្រោះនារីភាគច្រើនមិនចង់ក្លាយជាប្រពន្ធបែបលួចៗលាក់ៗនោះទេ ប៉ុន្តែគឺចង់ឲ្យស្វាមីលើកតម្កើងយ៉ាងពេញមុខពេញមាត់ និងរំពឹងស្វាមីជាទីពឹងពាក់អាស្រ័យបាន។

២. មិនប្រមាថ

ការមិនប្រមាថទឹកចិត្តប្រពន្ធ មិនប្រមាថពូជពង្សវង្សត្រកូល រូបរាង សតិបញ្ញា ឬអ្វីផ្សេងៗរបស់ប្រពន្ធ ចាត់ទុកថារឿងដែលគួរប្រតិបត្តិបំផុត ពីព្រោះបើសិនមានការប្រមាថគ្នាហើយ គឺនឹងនាំឲ្យមានការអាក់អន់ស្រពន់ចិត្ត និងកំហឹង ហើយទីបំផុត នឹងធ្វើឲ្យនាងអស់ក្ដីស្រលាញ់ និងឈានដល់ការបែកបាក់គ្រួសារ។

៣. មិនក្បត់ចិត្ត

ការក្បត់ចិត្ត គឺជាការប្រព្រឹត្តខុសក្នុងផ្លូវកាម ទាំងការគិតក្នុងចិត្ត និងទង្វើដែលប្រព្រឹត្តទាំងឡាយ។ ទង្វើទាំងនេះចាត់ទុកថាជាការធ្វើបាបផ្លូវចិត្តភរិយាយ៉ាងធ្ងន់ធ្ងរ រហូតនាំឲ្យមានការឈ្លោះទាស់ទែង និងបាត់បង់អស់ភាពកក់ក្ដៅ និងក្ដីស្រលាញ់ក្នុងគ្រួសារ។ ផ្ទុយទៅវិញ បើប្ដីប្រពន្ធស្រលាញ់គ្នាស្មោះមួយទល់នឹងមួយនោះ ស្នេហានឹងដំណើរទៅដោយរលូន។

៤. ផ្ដល់ភាពជាធំក្នុងការចាត់ចែងការងារផ្ទះ

សង្គមខ្មែរតាំងពីបុរាណមានទម្លាប់ឲ្យភរិយាមើលថែចាត់ចែងការងារក្នុងផ្ទះជាចម្បង រួមទាំងការទទួលភ្ញៀវផ្សេងៗ ដែលគ្រប់គ្នាហៅថា “មេផ្ទះ”។ ចំណែកស្វាមីមាននាទីជួយទំនុកបម្រុងរឿងលុយកាក់ សម្រាប់ចំណាយនានាក្នុងផ្ទះ និងជួយនាងសម្រាប់ការងារធ្ងន់ៗ។

៥. ផ្ដល់អំណោយតាមឱកាស

ក្នុងឱកាសផ្សេងៗដែលជាថ្ងៃសំខាន់របស់គូជីវិត ដូចជាថ្ងៃកំណើត ថ្ងៃខួបអាពាហ៍ពិពាហ៍ ជាដើម ស្វាមីដែលល្អតែងតែមានអំណោយដែលជាទីចង់បានសម្រាប់មនុស្សស្រីទូទៅ ដូចជា គ្រឿងតែងខ្លួន សម្លៀកបំពាក់ ជាដើម។ ការផ្ដល់អំណោយដល់ប្រពន្ធគឺចាត់ទុកថាជាការធ្វើឲ្យចំណងស្នេហាកាន់តែរឹងមាំមួយចំណែកដែរ។

អានិសង្សសម្រាប់ស្វាមីដែលសង្គ្រោះភរិយា៖

១. ធ្វើឲ្យស្នេហាគង់វង្សយូរអង្វែង

២. ធ្វើឲ្យមានភាពសាមគ្គីក្នុងគ្រួសារ

៣. ធ្វើឲ្យគ្រួសារមានសេចក្ដីស្ងប់សុខ

៤. ធ្វើឲ្យទទួលបានការស្ញើចសរសើរ

៥. ជាគំរូល្អសម្រាប់អ្នកជំនាន់ក្រោយ ៕

ចុចអាន៖

ប្រភព៖ rugyim ប្រែសម្រួល៖ ស្វាយ វ៉ាន់ថន