ទម្លាប់កម្សាន្ត៧ ដែលធ្វើឲ្យខួរក្បាលអ្នកកាន់តែឆ្លាត ផ្អែកតាមការសិក្សាបែបវិទ្យាសាស្ត្រ

2018-01-15 02:04:38
ចំនួនមតិ 0 | ចំនួនចែករំលែក 0

អស់រយៈពេលជាច្រើនសតវត្សមកហើយ មនុស្សតែងជឿថាទេពកោសល្យ ប្រាជ្ញា គឺត្រូវបានប្រទានដោយព្រះជាម្ចាស់ ហើយក៏គ្មានវិធីផ្សេងដើម្បីកែប្រែ ឬតវ៉ាជាមួយធម្មជាតិដែរ។ មកដល់សព្វថ្ងៃនេះមនុស្សថែមទាំងអាចវាសកម្រិតឆ្លាតវៃ(IQ)របស់ខ្លួន ព្រមទាំងសត្វមួយចំនួនថែមទៀតផង។ ប៉ុន្តែដោយផ្អែកតាមការសិក្សាបែបវិទ្យាសាស្ត្រ ការពិតភាពឆ្លាតវៃរបស់មនុស្សអាចវិវត្តបាន ដរាបណាអ្នកព្យាយាមបង្កើនសមត្ថភាពវាតាមរយៈចំណង់ចំណូលចិត្ត៧យ៉ាងខាងក្រោម៖

១. លេងឧបករណ៍តន្ត្រី

ការឧស្សាហ៍លេងឧបករណ៍តន្ត្រី ជួយបង្កើនកម្រិតនៃការស្រមើស្រមៃ ការសង្កេតតាមដាន ទំនាក់ទំនង និងចំណេះដឹងផ្នែកគណិតសាស្ត្រជាដើម។ វាពិតជាផ្ដល់អត្ថប្រយោជន៍យ៉ាងខ្លាំង ដល់អំណាចក្នុងការចងចាំ មុខងារខួរក្បាល និងជំនាញក្នុងការអនុវត្តជាក់ស្ដែង។

២. ការអាន

វាសំដៅចំពោះការអានគ្រប់ប្រភេទ ដូចជារឿងប្រលោមលោក ឬសៀវភៅចំណេះដឹងផ្សេងៗជាដើម។ ការអានធ្វើឲ្យប្រព័ន្ធប្រសាទរបស់អ្នកស្ងប់ស្ងាត់ និងជួយសម្រួលអារម្មណ៍ឲ្យធូរស្រាល។ ខួរក្បាលអ្នកប្រមូលបានព័ត៌មានជាច្រើន របៀបដោះស្រាយបញ្ហានានា ព្រមទាំងយល់ពីមនុស្សកាន់តែច្បាស់ តាមរយៈការអាននេះ។

៣. ការហាត់ប្រាណទៀងទាត់

ការហាត់ប្រាណទៀងទាត់ ជួយបង្កើនការចងចាំ ការផ្ចង់អារម្មណ៍ និងការយល់ដឹងរបស់អ្នកឲ្យកាន់តែប្រសើរ។ ការអង្គុយនៅមួយកន្លែងយូរធ្វើឲ្យរាងកាយអ្នកស្ពឹកស្រពន់ ដូច្នេះការធ្វើចលនាឲ្យបានច្រើន មានគុណសម្បត្តិចំពោះសុខភាពទាំងរាងកាយខាងក្រៅ ព្រមទាំងខួរក្បាលទៀតផង។

៤. រៀនភាសាបរទេស

ការរៀនភាសាបរទេស ជួយឲ្យការចងចាំ និងសមត្ថភាពក្នុងការរៀបចំ បត់បែន របស់ខួរក្បាលអ្នករឹតតែល្អប្រសើរ។ មួយវិញទៀត ការងារជាច្រើនតម្រូវឲ្យអ្នកចេះយ៉ាងតិចពីរភាសា ដូច្នេះវាគឺជាគោលការណ៍ ឈ្នះឈ្នះដែលអ្នកមិនគួរមើលរំលងសោះឡើយ។

៥. រៀនបន្ថែមគ្រប់ពេល

អាយុច្រើនប៉ុណ្ណាក៏គ្មានបញ្ហាសម្រាប់ការសិក្សារៀនសូត្រដែរ ដោយតែអ្នកមានការប្ដេជ្ញាចិត្តគ្រប់គ្រាន់។ រក្សាកូនសៀវភៅតូចមួយជាប់ខ្លួន កត់ត្រាចំណេះដឹងសំខាន់ៗជារៀងរាល់ថ្ងៃដែលអ្នកគិតថាមានប្រយោជន៍ រួចកុំភ្លេចឧស្សាហ៍បើកអានវាឲ្យបានញឹកញាប់ផងដែរ។

៦. លំហាត់ប្រាណឲ្យខួរក្បាល

បើអ្នកចូលចិត្តធ្វើរឿងស្រួលៗ ដែលមិនសូវយកខួរក្បាលគិត នោះខួរក្បាលអ្នកក៏ស្ពឹកស្រពន់ មិនសូវគិតអ្វីឲ្យបានរហ័សរហួនដូចគ្នា។ ដូច្នេះអ្នកត្រូវព្យាយាមឲ្យវាហាត់ធ្វើការ ដោយការលេងល្បែងតេស្ដប្រាជ្ញាផ្សេងៗនៅពេលទំនេរ។ នៅពេលដែលខួរក្បាលរវល់ អ្នកក៏មិនសូវមានបញ្ហាជាមួយភាពតានតឹង ឬមួម៉ៅដែរ។

៧. ការសមាធិ

ការសមាធិធ្វើឲ្យអារម្មណ៍អ្នកស្ងប់ មូល ព្រមទាំងកាត់បន្ថយទម្លាប់មិនល្អមួយចំនួនដូចជា ការជះកំហឹង ឬភាពឆេវឆាវជាដើម។ មួយវិញទៀត អ្នកអាចអភិវឌ្ឍស្មារតីខ្លួនឯងឲ្យកាន់តែរឹងមាំ ដោយការសមាធិនេះ។ នៅពេលអ្នករឹងមាំផ្នែកអារម្មណ៍ ខួរក្បាលអ្នកក៏ដំណើរការល្អដូចគ្នា ៕

ចុចអាន៖

ប្រភព៖ dailypositiveinfo ប្រែសម្រួល៖ អូន បញ្ញា