ទម្លាយមូលហេតុ ៥នៃការគេងមមើដែលគ្រប់គ្នាតែងតែសង្ស័យ
- 2017-12-26 08:51:24
- ចំនួនមតិ 0 | ចំនួនចែករំលែក 0
ទម្លាយមូលហេតុ ៥នៃការគេងមមើដែលគ្រប់គ្នាតែងតែសង្ស័យ
ទម្លាប់គេងមមើត្រូវបានចាត់ទុកជាសកម្មភាពខុសប្រក្រតីមួយដែលកើតឡើងនៅពេលគេងលក់ ដោយយើងមិនដឹងខ្លួន។ អ្នកអាចមមើនិយាយនៅពេលកំពុងយល់សប្ដិ ហើយពេលខ្លះក៏អាចមានកាយវិការខ្លះៗចេញមក។
អានត្រឹមចំណុចនេះ ប្រិយមិត្តជាច្រើនអាចនឹងចាប់ផ្ដើមសង្ស័យខ្លួនឯងហើយថាធ្លាប់គេងមមើដែរ ឬក៏អត់។ ការពិតមនុស្សគ្រប់គ្នាគឺសុទ្ធតែធ្លាប់គេងមមើ ប៉ុន្តែភាគច្រើនគឺកើតឡើងលើមនុស្សប្រុស និងកូនក្មេងច្រើនជាងលើមនុស្សស្រី។ មូលហេតុនៃការមមើអាចបណ្ដាលមកពី៖
១. កត្តាខាងក្រៅ
ការស្ត្រេស ភាពសោកសៅ ការពិសាគ្រឿងស្រវឹង កើតគ្រុន និងការគេងលក់មិនបានគ្រប់គ្រាន់អាចធ្វើឲ្យអ្នកគេងមមើបាន ហើយបើអ្នកមានជំងឺស្រ្តេសក្រោយជួបប្រទះហេតុការណ៍ដែលប៉ះទង្គិចផ្លូវចិត្តខ្លាំង (Posttraumatic stress disorder - PTSD) ឱកាសដែលអ្នកនឹងគេងមមើគឺមានកាន់តែច្រើន។
២. តំណពូជ
ប្រសិនបើអ្នកមានសមាជិកគ្រួសារដែលមានប្រវត្តិគេងមមើញឹកញាប់ អ្នកក៏អាចកើតមានអាការបែបនេះដូចគ្នា។ បើអាណាព្យាបាលមានទម្លាប់គេងមមើកាលពីនៅក្មេង កូនៗអាចនឹងជួបប្រទះអាការដូចគ្នាដែរ។
៣. បញ្ហាពាក់ព័ន្ធនឹងការគេង
អ្នកអាចនឹងគេងមមើប្រសិនបើអ្នកមានជំងឺ ឬបញ្ហាដែលពាក់ព័ន្ធដល់ការគេង ដូចជាជំងឺឈប់ដកដង្ហើមពេលគេងលក់ អាការរវើរវាយពេលក្រោកពីគេង សុបិនអាក្រក់។ល។
៤. មានបញ្ហាផ្លូវចិត្ត
សម្រាប់មនុស្សអាយុចាប់ពី ២៥ឆ្នាំឡើងទៅ ការគេងមមើអាចមានទំនាក់ទំនងទៅនឹងបញ្ហាផ្លូវចិត្ត ដែលអាចបង្ហាញថាផ្លូវចិត្តរបស់អ្នកកំពុងស្ថិតក្នុងស្ថានភាពមិនប្រក្រតី។
៥. ញ៉ាំថ្នាំមួយចំនួន
ថ្នាំប្រភេទមួយចំនួនអាចធ្វើឲ្យអ្នកគេងមមើបាន ដូចជាថ្នាំប្រភេទ Montelukast ដែលប្រើសម្រាប់ព្យាបាលជំងឺហឺតជាដើម។
ការគេងមមើអាចមិនមានគ្រោះថ្នាក់ដល់ជីវិត ប៉ុន្តែយ៉ាងណាក៏ដោយ វាក៏រំខានដល់ការគេងរបស់អ្នក និងអ្នកដែលគេងជាមួយអ្នក។ ប្រសិនបើអ្នកគេងមមើរៀងរាល់យប់ ឬញឹកញាប់ខ្លាំងខុសពីធម្មតា អ្នកគួរសាកល្បងទៅប្រឹក្សាជាមួយគ្រូពេទ្យដើម្បីស្វែងរកដំណោះស្រាយ ៕