សីលធម៌បុគ្គលិកការិយាល័យ ៦ ចំណុច ដែលអ្នកត្រូវដឹង

2017-12-20 03:35:19
ចំនួនមតិ 0 | ចំនួនចែករំលែក 0

ធ្វើការជាមួយមនុស្សច្រើន មិនមែនជារឿងងាយស្រួលដូចអ្នកធ្វើការនៅផ្ទះម្នាក់ឯងនោះទេ។ ជម្លោះ ការខ្វែងគំនិត សង្គ្រាមត្រជាក់ បរាជ័យ អាចកើតឡើងគ្រប់ពេលប្រសិនអ្នកមិនចេះបត់បែន សម្របខ្លួន ឬរៀនសូត្រពីវិន័យចាំបាច់របស់បរិយាកាសកន្លែងធ្វើការនីមួយៗ។ តួយ៉ាង ខាងក្រោមនេះជាសីលធម៌ ៦ ចំណុច សម្រាប់បុគ្គលិកការិយាល័យ ដែលអ្នកដាច់ខាតត្រូវតែដឹង៖

១. កុំចូលរួមក្នុងការនិយាយដើមគេ

គេចមិនផុត កន្លែងធ្វើការណាក៏ដូចគ្នា តែងតែមានបណ្ដុំបុគ្គលិកស្និទ្ធស្នាលជាក្រុមៗ ចូលចិត្តនិយាយដើមគេ នៅពេលជួបជុំ។ ការចែករំលែករឿងចចាមអារ៉ាម ឬនិយាយអាក្រក់ពីអ្នកដទៃក្រោយខ្នង គឺជាទង្វើខុសឆ្គង ព្រមទាំងប៉ះពាល់ដល់វិជ្ជាជីវៈការងារ ដូច្នេះអ្នកគួរចៀសឲ្យឆ្ងាយ។

២. ប្រគល់បញ្ហាទៅបុគ្គលដែលពាក់ព័ន្ធ

អ្នកនឹងមិនចេះតែជួបមនុស្សដែលមានគំនិតដូចគ្នារហូតនោះទេ។ ពេលខ្លះ របៀបធ្វើការ ឬអត្តចរិតអ្នក អាចប៉ះទង្គិចជាមួយអ្នកផ្សេងទៀត។ ប៉ុន្តែអ្នកមិនត្រូវចងចិត្តគុំគួន ជាដាច់ខាត ត្រូវរក្សាភាពថ្លៃថ្នូរក្នុងវិជ្ជាជីវៈការងារ។ ព្យាយាមដោះស្រាយដោយសន្តិវិធី ឬប្រាប់ទៅថ្នាក់លើប្រសិនបើរឿងនោះហួសពីសមត្ថភាពរបស់អ្នក។

៣. ស្ម័គ្រចិត្តជួយគេ តាមតែអាចទៅរួច

ការធ្វើការជាក្រុម ទាមទារឲ្យមានការសហការ និងយកអសារគ្នាខ្លាំង ដើម្បីសម្រេចជោគជ័យរួម។ ប្រសិនអ្នកឃើញមិត្តរួមការងារកំពុងលើករបស់ធ្ងន់ៗ ច្រើន រយីងរយោង ឆាប់ទៅជួយគេទៅ។ ទម្លាប់ខ្លួនជាមនុស្សដែលមានទឹកចិត្តបែបនេះ ទោះទៅធ្វើការនៅទីណាក៏មិនខ្វះអ្នកចូលចិត្តដែរ។

៤. យកចិត្តទុកដាក់គ្រប់ពេល

នៅពេលអ្នកកំពុងរវល់ ហើយស្រាប់តែមានអ្នកណាម្នាក់មកនិយាយជាមួយ អ្នកអាចបែកអារម្មណ៍ ដោយគ្រាន់តែស្ដាប់ ឬយល់ព្រមតាមបែបឥតខ្វល់។ វាពិតជាខុស អ្នកគួរឲ្យតម្លៃ និងយកចិត្តទុកដាក់រាល់សម្ដី ឬកិច្ចសន្ទនាជាមួយមនុស្សជុំវិញ។ បើអាចអ្នកគួរសុំឲ្យគាត់មកនិយាយម្ដងទៀតក្រោយពេលអ្នករួចដៃ។

រូបតំណាង

**៥. ជួយលើកទឹកចិត្តគ្នា**

នៅពេលអ្នកឃើញមិត្តរួមការងារកំពុងកើតទុក្ខ អារម្មណ៍មិនល្អ ឬព្រួយបារម្ភជាមួយរឿងអ្វីមួយ អ្នកគួរជួយនិយាយលួងលោម ឬនៅក្បែរ ផ្ដល់កម្លាំងចិត្តពេលគេត្រូវការ។ ធ្វើការជាក្រុមប្រាកដជារីករាយ ប្រសិនម្នាក់ៗមានភាពស្និទ្ធស្នាល និងស្រឡាញ់គ្នាបែបនេះ។

៦. តែងតែនិយាយជាមួយបុគ្គលិកថ្មី

កុំភ្លេច ត្រូវឧស្សាហ៍សួរនាំ ជជែកលេង ជាមួយបុគ្គលិកថ្មីៗ ឲ្យបានច្រើន នៅអាទិត្យដំបូងរបស់ពួកគេ។ ទង្វើនេះជួយឲ្យពួកគេ សប្បាយចិត្ត រីករាយ មិនឯកា កណ្ដោចកណ្ដែង ព្រមទាំងធ្វើឲ្យអ្នកឆាប់ស្គាល់ពួកគេរឹតតែច្បាស់៕

ចុចអាន៖៦សញ្ញាបង្ហាញថាអ្នកជាមនុស្សរឹងមាំខ្លាំង រហូតធ្វើឲ្យអ្នកដទៃខ្លាច

ប្រភព៖ Careergirldaily ប្រែសម្រួល៖ អូន បញ្ញា