សញ្ញាណបញ្ជាក់ថា ស្បែកអ្នកកំពុងអាលែកហ្ស៊ីគ្រឿងសម្អាងហើយ

2017-09-01 04:50:33
ចំនួនមតិ 0 | ចំនួនចែករំលែក 0

ប្រតិកម្មពីគ្រឿងសម្អាងកើតឡើងមិនមែនអាស្រ័យតាមបរិមាណដែលអ្នកប្រើនោះទេ តែវាអាស្រ័យលើធាតុផ្សំនៃគ្រឿងទាំងនោះ និងការប្រើជាប្រចាំរបស់អ្នក។ ដូច្នេះទោះបីប្រើក្នុងបរិមាណតិចតួចក៏ដោយ ក៏វាអាចប៉ះពាល់ស្បែកអ្នកបានដែរ បើគ្រឿងសម្អាងទាំងនោះមិនមានគុណភាព ឬមិនត្រូវនឹងស្បែករបស់អ្នក។ ខាងក្រោមនេះ គឺជាអាការៈមួយចំនួនដែលបញ្ជាក់ថា ស្បែករបស់អ្នកកំពុងមានបញ្ហាជាមួយគ្រឿងសម្អាងដែលអ្នកប្រើរាល់ថ្ងៃហើយ។

១- ឡើងមុន៖

នេះជារោគសញ្ញាដែលឆាប់មើលឃើញជាងគេ ជាពិសេសសម្រាប់ស្បែកដែលងាយរងប្រតិកម្ម។ គ្រឿងសម្អាងដែលមានគុណភាពទាប ឬមិនមានម៉ាកយីហោត្រឹមត្រូវតែងមានផ្ទុកជាតិគ្រីមក្រាសដែលធ្វើឱ្យស្ទះរន្ធញើស បង្កជាបាក់តេរី ងាយឆ្លងរោគ ស្បែកទៅជាហើម និងរលាក។

២- ស្បែកឡើងក្រហម រលាក៖

បើស្បែករបស់អ្នកផ្លាស់ប្ដូរពីការឡើងមុន រហូតទៅជារលាកក្រហម វាបង្ហាញថា ស្បែករបស់អ្នកកំពុងរងប្រតិកម្មធ្ងន់ធ្ងរហើយ។ បើនៅតែមិនចាប់អារម្មណ៍ និងព្យាបាលឱ្យទាន់ពេលទេ វានឹងបង្កទៅជាមេរោគឆ្លងលើស្បែកកាន់តែធ្ងន់ទៅៗ។

៣- ស្បែកមុខចាស់ៗ៖

ការប្រើគ្រឿងសម្អាងថោកៗ ឬមិនមានគុណភាពរយៈពេលយូរ វានឹងបណ្ដាលឱ្យស្បែកមុខរបស់អ្នកប្រែទៅជាជ្រីវជ្រួញ គ្មានសំណើម ឬឡើងអាចម៍រុយ។

៤- ករណីកាន់តែធ្ងន់ធ្ងរ៖

ក្រៅពីស្ថានភាពទាំង៣ខាងលើ បើស្បែកអ្នកមានបញ្ហាធ្ងន់ធ្ងរព្រោះគ្រឿងសម្អាង វានឹងឡើងទៅជាកន្ទួលក្រហម ហើម ពេលខ្លះបណ្ដាលឱ្យរកកលក្អួតចង្អោរ ពិបាកដកដង្ហើមក៏មាន។ បើមិនបានព្យាបាលទាន់ពេលទេ វានឹងប៉ះពាល់ដល់សរីរាង្គផ្សេងទៀតជាមិនខាន។

វិធីបង្ការនិងព្យាបាល

ប្រតិកម្មស្បែកទោះតិចឬច្រើន វានឹងធ្វើឱ្យខូចកោសិកាស្បែក ហើយអាចប៉ះពាល់សុខភាព។ ដូច្នេះបើអ្នកកំពុងមានបញ្ហាដូចខាងលើ គួរសាកល្បងវិធីការពារនិងព្យាបាលដូចខាងក្រោមនេះ៖

បញ្ឈប់ការប្រើគ្រឿងសម្អាងទាំងនោះ ហើយលាងមុខដោយប្រើទឹកស្អាតជាប្រចាំ ដើម្បីបណ្ដេញសារធាតុមិនល្អទាំងឡាយពីស្បែក និងការពារកុំឱ្យកើតឡើងវិញ។
ក្នុងអំឡុងពេលនេះ អ្នកគួរញ៉ាំបន្លែ ផ្លែឈើ និងផឹកទឹកឱ្យបានច្រើន កំណត់បរិមាណស្ករក្នុងចំណីអាហារ និងហាមយកដៃទៅប៉ះស្បែកដែលកំពុងមានបញ្ហានោះ។
មុននឹងទិញគ្រឿងសម្អាងមកប្រើ គួរតេស្តនៅលើស្បែកក្រោមកដៃជាមុនសិន។ បើស្អែកឡើង មិនមានបញ្ហារមាស់ ឬប្រតិកម្មអ្វីទេ អ្នកអាចសម្រេចចិត្តទិញផលិតផលនោះមកប្រើលើផ្ទៃមុខបាន។
គួរទិញផលិតផលណាដែលមានស្លាកយីហោត្រឹមត្រូវ និងមានគេស្គាល់ច្រើន ហើយពិនិត្យឱ្យបានច្បាស់នូវសារធាតុផ្សំដែលប្រាកដថាមិនប៉ះពាល់ដល់ស្បែក៕

ចុចអាន៖

ប្រភព៖ womentribe ប្រែសម្រួល៖ សរ សុគន្ធី