ការដែលមិនបានជួបជុំមិត្តភក្តិ ដៃគូសង្សារឬក្រុមគ្រួសារ ការខកខានមិនបានប្រកបមុខរបររកស៊ី ទំនាក់ទំនងការងារក៏មិនមាន ហើយការជួបប្រាស្រ័យទាក់ទងគ្នាប្រចាំថ្ងៃនៅក្នុងសង្គមក៏ត្រូវបានកាត់ផ្ដាច់ចេញទៀតដែលវាជាមូលហេតុធ្វើឲ្យអ្នកមានភាពស្មុគស្មាញ និងឈានទៅរកបញ្ហាស្ត្រេស។

ទាំងនេះដោយសារជំងឺរាតត្បាត កូវីដ-១៩ ដែលបានបង្កឲ្យមានបញ្ហាជាច្រើននៅក្នុងជីវិតរស់នៅ ហើយវាធ្វើឲ្យមនុស្សភាគច្រើនសព្វថ្ងៃនេះទទួលរងជំងឺស្ត្រេសយ៉ាងខ្លាំង។ នៅពេលដែលអ្នកមានអារម្មណ៍ស្ត្រេសកាន់តែយូរ វានឹងវិវត្តទៅជាជំងឺធ្លាក់ទឹកចិត្តដ៏ធ្ងន់ធ្ងរ ហើយអ្នកនឹងមានអារម្មណ៍ថាជីវិតហាក់ដូចជាគ្មានន័យអ្វីសោះសម្រាប់អ្នក។

បើអ្នកមានអារម្មណ៍ថាស្ត្រេសជាញឹកញាប់នោះសូមកុំបណ្ដោយឲ្យសោះ តែគួរធ្វើរឿងទាំង ៦ យ៉ាងនេះដើម្បីចៀសផុតពីអារម្មណ៍ស្ត្រេស និងទទួលបានភាពសប្បាយចិត្តមកវិញ៖

១. ការចំណាយពេលជាមួយមនុស្សជាទីស្រឡាញ់ មិត្តភក្តិឬក្រុមគ្រួសារ

២. គួរសម្រាកពីប្រព័ន្ធបណ្ដាញសង្គម ហើយប្ដូរទៅធ្វើសកម្មភាពអ្វីដែលអ្នកចូលចិត្ត (ការដើរចេញខាងក្រៅ ឬការជិះកង់ជាដើម)

៣. ការស្ដាប់ ឬការបើកបទចម្រៀងដែលអ្នកចូលចិត្តស្ដាប់ឲ្យលឺនៅក្នុងផ្ទះឬបន្ទប់របស់អ្នក

៤. ការនិយាយអំពីអារម្មណ៍របស់អ្នកចេញប្រាប់ទៅកាន់នរណាម្នាក់ដែលអ្នកទុកចិត្តដើម្បីឲ្យអារម្មណ៍បានធូរស្បើយ

៥. ប្រសិនជាអាច ការសម្រាកលំហែកាយនៅកន្លែងធម្មជាតិៗក៏អាចជួយបានច្រើនដែរ

៦. ហើយអ្នកត្រូវធ្វើការរំលឹកខ្លួនឯងថាបញ្ហាស្ត្រេសវាមិនមែនជាភាពអចិន្ត្រៃយ៍ឡើយ

ប្រសិនបើភាពស្មុគស្មាញនៃអារម្មណ៍របស់អ្នកមិនបានល្អប្រសើរឡើងទេ ហើយអ្នកនៅតែមានអារម្មណ៍ថាមានភាពតានតឹងនឹងពិបាកចិត្តខ្លាំងនោះ អ្នកគួរតែធ្វើការស្វែងយល់អំពីមូលហេតុចម្បងដែលកំពុងជះឥទ្ធិពលដល់អ្នក។ ការរៀនគ្រប់គ្រងភាពតានតឹងទាំងនោះជាមួយវិធីខាងលើ និងការស្វែងរកជំនួយបន្ថែមទៀតក៏ជាវិធីដែលអាចបញ្ចៀសអ្នកពីការកើតជំងឺស្ត្រេសបានដែរ៕

ប្រភពរូបភាព៖ Pinterest

ចុចអានបន្ត៖

• ហេតុផល ៥ យ៉ាងដែលស្ត្រេសអាចជះឥទ្ធិពលដល់ផ្នែកហិរញ្ញវត្ថុរបស់អ្នកបាន
• រូបមន្ត ៤ យ៉ាងដើម្បីធ្វើឲ្យខ្លួនឯងសប្បាយចិត្ត