ការបែកបាក់គ្នាគឺជារឿងដ៏សែនឈឺចាប់បំផុត ប៉ុន្តែអ្វីដែលកាន់តែឈឺចាប់ជាងនោះទៅទៀតគឺការនឹងឃើញរឿងរាវដែលអ្នកទាំងពីបានកសាងជាមួយគ្នា ការសន្យាជាមួយគ្នា តែអ្វីៗទាំងអស់នោះបានប្រែក្លាយទៅជាទទេស្អាត និងបានធ្វើឲ្យបេះដូងរបស់អ្នកបែកប្រេះស្រាំទៅជាចំណិតៗដែលសឹងតែមិនអាចជួសជុលបាន។

ពេលដែលកំពុងជួបបញ្ហានេះអ្នកប្រហែលជាបានគិតថា មានតែអ្នកទេដែលយល់ ដែលបានស្គាល់ពីរស់ជាតិនៃការឈឺចាប់នោះ តែមានមនុស្សច្រើនណាស់ដែលបានឆ្លងកាត់រឿងនេះដែរ។ ហើយវាមិនមែនងាយស្រួលនោះទេក្នុងការព្យាបាលនៃការឈឺចាប់ទាំងនោះ ជាពិសេសគឺការចង់បំភ្លេចវាចោល។

ប៉ុន្តែវិធីទាំងនេះអាចជួយឲ្យអ្នកកាត់បន្ថយការឈឺចាប់នឹងបំភ្លេចវាចោលបានបន្តិចម្តងៗ៖

• ផ្តល់ពេលវាលាឲ្យបានច្រើន គឺច្រើនមែនទែនដើម្បីព្យាបាលខ្លួនឯង
• ព្យាយាមគិតតែទៅលើភាពវិជ្ជមាន និងផ្តោតទៅលើសុខភាពផ្លូវកាយ ផ្លូវចិត្តខ្លួនឯងឲ្យបានច្រើន
• ចេញក្រៅដើរលេងឲ្យបានញឹកញាប់ មិនថាជិតៗ ឬឆ្ងាយ
• បរិច្ចាគអ្វីៗដែលរំលឹកអំពីគាត់ចោលទៅកាន់អ្នកក្រីក្រ
• ផ្តាច់ទំនាក់ទំនងគ្រប់បណ្តាញជាមួយគាត់សិន រហូតដល់អ្នកបានជាសះស្បើយចាំក្លាយជាមិត្តភក្តិនឹងគ្នាវិញ
• ចំណាយពេលជាមួយគ្រួសារនឹងមិត្តភក្តិឲ្យបានច្រើននិយាយអំពីរឿងសប្បាយៗ តែព្យាយាមកុំឲ្យពួកគាត់សួរអំពីរឿងអតីត
• ទទួលស្គាល់ថាវាជាទំព័រមួយនៃមេរៀនជីវិតរបស់អ្នក ហើយកុំធ្វើបាបខ្លួនឯងឲ្យសោះទៅលើរឿងអ្វីក៏ដោយ
• ត្រូវតែអត់ទោសឲ្យខ្លួនឯង និងបំភ្លេចអតីតរបស់អ្នកចោល តែស្រឡាញ់ខ្លួនឯងឲ្យបានច្រើនៗវិញ

ហើយរឿងដែលអ្នកមិនគួរធ្វើវិញនោះគឺកុំព្យាយាមបន្ទោសខ្លួនឯងថា មិនគួរធ្លាក់ខ្លួនជឿជាក់ស្នេហ៍ស្មោះលើគេ និងរឹតតែកុំគិតថាអ្នកល្ងង់ដែលមិនស្គាល់ពីធាតុពិតរបស់គេ។ កុំឲ្យសោះចំណាយពេលមើល ឬរំលឹកអនុស្សាវរីយ៍ប្រសិនបើអ្នកនៅមានអារម្មណ៍ស្រឡាញ់គេនៅឡើយនោះ។ អ្វីដែលសំខាន់នោះគឺកុំអាលធ្វើការណាត់ជួបអ្នកថ្មីលឿនពេក និងកុំធ្វើការតាមដានពីជីវិតរបស់គេឲ្យសោះ ពីព្រោះវាជាមូលហេតុដែលធ្វើឲ្យអ្នកកាន់តែមានការឈឺចាប់លើសដើម និងរឹតតែមិនអាចធ្វើការបំភ្លេចគេនឹងមិនអាចឈានដើរទៅមុខសម្រាប់ថ្ងៃអនាគតរបស់ខ្លួនឯងបាន។

ប្រភពរូបភាព៖ Freepik

ចុចអានបន្ត៖

• វិធីដោះស្រាយបើដៃគូមិនសូវចេះភាពផ្អែមល្ហែម
• ធ្វើយ៉ាងណាបើគ្រួសារមិនទទួលស្គាល់ដៃគូរបស់អ្នក