ភរិយាវៃឆ្លាត ស្វាមីស្រលាញ់ទ្វេដងបើចេះនិយាយពាក្យទាំងនេះដាក់គាត់

2020-08-02 10:00:00
ចំនួនមតិ 0 | ចំនួនចែករំលែក 0

ទោះនេះមិនមែនជាអ្វីដែលស្វាមីសុំឲ្យអ្នកនិយាយ ប៉ុន្តែនៅក្នុងចិត្តគាត់ប្រាកដជាគិតថា បើបានឮពាក្យពេចន៍ទាំងនោះចេញពីមាត់ប្រពន្ធមិនដឹងជាសប្បាយយ៉ាងណាទេ។ ហេតុនេះហើយក្នុងនាមជាភរិយាដ៏ឧត្ដម វៃឆ្លាតមួយរូប អ្នកត្រូវចេះពីរបៀបនិយាយឲ្យបានល្អទៅកាន់ស្វាមី នោះក្តីស្រលាញ់នឹងកើនឡើងទ្វេដង។

១. អូនមានមោទនភាពចំពោះបង

ពេលការងារជោគជ័យការសប្បាយចិត្តវាជារឿងធម្មតា ហើយបើប្រពន្ធចេះនិយាយមួយឃ្លានេះទៀត បេះដូងប្តីនឹងលោតញាប់មិនខាន។

២. អូនសប្បាយចិត្តពេលឃើញបងមកដល់ផ្ទះវិញ

អ្នកមិនចាំបាច់និយាយរាល់ថ្ងៃក៏បាន ប៉ុន្តែត្រូវចេះបង្ហាញភាពរីករាយ ដើម្បីបញ្ជាក់ថាអ្នកត្រេកអរពេលឃើញគាត់មកដល់ផ្ទះវិញ។ បែបនេះស្វាមី លែងគិតចង់ទៅណា ក្រៅពីឆាប់ត្រលប់មកផ្ទះ ព្រោះដឹងថាមានប្រពន្ធនៅរង់ចាំ។

៣. អូនទុកចិត្តបង ជឿជាក់ថាបងអាចធ្វើបាន កុំបារម្ភអី អូនគាំទ្របងជានិច្ច

គ្មានអ្វីប្រសើរជាង ពេលជួបឧបសគ្គហើយ មានមនុស្សដែលខ្លួនស្រលាញ់នៅចាំជួយលើកទឹកចិត្តគ្រប់ពេលវេលាទៀត។ វាជាគ្រឹះដ៏រឹងមាំនៃកម្លាំងចិត្ត ដែលពិបាករកបាន។

៤. នៅក្បែរបង អូនលែងបារម្ភពីរឿងសុវត្ថិភាព

ពេលបណ្ដើរគ្នា នៅតាមដងផ្លូវជាមួយកូនៗ ឬឆ្កែ ជាលក្ខណៈគ្រួសារដ៏តូចមួយ គាត់នឹងធ្វើជាអង្គរក្សការពារសម្រាប់អ្នក និងគ្រួសារទាំងមូល ដើម្បីឲ្យអ្នកជឿជាក់ថាមានសុវត្ថិភាពពេញលេញពេលនៅក្បែរគាត់។

៥. អូនសុំទោស

ប្រសិនបើអ្នកគិតថាវាជាកំហុសរបស់ខ្លួនឯងមែន គួរហ៊ានទទួលស្គាល់ការពិត កុំខ្លាចអន់។ ធ្វើបែបនេះប្តីរបស់អ្នកក៏ចេះទទួលស្គាល់កំហុស និងសុំទោសវិញដូចគ្នាពេលដែលគាត់ធ្វើខុស។ ជីវិតប្តីប្រពន្ធគ្មានឈ្នះចាញ់ទេ មានតែការយោគយល់អធ្យាស្រ័យទៅវិញទៅមក។

៦. អូនពិតជាមានសំណាងមែន ដែលបានបងជាប្តី

ពេលបានរៀបការជាមួយប្តីល្អ ហេតុអីមិនហ៊ាននិយាយបង្ហាញប្រាប់ឲ្យគាត់បានដឹងផង ថាអ្នកពិតជាមានសំណាង ហើយក៏មិនស្តាយក្រោយ ដែលបានរៀបការជាមួយគាត់។