តិចនិក ៦ យ៉ាង ជួយឲ្យស្រីៗកាត់ចិត្តបានលឿនពីស្នេហាដែលទើបបាត់បង់ថ្មីៗ

2020-06-23 04:50:00
ចំនួនមតិ 0 | ចំនួនចែករំលែក 0

ការបែកបាក់គ្នាជាមួយមនុស្សដែលយើងកំពុងស្រឡាញ់មិនមែនជារឿងលេងសើចនោះទេ។ វាអាចធ្វើឲ្យភាគីទាំងសងខាងឈឺចុកចាប់ខ្លាំង ជាពិសេសសម្រាប់ភាគីដែលនៅស្រឡាញ់គេខ្លាំង។ ជាធម្មតា ក្នុងទំនាក់ទំនងស្នេហាមួយ អ្នកដែលនៅគឺជាភាគីដែលតែងទទួលរងនូវការឈឺចាប់ខ្លាំង និង ក្នុងរយៈពេលយូរជាងអ្នកសម្រេចចិត្តថាទៅ មិនថាជាមូលហេតុអ្វីក៏ដោយ ព្រោះពួកគេមិនបានត្រៀមចិត្តទុកជាមុនទាល់តែសោះ។ ដូច្នេះ បើអ្នកកំពុងតែជួបប្រទះនូវវិបត្តិស្នេហ៍មួយនេះ គប្បីដឹងពីវិធីសាស្រ្ដ ៦ យ៉ាង ដើម្បីឲ្យកាត់ចិត្តបានលឿនពីស្នេហាដែលបញ្ចប់ទៅក្នុងមួយពព្រិចភ្នែកនេះ៖

រូបតំណាង

**១. ឈប់សួររកហេតុផល៖** បើសុខៗគេដើរចេញទៅទាំងគ្មានហេតុផលច្បាស់លាស់សូម្បីបន្តិច នោះអ្នកប្រាកដជានៅមិនសុខហើយទាមទារសួររកហេតុផលពីគេជាមិនខាន។ រឿងម៉្យាងដែលអ្នកគួរដឹងនោះគឺ អ្វីគ្រប់យ៉ាងមិនមែនជាកំហុសរបស់អ្នកឡើយ។ ការសម្រេចចិត្តរបស់គេជាអ្វីដែលគេបានត្រៀមទុកយូរមកហើយ។ ហេតុដែលគេមិនប្រាប់ហេតុផលមួយនោះដល់អ្នកអាចមកពីវាជាហេតុផលដ៏គ្មានប្រយោជន៍បំផុត ឬ គេមានចិត្តប្រែប្រួលតែម្ដង។ ដូច្នេះហើយ ល្មមហើយដែលអ្នកឈប់បន្ទោសខ្លួនឯង ឬ ចង់ដឹងហេតុផលពីការចាកចេញរបស់គេម្នាក់នោះ។

២. ផ្ដាច់ការទាក់ទង៖ មិនថា ហ្វេសប៊ុក ឬ លេខទូរសព្ទរបស់គេ យកល្អអ្នកគួរលុបចោលឲ្យអស់ ហើយផ្ដាច់ចោលនូវរាល់ការទាក់ទងគ្នាតែម្ដង ព្រោះវានាំឲ្យអ្នកនឹកដល់គេ និង ឈឺឥតល្ហែជាមិនខាន។

រូបតំណាង

៣. ទទួលស្គាល់កំហុសឆ្គង៖ ដល់ពេលនេះហើយភាគីទាំងសងខាងចាំបាច់ចេះទទួលស្គាល់នូវកំហុសរៀងៗខ្លួន មិនទម្លាក់កំហុសដាក់គ្នា និង ព្យាយាមបើកចិត្តដើម្បីទទួលយកការពិតមួយនេះ។ ជាក់ស្ដែង វាពិតជាពិបាកនឹងទទួលយកតែមកដល់ចំណុចនេះ ម្នាក់ៗគួរចាត់ទុកថាអ្នកទាំងពីរអស់និស្ស័យត្រឹមនេះទៅចុះ។

៤. យំបន្ធូរអារម្មណ៍៖ គ្មានអ្នកណាដែលមិនពិបាកចិត្តនោះទេពេលបាត់បង់មនុស្សដែលខ្លួនស្រឡាញ់។ ដូច្នេះមិនបាច់ខ្លាចគេមើលមកទន់ជ្រាយឡើយ! បើចង់យំ យំឲ្យអស់ចិត្តទៅ នោះអ្នកនឹងមានអារម្មណ៍ធូរស្បើយ។ តែពេលយំរួចហើយ ជូតទឹកភ្នែកចេញឲ្យស្អាត រួចធ្វើខ្លួនឲ្យល្អប្រសើរជាងមុន និង រឹងមាំបន្តទៀត។

រូបតំណាង

៥. ពិភាក្សាជាមួយមនុស្សជិតស្និទ្ធ៖ រកមនុស្សដែលអ្នកទុកចិត្តបំផុតហើយនិយាយប្រាប់ពួកគេឲ្យធូរចិត្តទៅ មិនថាជាពួកម៉ាក បងប្អូន ឬ មិត្តរួមការងារក្ដី។ នៅក្នុងស្ថានភាពបែបនេះ អ្នកមិនគួរបណ្ដោយឲ្យខ្លួនឯងនៅម្នាក់ឯងឡើយ គឺត្រូវស្វែងរកមនុស្សជាទីស្រឡាញ់ទាំងនោះដើម្បីនិយាយរឿងក្នុងចិត្តប្រាប់ដល់គេ និង យកយោបល់ល្អៗពីគេផងដែរ។

៦. យកចិត្តទុកដាក់លើខ្លួនឯង៖ បើអ្នកធ្លាប់មានចិត្តប្រាថ្នាចង់ធ្វើអ្វីមួយហើយមិនទាន់បានសម្រេច នោះវាជាឱកាសដ៏ល្អសម្រាប់អ្នកហើយ។ អ្នកអាចប្រើប្រាស់វេលានេះ សម្រាប់កសាងនិងអភិវឌ្ឍខ្លួនឯងឲ្យល្អប្រសើរ និង សម្រេចនូវក្ដីស្រម៉ៃរបស់ខ្លួន។ លើសពីនេះ ងើបពីគេង តែងខ្លួនឲ្យស្អាតៗ ញញឹមស្រស់ស្រាយគ្រប់ពេល។នៅពេលនោះ មិនខ្វះឡើយបុរសល្អៗដែលឈានចូលមកក្នុងជីវិតអ្នកដោយឯកឯង ហើយពេលនោះសង្សារចាស់របស់អ្នកអាចនឹងត្រឡប់មកវិញក៏ថាបាន៕