៦ យ៉ាង មនុស្សស្រីចាស់ទុំតែងជៀសវាង មិនថាក្នុងកាលៈទេសៈណាក៏ដោយ
- 2020-06-22 06:00:00
- ចំនួនមតិ 0 | ចំនួនចែករំលែក 0
៦ យ៉ាង មនុស្សស្រីចាស់ទុំតែងជៀសវាង មិនថាក្នុងកាលៈទេសៈណាក៏ដោយ
បើនិយាយពីភាពចាស់ទុំ មិនមែនគ្រប់គ្នាសុទ្ធតែកើតមកមាននោះឡើយគឺវាតម្រូវឲ្យម្នាក់ៗទទួលបាននូវបទពិសោធន៍ផ្ទាល់ពីការឆ្លងកាត់រឿងជាច្រើននៅក្នុងឆាកជីវិត។ ភាពចាស់ទុំនឹងមកដោយឯកឯងនៅពេលដែលអ្នកចេះគ្រប់គ្រងស្ថានភាពនានាដោយមិនយកអារម្មណ៍មួយឆាវមកដោះស្រាយ។ ដូច្នេះ តើមនុស្សស្រីដែលមានភាពចាស់ទុំតែងដោះស្រាយបញ្ហាដោយរបៀបណា? មកដឹងពី ៦ យ៉ាងដែលពួកគេមិនដែលធ្វើ ទោះស្ថិតក្នុងកាលៈទេសៈបែបណាក៏ដោយ៖
**១. ពួកគេមិនដែលបៀមទុក្ខយូរឡើយ៖** មនុស្សដែលមានគំនិតចាស់ទុំតែងបែងចែកអារម្មណ៍បានច្បាស់លាស់ ព្រោះពួកគេដឹងថាវាគ្រាន់តែជាអារម្មណ៍មួយពេល។ ដូច្នេះពួកគេមិនគិតច្រើនពេកពីបញ្ហានោះឡើយ គេតែងគិតថាអ្វីៗនឹងល្អប្រសើរឡើងវិញ។
២. ពួកគេមិនត្រូវការភាពរីករាយគ្រប់ពេលឡើយ៖ មនុស្សស្រីដែលធ្លាប់បានឆ្លងកាត់រឿងច្រើនក្នុងជីវិតមិនទាមទារភាពសប្បាយរីករាយគ្រប់ពេលនោះទេ ព្រោះគេដឹងច្បាស់ថាគ្មានអ្វីទៀងទាត់ឡើយនៅក្នុងឆាកជីវិត។ ជាការពិត ថ្ងៃខ្លះអ្នកសប្បាយរីករាយខ្លាំង ថ្ងៃខ្លះទៀតអ្នកនឹងជួបទុក្ខលំបាក ហើយទាំងនេះសុទ្ធសឹងជារឿងធម្មតាដែលកើតឡើងចំពោះមនុស្សគ្រប់រូប។
៣. ពួកគេមិនបិទបាំងអារម្មណ៍ពិតខ្លួនឯងឡើយ៖ នៅពេលដែលនារីមានការគិតទូលំទូលាយ នាងនឹងបង្ហាញចេញនូវអារម្មណ៍ពិតរបស់ខ្លួនគ្រប់ពេល មិនថាក្នុងស្ថានភាពបែបណាឡើយ។ បន្ថែមពីនេះ នាងក៏មិនចេះលាក់អារម្មណ៍ពិតរបស់ខ្លួនដែរ ព្រោះនាងដឹងថាការធ្វើបែបនេះគឺហាក់បីដូចជាការក្បត់នឹងសតិខ្លួនឯង។
៤. ពួកគេមិនខ្លាចរអានឹងភាពបរាជ័យ និង កំហុសឆ្គង៖ មនុស្សមួយចំនួនធំច្រើនមិនអាចទទួលស្គាល់នូវកំហុស ក៏ដូចជាបរាជ័យរបស់ខ្លួនផ្ទាល់។ តែចំពោះមនុស្សស្រីដែលមានភាពចាស់ទុំ ពួកគេតែងយកកំហុសនិងបរាជ័យជាមេរៀនជីវិតសម្រាប់ថ្ងៃមុខ ព្រោះពួកគេគិតថាភាពជោគជ័យពិតប្រាកដនឹងលេចចេញជាបណ្ដើរដរាបណាគេចេះទទួលស្គាល់នូវភាពខ្វះខាតរបស់ខ្លួន។
៥. ពួកគេមិនសូវឆ្លើយតបនូវគ្រប់រឿងរ៉ាវដែលកើតឡើងនោះទេ៖ នៅពេលដែលអ្នកចាប់ផ្ដើមមានភាពចាស់ទុំ អ្នកប្រាកដជាដឹងថាមានរឿងខ្លះមិនត្រូវការការឆ្លើយតបអ្វីទាំងអស់។ ជាពិសេស នៅពេលមាននរណាម្នាក់ ឬ មានរឿងអ្វីមួយដែលមិនសមបំណង គំនិតចាស់ទុំរបស់អ្នកច្បាស់ជាបង្ហាត់ឲ្យអ្នករៀនសង្កេតពីចម្ងាយដោយមិនបាច់មានការឆ្លើយតប ឬ បញ្ចេញនូវសកម្មភាពអ្វីទាល់តែសោះ។
៦. ពួកគេចេះគ្រប់គ្រងអារម្មណ៍របស់ខ្លួន៖ អារម្មណ៍មិនមែនជារឿងអាក្រក់ទាំងអស់ឡើយ។ ពេលខ្លះវាបង្រៀនឲ្យអ្នកស្គាល់ខ្លួនឯងបានច្រើនជាងមុន ហើយធ្វើឲ្យអ្នកចេះគ្រប់គ្រងស្ថានភាពពបានល្អជាងមុន។ យ៉ាងណាមិញ វាតម្រូវឲ្យអ្នកចេះប្រើប្រាស់អារម្មណ៍ខ្លួនឯងឲ្យបានត្រឹមត្រូវទៅតាមកាលៈទេសៈ មិនមែនចេះតែបញ្ចេញវាផ្ដេសផ្ដាសនោះឡើយ៕
ចុចអានបន្ត៖ កុំធ្វេសប្រហែស! មកដឹង ៦ សញ្ញាបង្ហាញថារាងកាយអ្នកកំពុងខ្វះជាតិកាល់ស្យូមខ្លាំង