៨ សញ្ញា​បង្ហាញ​ថា​អ្នក​ជា​មនុស្ស​ស្រី​ដែល​រឹងមាំ​ខ្លាំង ខុសពីនារី​ដទៃទៀត

  • 2020-06-10 05:30:00
  • ចំនួនមតិ 7 | ចំនួនចែករំលែក 115

តើ​មើល​យ៉ាង​ណា​ទើប​ដឹង​ថា​មនុស្ស​​ម្នាក់​ជា​នារី​ដែល​មាន​ភាព​រឹងមាំ ក្លា​ហាន និង ឯករាជ្យ​ ខុស​ពី​អ្នក​ដទៃ? អ្នក​ខ្លះ​ប្រហែល​ជា​យល់​ថា​នារី​ដែល​រឹងមាំ​ជា​នារី​ដែល​មិន​ចេះ​យំ ហើយ​រឹងមាំ​អាច​ប្រឈម​អ្វីៗ​គ្រប់​បែប​យ៉ាង។ អ្នក​ខ្លះ​ទៀត​ប្រហែល​ជា​យល់​ថា​នាង​ជា​នារី​ដែល​គ្មាន​ភាណ​ភ័យ​ខ្លាច មិន​ចេះ​បារម្ភ​ ឬ ខ្វល់​ខ្វាយ​ច្រើន​ដូច​គេ​នោះ​ទេ។ តើ​ចម្លើយ​ពិត​គឺ​បែប​ណា​វិញ? ដូច្នេះ សញ្ញា​ទាំង ៨ ខាង​ក្រោម​នេះ​សុទ្ធ​សឹង​ជា​សញ្ញា​បង្ហាញ​ពី​ភាព​រឹងមាំ​ និង ឯករាជ្យ​របស់​មនុស្ស​ស្រី៖

រូបតំណាង

១. នាង​មិន​ត្រូវ​ការ​ការ​យល់​ស្រប​ពី​អ្នក​ដទៃ៖ មិន​ថា​រឿង​តូច​ធំ​បែប​ណា នាង​តែង​សម្រេច​ចិត្ត​ដោយ​ខ្លួន​ឯង​ ប្រសិន​បើ​នាង​យល់​ថា​វា​ជា​រឿង​ត្រឹម​ត្រូវ​និង​ធ្វើ​ឲ្យ​នាងសប្បាយ​ចិត្ត។ ពេល​ខ្លះ​សូម្បី​តែ​អ្នក​ជិត​ស្និទ្ធ​ក៏​នាង​មិន​បាន​សួរ​នាំ​សុំ​​យោបល់​ពី​គេ​ដែរ ព្រោះ​នាង​តែង​មាន​ភាព​ច្បាស់​លាស់​នូវ​ជម្រើស និង ការ​សម្រេច​ចិត្ត​របស់​ខ្លួន។

២. នាង​ត្រូវ​ការ​ការ​គោរព​ជាង​ចំណាប់​អារម្មណ៍៖ ជា​មនុស្ស​ស្រី​ឯករាជ្យ​ម្នាក់ នាង​មិន​ដែល​ចង់​បាន​នូវ​ការ​ទាក់​ទាញ​ចំណាប់​អារម្មណ៍​ពី​អ្នក​ដទៃ​ ឬ ខ្សែ​ភ្នែក​រាប់​គូ​របស់​គេ​នោះ​ទេ។ អ្វី​ដែល​នាង​ប្រាថ្នា​ចង់​បាន​ពី​មនុស្ស​ជុំ​វិញ​ខ្លួន​គឺ​ការ​គោរព ការ​ឲ្យ​តម្លៃ​ និង ផ្ដល់​សេរីភាព​ឲ្យ​នាង​តែ​១​មុខ​គត់។

រូបតំណាង

៣. នាង​យក​ការ​ឈឺចាប់​ទុក​ជា​មេរៀន៖ ផ្ទុយ​ពី​ការ​យំ​ឱប​ទុក្ខ មនុស្ស​ស្រី​រឹងមាំ​តែង​មើល​ឃើញ​វា​ជា​មេរៀន​ជីវិត ដើម្បី​ជម្រុញ​នាង​ឲ្យ​ដើរ​ទៅ​មុខ​បន្ត។ នាង​មិន​ដែល​រាថយ​ពេល​​ជួប​ឧបសគ្គ​នៅ​កណ្ដាល​ទី​ឡើយ ហើយ​តែង​យក​វា​ធ្វើ​ជា​ស្ពាន​ដើម្បី​ឆ្លង​ទៅ​កន្លែង​ដែល​នាង​ប្រាថ្នា​ចង់​ទៅ​ពិត​ប្រាកដ។

៤. នាង​តែង​ផ្ដល់​ភាព​រីករាយ​ដល់​គេ​ឯង៖ នារី​រឹងមាំ​មិន​ប្រាកដ​ថា​មាន​ចរិត​ម៉ឺងម៉ាត់​គ្រប់​ពេល​នោះ​ទេ។ នាង​បែក​ចែក​ច្បាស់​លាស់​ពេល​ណា​ត្រូវ​ម៉ឺងម៉ាត់​ច្បាស់​លាស់ និង ពេល​ណា​ត្រូវ​លេង​សើច​សប្បាយ។ លើស​ពី​នេះ​ទៀត ពេល​នៅ​ជាមួយ​នាង អ្នក​នឹង​មាន​អារម្មណ៍​ថា​នាង​មាន​គំនិត​ចាស់ទុំ​ច្រើន និង ចេះ​ជួយ​យក​អាសា​គេ​ឯង​ពេល​ជួប​បញ្ហា ព្រោះ​នាង​ធ្លាប់​បាន​​ឆ្លង​កាត់​វា​រួច​មក​ហើយ។​

រូបតំណាង

៥. នាង​មិន​ដែល​ប្រៀបធៀប​ខ្លួន​ឯង​ទៅ​នឹង​នារី​ដទៃ៖ នារី​រឹងមាំ​ម្នាក់​មិន​ដែល​យក​ភាព​ជោគជ័យ​របស់​អ្នក​ដទៃ​មក​ប្រៀបធៀប​នឹង​ជំហាន​របស់​ខ្លួន​នោះ​ទេ។ នាង​រឹត​តែ​មិន​យក​បរាជ័យ​របស់​អ្នក​ដទៃ​មក​ធ្វើ​ជា​អាវុធ​ដើម្បី​យក​ឈ្នះ​គេ​ឡើយ។ ដូច្នេះ មិន​ថា​រឿង​គ្រួសារ ការងារ ឬ រូបសម្បត្តិ​ឡើយ គឺ​នាង​តែង​ប្រឹង​ប្រែង​ធ្វើ​អ្វី​ដែល​ជា​ខ្លួន​ឯង និង គ្មាន​ចិត្ត​ទៅ​ប្រៀបធៀប​ជាមួយ​អ្នក​ណា​ម្នាក់​ឡើយ។

៦. នាង​មិន​មែន​ជា​មនុស្ស​យន្ត​គ្មាន​បេះដូង​ទេ​៖ អ្នក​ខ្លះ​យល់​ថា​មនុស្ស​រឹងមាំ​មិន​ចេះ​យំ មិន​ចេះ​ឈឺចាប់​ទេ។ ជាក់​ស្ដែង​ការ​គិត​បែប​នេះ​គឺ​ខុស​ទាំង​ស្រុង។ មនុស្ស​ម្នាក់​ទោះ​ជា​រឹងមាំ​ និង​ក្លាហាន​យ៉ាង​ណា​ក៏​នៅ​តែ​មាន​បេះដូង ចេះ​យំ ចេះ​ឈឺចាប់ ពេល​ជួប​ទុក្ខ​ម្ដងៗ។ តែ​គ្រាន់​ខុស​គ្នា​ត្រង់​ នាង​មិន​ឲ្យ​ឧបសគ្គ​ឬ​ទុក្ខ​ទាំង​នោះ​ក្លាយ​ជា​រនាំង​ឃាំង​ឃាត់​នាង​ឲ្យ​នៅ​មួយ​កន្លែង​នោះ​ទេ។

រូបតំណាង

៧. នាង​មិន​ចេះ​គុំកួន៖ លក្ខណៈ​សម្បត្តិ​មួយ​ទៀត​របស់​ពួក​គេ​គឺ​មិន​ចេះ​គុំកួន ឬ ព្យាយាម​សងសឹក​អ្នក​ដទៃ​ឡើយ។ បើ​នាង​សម្រេច​ថា​ឈប់​គិត​ឈប់​ខ្វល់​រឿង​នោះ​ហើយ នាង​ច្បាស់​ជា​លែង​វា​ទៅ​ឲ្យ​ឆ្ងាយ​ហើយ​មិន​គុំកួន​អ្នក​ណា​ឡើយ។

៨. នាង​មាន​ភាព​ស្មោះ​ត្រង់៖ មនុស្ស​ស្រី​ក្លាហាន និង​រឹងមាំ​ច្រើន​មិន​ចេះ​កុហក​យក​រួច​ខ្លួន​នោះ​ទេ។ នាង​សុខ​ចិត្ត​បង្ហាញ​ប្រាប់​ពី​ការ​ពិត​ជៀសវាង​រក​លេស​ដោះសា​ច្រើន​នោះ​ទេ។ បើ​ក្នុង​ទំនាក់ទំនង​ស្នេហា ឬ មិត្តភាព​វិញ នាង​ចូលចិត្ត​និយាយ​ត្រង់ៗ​រហូត​ដល់​ពេល​ខ្លះ​អាច​ប៉ះពាល់​អារម្មណ៍​អ្នក​​ក៏​ថា​បាន ដូច្នេះ​អ្នក​មិន​បាច់​បារម្ភ​ថា​នាង​ចេះ​ភូតភរ​កុហក​អ្វី​ឡើយ៕

ចុចអានបន្ត៖

ប្រភព៖ iheartintelligence ប្រែ​សម្រួល៖ Siyou Tang