របៀបទិញសេរ៉ូមវីតាមីន C បានត្រឹមត្រូវ ដើម្បីលាបទៅមានប្រសិទ្ធភាពខ្ពស់
- 2020-05-20 08:10:00
- ចំនួនមតិ 0 | ចំនួនចែករំលែក 0
របៀបទិញសេរ៉ូមវីតាមីន C បានត្រឹមត្រូវ ដើម្បីលាបទៅមានប្រសិទ្ធភាពខ្ពស់
វីតាមីន C បានដើរតួយ៉ាងសំខាន់ក្នុងផ្នែកសម្រស់ ដែលនារីគ្រប់រូបមិនអាចមើលរំលងចំណុចនេះបានទេ។ ម្ល៉ោះហើយចៀសវាងទិញសេរ៉ូមវីតាមីន C ខាតលុយទទេ អ្នកគួរដឹងពីចំណុចខ្លឹមៗទាំងនេះសិន។
ជាដំបូងត្រូវដឹងពីគុណប្រយោជន៍របស់សេរ៉ូមវីតាមីន C សិន
គុណប្រយោជន៍របស់វីតាមីន C ជួយកាត់បន្ថយស្នាមមុន អាចម៍រុយ ស្នាមអុជខ្មៅ ពន្យារភាពចាស់ ជួយស្បែកតឹងណែន ព្រមទាំងមានសារធាតុប្រឆាំងអុកស៊ីតកម្មផងដែរ។នៅពេលប្រើប្រាស់ជាប្រចាំ ស្បែកនឹងស្រស់ស្អាត ភ្លឺថ្លា ក្មេងជាងវ័យ និងមើលទៅស្រស់រលោង។
នេះជារបៀបជ្រើសរើសទិញសេរ៉ូមវីតាមីន C ឲ្យបានត្រឹមត្រូវ៖
១. ជ្រើសរើសសេរ៉ូមដែលផ្ទុកវីតាមីន C ១០-២៥%
បើអ្នកចង់ឃើញលទ្ធផល គប្បីមើលធាតុផ្សំរបស់សេរ៉ូមនោះជាមុនសិន ព្រោះវាជាចំណុចសំខាន់ណាស់។ អ្នកអាចផ្ទៀងនៅលើផ្លាកក្រោយដបរបស់សេរ៉ូម។ ជាការណែនាំ ចំពោះមនុស្សស្រីមានស្បែកប្រតិកម្ម គួរជ្រើសរើសសេរ៉ូមដែលផ្ទុកវីតាមីន C តិចជាង ១០% ដើម្បីការពារកុំឲ្យស្បែកអាឡែហ្ស៊ី។ ចំពោះមនុស្សស្រីដែលមានប្រភេទស្បែកផ្សេងទៀត គួរជ្រើសរើសវីតាមីន C ពី១៥ -២៥ % ដើម្បីការពារស្បែកកុំឲ្យរោល។
២. ជ្រើសរើសសេរ៉ូមដែលផ្ទុកវីតាមីនផ្សេងៗ
បន្ថែមពីលើវីតាមីន C អ្នកគួរជ្រើសរើសសេរ៉ូមដែលមានវីតាមីនផ្សេងៗទៀតជាធាតុផ្សំដែរ ព្រោះជួយឲ្យវីតាមីន C ធ្វើការបានល្អ។ ដូចជាវីតាមីន A ជួយជម្រុះកោសិកាងាប់ៗ និងជួយពន្លឿនឲ្យវីតាមីន C ជួយស្បែកមើលទៅភ្លឺថ្លាជាងមុន។ មួយទៀត អ្នកអាចជ្រើសយកវីតាមីន E ដែលជួយបង្កើនសារធាតុប្រឆាំងអុកស៊ីតកម្មក្នុងការកាត់បន្ថយស្នាមជ្រួញ ជួយឲ្យស្បែកតឹងណែន និងការពារមិនឲ្យឆាប់ចាស់។ អ្នកអាចជ្រើសរើសប្រភេទវីតាមីនផ្សេងៗ តាមតម្រូវការរបស់អ្នកក៏បាន។
៣. ការវេចខ្ចប់ត្រូវតែមើលទៅស័ក្ដិសម
ចំណុចចុងក្រោយនេះរឹតតែសំខាន់ ព្រោះដបដាក់សេរ៉ូមវីតាមីន C ដែលល្អ វាអាចការពារវីតាមីន C ពីកម្តៅព្រះអាទិត្យមិនឲ្យខ្សោះជីវជាតិបាន។ ម្ល៉ោះហើយ នៅពេលទិញ ត្រូវជ្រើសយកដបណាពណ៌ស្រអាប់ ក្រាស់ ព្រោះវាជួយការពារមិនឲ្យខ្យល់ចូល។ នៅពេលបើកប្រើ សូមនៅកន្លែងដែលមិនក្ដៅខ្លាំង ដើម្បីវាអាចរក្សាបាននូវគុណភាពរបស់សេរ៉ូម។ លើសពីនេះ បើពេលអ្នកលាបទៅ មានអារម្មណ៍ថាស្បែកមុខហាក់មិនប្រក្រតី ឬមានក្លិនមិនល្អ គប្បីឈប់លាបភ្លាមៗ៕
អានបន្ត៖ តោះ! មកបិទម៉ាសដំឡូងបារាំងធម្មជាតិ រូបមន្តមុខស ម៉ត់ខៃ និង បំបាត់ស្នាម