ទង្វើទូទៅប្រចាំថ្ងៃ ដែលអ្នកមិនសូវចាប់អារម្មណ៍ តែអាចបង្កគ្រោះថ្នាក់ដោយមិនដឹងខ្លួន

2020-05-15 11:10:00
ចំនួនមតិ 0 | ចំនួនចែករំលែក 0

ទង្វើប្រចាំថ្ងៃមួយចំនួន ដែលអ្នកតែងធ្វើដោយមិនសូវបានចាប់អារម្មណ៍ អាចក្លាយជាទម្លាប់អាក្រក់ពិបាកកែខៃ ថែមអាចបង្កគ្រោះថ្នាក់ដោយមិនដឹងខ្លួនផងដែរ។ ថ្វីត្បិតតែពេលខ្លះ មើលទៅហាក់បីដូចជាសកម្មភាពតូចតាចក៏ដោយ តែបើហ៊ានប្រហែសមើលរំលង វានឹងធ្វើឲ្យអ្នកប្រឈមនឹងហានិភ័យជាក់ជាមិនខានទេ។

១. ស្ពាយកាតាបទៅក្រោយ

នៅពេលដែលអ្នកធ្វើដំណើរ ឬសម្រាប់អ្នកដែលចូលចិត្តប្រើកាតាបស្ពាយនៅខាងក្រោយ ត្រូវមានការប្រុងប្រយ័ត្នឲ្យបានខ្ពស់ ពុំដូច្នោះទេអ្នកអាចនឹងបាត់បង់របស់សំខាន់និងមានតម្លៃនៅក្នុងនោះ។ ជាពិសេសនៅកន្លែង ឬនៅតាមទីសាធារណផ្សេងៗ ត្រូវដាក់កាតាបស្ពាយមកមុខ ឱបនឹងដៃឲ្យជាប់ ដើម្បីធានានូវសុវត្ថិភាព។

២. កាន់ចង្កូតឡានឲ្យបានត្រឹមត្រូវ

មិនអាចធ្វេសប្រហែសនិងមិនមែនជារឿងលេងសើចទេ នៅពេលដែលបើកបរនៅតាមដងផ្លូវ។ ការកាន់ចង្កូតក៏ដូចគ្នាដែរ ត្រូវដាក់ដៃឲ្យបានត្រឹមត្រូវ ដូចក្នុងរូបដែលបានបង្ហាញ។ ប្រសិនបើអ្នក ដាក់ដៃទាំងពីរនៅផ្នែកខាងលើនៃចង្កូត វាជាកន្លែងគ្រោះថ្នាក់បំផុត ដែលអាចបណ្តាលឲ្យរងរបួសធ្ងន់ធ្ងរ នៅពេលមានឧប្បត្តិហេតុកើតឡើងដោយប្រការណាមួយ។

៣. រុំបង់បិតដំបៅឲ្យបានត្រឹមត្រូវ

របួសបន្តិចបន្តួចដោយសារមុតកាំបិត ឬប៉ះនឹងរបស់មុតស្រួច ធ្វើឲ្យចេញឈាម អ្នកប្រាកដជាទៅរកបង់បិតដំបៅ។ ដើម្បីការពារមុខរបួសពីមេរោគនិងបាក់តេរីនានា រួមទាំងបិតជាប់បានល្អ អ្នកអាចកាន់បង់នៅផ្នែកកណ្តាល នៃស្លាបទាំងសងខាងនិងបិទធ្វើការរុំខ្វែងគ្នាជាការស្រេច។

៤. ត្រូវលាងដៃជាមួយសាប៊ូនៅពេលដៃកខ្វក់ខ្លាំង

អ្នកប្រហែលជាមានជែលលាងដៃដាក់ជាប់ខ្លួនគ្រប់ពេលវេលា ដើម្បីរក្សានូវអនាម័យ។ យ៉ាងណាត្រូវចាំថា ប្រសិនបើដៃអ្នកកខ្វក់ខ្លាំង ការប្រើជែលតែមួយមុខនៅមិនទាន់គ្រប់គ្រាន់ឡើយ។ ចង់កម្ចាត់មេរោគបាក់តេរីទាំងអស់ឲ្យបានពេញលេញត្រឹមត្រូវ គួរលាងដៃជាមួយសាប៊ូ ឲ្យបានយ៉ាងហោចណាស់ ២០វិនាទី សឹមលាងទឹកចេញឲ្យស្អាត។

៥. ងូតទឹកយូរពេក

មនុស្សភាគច្រើនចូលចិត្តចំណាយពេលយូរខ្លាំងណាស់ក្នុងបន្ទប់ទឹក។ នៅពេលងូតទឹក វាអាចនាំឲ្យអ្នកមានអារម្មណ៍រីករាយស្រស់ថ្លាពិតមែន តែបើងូតយូរពេក ស្បែករបស់អ្នកនឹងប្រែទៅជាស្ងួត បាត់បង់សំណើម ឬប្រតិកម្មជាដើម។ ពេលវេលាដ៏ល្អបំផុតសម្រាប់សុខភាពស្បែក គឺមិនលើសពី១០នាទី។

៦. ងូតទឹកភ្លាមៗបន្ទាប់ពីហាត់ប្រាណរួច

ចង់ឲ្យការហាត់ប្រាណទទួលបានលទ្ធផលល្អ និងគ្មានហានិភ័យ អ្នកជំនាញផ្នែកសុខភាព បានណែនាំឲ្យអ្នកអង្គុយឲ្យបាត់ហត់ស្រួលបួល និងឲ្យស្ងួតញើសបានល្អសិន មុនពេលទៅងូតទឹកជាមួយនឹងទឹកត្រជាក់។ ការធ្វើបែបនេះ ដើម្បីជួយសម្រួលដល់ដំណើរនៃឈាម ជួយឲ្យសាច់ដុំរឹងមាំ កាត់បន្ថយការឈឺចាប់ និងភាពនឿយហត់អស់កម្លាំង៕

ចុចអានបន្ត៖ គន្លឹះការពារមិនឲ្យឆ្លងរោគសម្រាប់មនុស្សស្រី ពេលចូលបង្គន់សាធារណៈ

ប្រភព៖ akerufeed ប្រែសម្រួល៖ ដេត ឈុនអ៉ី