ភាពជឿជាក់ជំរុញនិស្សិតស្រីឆ្នើមខ្មែររៀនជំនាញវិស្វករដូចប្រាថ្នាដល់អាមេរិក (មានវីដេអូ)

2019-09-18 12:00:00
ចំនួនមតិ 0 | ចំនួនចែករំលែក 0

មនុស្សស្រីតែងមានបំណងប្រាថ្នាក្នុងជីវិតខុសៗគ្នា គ្រាន់តែអ្នកខ្លះអាចរកវិធីសម្រេចបានក្ដីប្រាថ្នាសមដូចបំណង ចំណែកអ្នកខ្លះក៏មិនបានដូចចិត្ត ដោយហេតុផលនានា។

បងប្អូនស្ត្រីទាំងអស់ សូមកុំអាលបាក់ទឹកចិត្ត បើខ្ញុំអាច សូមជឿជាក់ថានារីៗយើង ក៏អាចធ្វើបានដូចគ្នាដែរ។ នេះជាសម្ដីរបស់កញ្ញា សុខ សហស្ស បច្ចុប្បន្នជានិស្សិតអាហារូបករណ៍នៅសហរដ្ឋអាមេរិក ផ្នែកវិស្វកម្មសំណង់ស៊ីវិល នៃសកលវិទ្យាល័យ Portland ក្នុងទីក្រុង Portland រដ្ឋ Oregon។

ក្នុងបទសម្ភាស មកកាន់វេបសាយ កញ្ញា តាមរយៈសារឆ្លើយឆ្លងតាមបណ្ដាញសង្គម ពីសហរដ្ឋអាមេរិកមក អតីតសិស្សស្រីឆ្នើមនិទ្ទេស A បាក់ឌុបឆ្នាំ២០១៧ និងជាអតីតនិស្សិតវិទ្យាស្ថានបច្ចេកវិទ្យាកម្ពុជាហៅកាត់ (សាលាតិចណូ) បានបញ្ជាក់ថា កញ្ញាពិតជាមានអារម្មណ៍រំភើបយ៉ាងខ្លាំង ក្រោយដឹងថា ខ្លួនបានជាប់អាហារូបករណ៍១០០% កាលពីដើមឆ្នាំ២០១៩កន្លងទៅ។

អាហារូបករណ៍នេះ គឺជាអ្វីដែលនាងស្រឡាញ់ និងប៉ងប្រាថ្នា បើទោះជាមានមតិខ្លះថា មនុស្សស្រី មិនគួររៀនជំនាញវិស្វករនេះដូចប្រុសៗក៏ដោយ។

និយាយដោយភាពម៉ឺងម៉ាត់ ប៉ុន្តែបង្កប់នូវភាពរួសរាយ កញ្ញា សហស្ស ឲ្យដឹងទៀតថា គ្មានអ្វីដែលមនុស្សស្រីធ្វើមិនបាននោះទេ សំខាន់ឲ្យតែយើងក្លាហាន ព្យាយាមឲ្យអស់លទ្ធភាព ពង្រឹងភាសាអង់គ្លេសឲ្យល្អ បូករួមនឹងភាពជឿជាក់ខ្ពស់។ រំលឹកទៅដំណាក់កាលនៃការចាប់ផ្ដើម និស្សិតខ្មែររូបនេះបញ្ជាក់ថា ទម្រាំបានជាប់អាហារូបករណ៍ ១០០%នេះ កញ្ញាបានឆ្លងកាត់រឿងរ៉ាវលំបាក ប្រកួតប្រជែងជាមួយបេក្ខជនពូកែជាច្រើន ដែលអាចឲ្យនាងកាន់តែទទួលបានបទពិសោធន៍ថ្មីៗ គួរឲ្យចងចាំ និងរាប់ទុកថាជាមោទនភាពធំមួយសម្រាប់ជីវិត។

កញ្ញាបានទទួលអាហារូបករណ៍ តាមរយៈកម្មវិធីរបស់អង្គការក្រៅរដ្ឋាភិបាលមួយ មានឈ្មោះថា SHE CAN ដែលតែងជួយដល់ស្ត្រីនៅកម្ពុជា។ អង្គការនេះ តែងជួយឲ្យស្ត្រីវ័យក្មេងកម្ពុជាឲ្យទទួលបានអាហារូបករណ៍ថ្នាក់បរិញ្ញាបត្រ តាមមុខជំនាញខុសៗគ្នា សិក្សានៅសហរដ្ឋអាមេរិក។ កម្មវិធីនេះ ក៏មានបំណងជួយស្ត្រីដែលមានក្ដីស្រមៃធំៗក្នុងជីវិត ឲ្យហ៊ានឈោងចាប់ក្ដីស្រមៃនោះដោយជោគជ័យ ដើម្បីជួយដល់ប្រយោជន៍សង្គមជាតិ។

មិនត្រឹមតែផ្ដល់អាហារូបករណ៍កម្មវិធីនេះ នៅមានវគ្គបណ្ដុះបណ្ដាល និងផ្ដល់គ្រូបង្វឹក ដើម្បីជួយចាំណែនាំ ច្បាស់លាស់ និងបណ្ដុះភាពជាអ្នកដឹកនាំទៅតាមដំណាក់កាលនីមួយៗ ផងដែរ។

សូមទស្សនា វីដេអូខ្លី ផ្ដល់ឲ្យដោយកញ្ញា សុខ សហ្សស រៀបរាប់ពីលក្ខខណ្ឌ និងព័ត៌មានសំខាន់ៗ សម្រាប់និស្សិតស្រីកម្ពុជា ដែលចង់ដាក់ពាក្យជាមួយ SHE CAN រៀនបន្តនៅអាមេរិក។

អ្វីដែលនិស្សិតវិស្វករស្រីវ័យក្មេង ចង់ចែករំលែកបន្ថែមមកកាន់សិស្ស ឬនិស្សិតស្រីខ្មែរទាំងអស់ ដំបូងបំផុតគឺត្រូវមានភាពក្លាហាន ជឿជាក់លើសមត្ថភាពខ្លួនឯង តស៊ូ សូមកុំបាក់ទឹកចិត្ត កុំឆាប់ចុះចាញ់ ឬបោះបង់ក្ដីស្រមៃរបស់យើងដាច់ខាត។

ចុចត្រង់នេះដើម្បីដាក់ពាក្យអាហារូបករណ៍ SHECAN

នៅថ្ងៃអនាគត កញ្ញា សុខ សហ្សស មានបំណងមកចូលរួមជួយអភិវឌ្ឍប្រព័ន្ធហេដ្ឋារចនាសម្ព័ន្ធ មធ្យោបាយដឹកជញ្ជូននៅប្រទេសកម្ពុជាឲ្យកាន់តែល្អប្រសើរ និងដោះស្រាយបញ្ហាកកស្ទះចរាចរណ៍ក្នុងរាជធានីភ្នំពេញ។ ក្រៅពីនេះ កញ្ញា ក៏ចង់រៀនបន្តឲ្យកាន់តែច្រើន ក្រោយចប់អាហារូបករណ៍ ថ្នាក់បរិញ្ញាបត្រ នៅសហរដ្ឋអាមេរិក។

រូបថតទាំងអស់ផ្តល់ឲ្យ៖ ដោយ កញ្ញា សុខ សហ្សស

ចុចអាន៖មនុស្សស្រីរឹងមាំ ស្រឡាញ់ភាពស្អាតពីខាងក្នុង

ចុចអាន៖មនុស្សស្រីចាស់ចិត្តចាស់គំនិតមិនផ្ដេកផ្ដួលជីវិតលើមនុស្សប្រុសឡើយ

អត្ថបទ៖ ពៅ រក្សា