អ្នកជិតខាងចរិតយ៉ាប់៥ប្រភេទ ដែលគ្មាននរណាចង់រស់នៅក្បែរ

2018-08-12 07:15:15
ចំនួនមតិ 0 | ចំនួនចែករំលែក 0

ផ្ទះស្អាត ទីតាំងល្អ តម្លៃថ្លៃប៉ុនណាក៏ដោយ បើមានអ្នកជិតខាងដែលពិបាកយល់គ្នា គឺពិតជាតឹងទ្រូងខ្លាំងណាស់។ ពេលខ្លះទោះបីខឹងប៉ុនណាក៏សុខចិត្តទ្រាំ ព្រោះមិនចង់បង្កជម្លោះនាំរឿងក្តៅក្រហាយច្រើន។ ម្យ៉ាងវិញទៀត គិតថាអ្នកជិតខាងជាមនុស្សដែលរស់នៅក្បែរគ្នា ឃើញមុខគ្នារាល់ថ្ងៃ ភាពចុះសម្រុង ការចេះជួយគ្នាក្នុងគ្រាមានអាសន្ន គឺរឿងដែលសង្គមឲ្យតម្លៃបំផុត។ ហេតុនេះហើយបានជាអ្នកមិនត្រូវ ធ្វើខ្លួនដូចជាអ្នកជិតខាងចរិតយ៉ាប់៥ប្រភេទខាងក្រោមនេះ។

១. ប្រកាន់ខឹងរឿងតូចតាច

រស់នៅក្បែរខាងគ្នា តែងតែមានហើយនូវការប៉ះពាល់បន្តិចបន្តួច ជៀសមិនផុតនោះទេ ដូចជាការដាំដើមផ្កា ការដាក់សំរាម ឬការចិញ្ចឹមសត្វជាដើម។ បើបញ្ហាណាអាចដោះស្រាយបាន និយាយតាមសម្រួលទៅ មិនចាំបាច់ឈ្លោះគ្នានាំឲ្យរឿងតូចទៅជាធំឥតប្រយោជន៍។

២. ផឹកស៊ីឡូឡាមិនក្រែងចិត្ត

បើសិនគ្រាន់តែជាពិធីជប់លៀងនៅថ្ងៃចុងសប្ដាហ៍ ឬធ្វើយូរៗម្តងមិនអីទេ ប៉ុន្តែអ្នកខ្លះវិញសឹងរាល់ថ្ងៃ។ ស្រែកច្រៀងឮៗផង និយាយឡូឡាផង ហើយនៅដល់យប់ជ្រៅ ស្ទើរតែទល់ភ្លឺ មិនក្រែងចិត្តគេបន្តិចសោះ។ អ្នកជិតខាងប្រភេទនេះ បើនៅជិតចង់តែរើចេញស្អែកៗ។

៣. អត់ការងារធ្វើចាំតែអង្គុយនិយាយដើមគេ

អ្នកជិតខាងខ្លះពិបាកយល់ណាស់ មិនថាហេតុអ្វីទេ មួយថ្ងៃៗដូចទំនេរដល់ហើយ។ អង្គុយចាំតែនិយាយដើមអ្នកដទៃ ចូលចិត្តឆាប់វាយតម្លៃគេទាំងដែលមិនរឿងសោះ។ ជាពិសេសពូកែខាងចាប់កំហុស រិះគន់គ្មានហេតុផល ឲ្យតែបានសប្បាយមាត់ខ្លួនឯង។ គូរយកពេលទំនេរទៅធ្វើរឿងអ្វីផ្សេងល្អៗ មានប្រយោជន៍វិញប្រសើរជាង។

៤. ពូកែច្រណែនឈ្នានីស

ធ្លាប់ជួបអត់ ប្រភេទមនុស្សដែលមកស្អប់អ្នក ទោះបីជាអ្នកមិនបានធ្វើអ្វីដាក់គេក៏ដោយ។ នេះដោយសារតែគេមានចិត្តច្រណែនឈ្នានីស ពេលឃើញអ្នករីកចម្រើន ទិញឡានទំនើប ទិញរបស់ថ្មីចូលផ្ទះ។ បើបានជួបមានអ្នកជិតខាងបែបនេះ កុំទៅខ្វល់អី នៅតែនិយាយរកធម្មតាៗទៅ សំខាន់អ្នកខំប្រឹងដោយសមត្ថភាពខ្លូនឯង អ្នកផ្សេងមិនអាចធ្វើបានទើបគេច្រណែន។

៥. វាយឫកឆ្មើងឆ្មៃ អួតក្អេងក្អាង

នៅផ្ទះជាប់គ្នាសោះ ពេលខ្លះសូម្បីតែញញឹមក៏កំណាញ់ដែរ។ ចេញបាត់ ចូលបាត់ គ្មានមើលមុខ និយាយរកអ្នកណា ហើយចូលចិត្តបង្អួតសំញែង របស់ប្រើថ្លៃៗប្រេនៗ ធ្វើដូចអ្នកដទៃមិនដល់ខ្លួន។ រស់នៅក្បែរគ្នា ញញឹមដាក់តែបន្តិចក៏អាចបង្ហាញពីភាពរួសរាយបានដែរ កុំចាំបាច់វាយឬកឆ្មើងឆ្មៃអី ព្រោះពេលមានអាសន្ន មានតែអ្នកជិតខាងនេះហើយដែលអាចជួយគ្នាទៅវិញទៅមក។