រស់នៅមិនស្ពាយទុក្ខធ្ងន់ ត្រូវបោះចោល១០ចំណុចនេះឲ្យបាន

2018-08-10 00:00:00
ចំនួនមតិ 0 | ចំនួនចែករំលែក 0

តើមានរឿងអ្វីខ្លះទៅ ដែលធ្វើឲ្យជីវិតអ្នកពិបាក? វាធ្ងន់ពេកហើយបើអ្នកស្ពាយតែម្នាក់ឯង ដូច្នេះត្រូវចេះជម្រុះចោលរឿងណាដែលនាំឲ្យជីវិតស្មុគស្មាញ ព្រោះការកើតមកលើភពផែនដីមួយនេះ គួរតែរស់នៅដោយក្តីរីករាយនិងសុភមង្គលជាទីបំផុត។ អ្នកមិនអាចទាយដឹងថាថ្ងៃណានឹងបាត់ពីលោកនេះទេ អីចឹងហើយទាន់ដង្ហើមនៅមាន ត្រូវចេះធ្វើឲ្យជីវិតធូរស្រាល ស្រស់ស្រាយ ដោយបោះចោលរឿងមិនបានការឲ្យអស់។

១. មិត្តណាដែលមិនគួររាប់អាន

បើរាប់អានហើយឃើញថាគ្មានប្រយោជន៍អីដដែល មានតែនាំទុក្ខលើសដើម ទោះឈប់រាប់អានក៏គ្មានអ្វីត្រូវស្តាយដែរ។ បើអ្នកជ្រើសដើរផ្លូវល្អ គង់តែបានជួបមនុស្សទេ កុំបារម្ភអី។

២. បំភ្លេចរឿងអតីតកាលអាក្រក់ៗ

អ្នកកំពុងតែរស់នៅក្នុងបច្ចុប្បន្នកាល មិនមែនអតីតកាលទេណា។ រឿងអាក្រក់ៗបានកើតឡើងរួចហើយ បំភ្លេចវាចោលចុះ។ គិតច្រើនពេកក៏មិនអាចកែប្រែអ្វីបានដែរ ថែមទាំងនាំឲ្យអ្នកឈឺក្បាលមិនសប្បាយចិត្តឥតល្ហែ។

៣. មិនសប្បាយចិត្តជាមួយការសិក្សាឬការងារ

ការសិក្សានិងការធ្វើការងារជាអ្វីដែលអ្នកត្រូវធ្វើជាចាំបាច់ ។ ការសិក្សាមិនអាចជៀសផុត ប៉ុន្តែការងារដែលមិនពេញចិត្ត អ្នកអាចរកផ្លូវផ្សេងបាន។ បើអ្នកមិនសប្បាយនឹងធ្វើវាទេ ហាក់បីដូចជាដាក់សម្ពាធឲ្យខ្លួនឯងដូច្នោះដែរ។

៤. រីករាយក្នុងការជួបមនុស្សថ្មីៗ

ពេលដែលអ្នកដើរផ្សារ ឬទៅហាងកាហ្វេម្នាក់ឯងមិនមែនមានន័យថាឯកានោះទេ ប៉ុន្តែអ្នកចេះពីរបៀបក្នុងការសន្ទនាជាមួយមនុស្សថ្មីៗ ដឹងពីសង្គមខាងក្រៅបានកាន់តែច្រើនជាងមុន។

៥. ប្រៀបធៀបខ្លួនឯងជាមួយអ្នកដទៃ

ការយកខ្លួនឯងទៅប្រៀបធៀបនឹងអ្នកដទៃមិនមែនជារឿងដែលអាចធ្វើឲ្យអ្នកសប្បាយនោះទេ។ វាធ្វើឲ្យអ្នកតូចចិត្តនិងភ្លេចស្រលាញ់អ្វីដែលខ្លួនមាន។ ត្រូវចាំថាលើលោកនេះគ្មានអ្វីស្មើគ្នាទេ អ្នកច្រណែននឹងរូបសម្រស់ឬជីវភាពរបស់អ្នកដទៃ ប៉ុន្តែក៏មានមនុស្សមិនតិចដែរ កំពុងតែច្រណែនជាមួយអ្នក។

៦. មិនឲ្យតម្លៃលើខ្លួនឯង

អ្នកមិនបានសង្កេតឃើញថាខ្លួនឯងល្អសោះ មើលឃើញតែកន្លែងខ្វះខាត។ កុំសង្ឃឹមថាអ្នកផ្សេងគេឲ្យតម្លៃអ្នក បើសូម្បីតែខ្លួនអ្នកផ្ទាល់ មិនបានគោរពឲ្យតម្លៃខ្លួនឯងផង។ ចេះកត់សម្គាល់នូវចំណុចល្អរបស់អ្នក ជាអ្វីដែលអាចធ្វើឲ្យអ្នកសប្បាយចិត្តបំផុត។

៧. មិនហ៊ាននិយាយការពិត

ការលាក់បញ្ហាទុកក្នុងចិត្ត ធ្វើឲ្យអ្នកនៅមិនស្ងប់វិលវល់តែម្នាក់ឯង។ មានរឿងអ្វី គូរនិយាយដោយចំៗ មិនលាក់បាំង ដូចជាពេលឃើញមិត្តធ្វើទង្វើមិនល្អជាដើម។ កុំខ្លាចគេខឹង ព្រោះការនិយាយត្រង់របស់អ្នក គឺដើម្បីកែលម្អ និងមិនចង់ឃើញអ្នកដទៃឈឺចាប់។

៨. មានចំណងមិត្តភាពរញ៉េរញ៉ៃ

ប្រសិនបើអ្នកមានចំណងមិត្តភាពរញ៉េរញ៉ៃ មិត្តមិនចំមិត្ត ស្នេហាមិនចំស្នេហា ហើយក៏មិនមែនជាអ្នកដទៃទៀត មិនដឹងត្រូវជាអ្វីឲ្យពិតប្រាកដ។ បែបនេះស្មុគស្មាញខ្លាំងណាស់ ហើយអាចនាំឲ្យមានវិប្បដិសារីទៀតទៅថ្ងៃមុខ។ វិធីល្អគឺដោះស្រាយឲ្យដាច់ស្រេច ដោយការសួរត្រង់ៗ។

៩. ស្តីបន្ទោសរាល់ពេលមានកំហុស

បើអ្នកចេះតែស្តីបន្ទោសរាល់ពេលមានកំហុស អ្នកច្បាស់ជារកសេចក្តីសុខមិនឃើញ ព្រោះមនុស្សម្នាក់ៗគ្មាននរណាមួយដែលត្រូវរហូតនោះទេ។ កំហុសតិចតូចគួរចេះអធ្យាស្រ័យ ទាំងចំពោះខ្លួនឯងនិងអ្នកដទៃ។

១០. កុហកខ្លូនឯង

កុហកខ្លួនឯងថារាល់ថ្ងៃហ្នឹងដូចជាសប្បាយចិត្តខ្លាំងណាស់ ទាំងដែលការពិតតែងកើតទុក្ខយំតែម្នាក់ឯងសឹងរាល់ថ្ងៃ។ យំចុះមិនខុសទេ បើពិបាកទ្រាំមិនបាន បំភ្លេចមិនបាន ប៉ុន្តែសន្យានឹងខ្លួនឯងថា ពេលយំអស់ចិត្តហើយ ត្រូវតែរឹងមាំឡើងវិញដាច់ខាត និងត្រូវញញឹមចេញពីចិត្តមិនមែនជាការប្រឹងសម្តែង ៕