គោលដៅ ៥ ដែលនារីគ្រប់រូបគួរកំណត់ខ្លួនឯងក្នុងឆ្នាំ ២០១៨

2017-12-20 07:00:00
ចំនួនមតិ 0 | ចំនួនចែករំលែក 0

មុនពេលចាប់ផ្ដើមឆ្នាំថ្មី យើងត្រូវត្រៀមខ្លួនឲ្យរួចជាស្រេចជាមួយនឹងដំណោះស្រាយ ក៏ដូចជាគម្រោងមួយចំនួន ដើម្បីធ្វើឲ្យឆ្នាំក្រោយប្រសើរជាងឆ្នាំមុន។ ប៉ុន្តែជារឿយៗគោលដៅទាំងនោះមិនមានភាពខុសគ្នាពីឆ្នាំចាស់ឡើយ។ ដូចនេះដើម្បីឲ្យឆ្នាំថ្មីសម្រេចការងារបានជោគជ័យ កញ្ញា សូមណែនាំមិត្តនារីឲ្យកំណត់គោលដៅខ្លួនឯងក្នុងឆ្នាំ ២០១៨ ថាត្រូវធ្វើអ្វីខ្លះ៖

១.រៀនបង្កើតការងារថ្មីឲ្យចេញជារូបរាង

ដើម្បីឲ្យគោលដៅឆ្នាំថ្មីបានសម្រេច យើងគួរតែធ្វើផែនការប្រចាំខែសម្រាប់ខ្លួនឯងជាមុន ទើបពេញមួយឆ្នាំដឹងថាបានជោគជ័យលើអ្វីខ្លះ ហើយមិនបានផលអ្វីខ្លះ។ ឧទាហរណ៍៖ ៣ ខែដំបូងនៃឆ្នាំថ្មី គួរធ្វើអ្វីខ្លះ? ហើយ ៣ ខែបន្ទាប់ធ្វើអ្វីទៀត? ធ្វើបែបនេះរយៈពេល ៣ ខែដំបូងបើមិនជោគជ័យ ឬជោគជ័យបន្តិចបន្តួច ត្រូវកែច្នៃផែនការទី ២ ដោយយកគំរូ ឬមើលពីគម្រោងទី ១។ បើទី ២ ជោគជ័យ ត្រូវលើកផែនការទី ៣ និង ទី ៤ មកបន្ត។

២.បោះចោលទម្លាប់អាក្រក់

មនុស្សម្នាក់ៗពិតជាដឹងពីទម្លាប់អាក្រក់របស់ខ្លួនហើយ។ ដូចនេះគួរតែលើកយកចំណុចអវិជ្ជមាននោះមកពិចារណា និងរកនឹកថា វាបានរាំងស្ទះដល់ការអភិវឌ្ឍអ្វីខ្លះក្នុងពេលកន្លងមក។ ពេលអ្នកដឹងច្បាស់ពីទម្លាប់អាក្រក់ទាំងនោះហើយ ត្រូវតែបោះវាចោលឲ្យឆ្ងាយ ដើម្បីកុំឲ្យឆ្នាំថ្មីនៅចរិតអាក្រក់ដដែលនេះ។

៣.កសាងទំនុកចិត្ត

ទំនុកចិត្តគឺមានសារៈសំខាន់ណាស់។ វាអាចផ្លាស់ប្ដូរពីរបៀបដែលអ្នកធ្វើការកន្លងមក ហើយទំនុកចិត្តនឹងបង្ហាញមនុស្សដទៃឲ្យឃើញពីតម្លៃរបស់អ្នក។ ការជឿជាក់នឹងជួយបង្ហាញដល់អ្នករួមការងាររបស់អ្នកថា អ្នកមានតម្លៃប៉ុណ្ណា ហើយនឹងធ្វើឲ្យអ្នកឈរជើងនៅកន្លែងរឹងមាំបាន។ ចូរធ្វើអ្វីដោយផ្ដើមចេញរឿងតិចតួចដែលអ្នកអាចធ្វើបាន ហើយធ្វើវាឲ្យល្អបំផុត នោះការងារធំនឹងរត់មករកអ្នកខ្លួនឯង។

៤.ធ្វើអ្វីៗថ្មីបន្ថែមទៀត ដើម្បីកសាងជីវិតដែលអ្នកស្រលាញ់

ឆ្នាំក្រោយគួរតែមានការផ្លាស់ប្ដូរធំៗ សម្រាប់អ្នក។ ប្រសិនបើអ្នកមិនចូលចិត្តការងាររបស់អ្នកទេ ក៏បោះបង់វាទៅ ហើយបើអ្វីដែលធ្វើឲ្យមិនសប្បាយចិត្តក៏ឈប់ខ្វល់ពីរបស់នោះទៀតទៅ។ រស់នៅក្នុងជីវិតដែលអ្នកស្រមៃ សម្រាប់ខ្លួនអ្នកនាពេលអនាគត។ អ្នកកំពុងចូលទៅក្នុងអនាគតហើយ ដូចនេះដើម្បីធ្វើឲ្យជីវិតស្រស់បំព្រងគួរបង្កើតជីវិតដែលអ្នកចង់រស់នៅទៅ។ តែមុនពេលបោះបង់អ្វីមួយ ត្រូវមានគម្រោងដើម្បីចាប់យករបស់ថ្មីឲ្យបានច្បាស់លាស់។

៥.រកវិធីបង្កើនប្រាក់ចំណូល

ឆ្នាំមុនអ្នកបានធ្វើការយ៉ាងហត់នឿយ តែថវិកាដែលទទួលបានវាមិនបានសេសសល់អ្វីជាដុំកំភួនឡើយ។ ដូចនេះអ្នកត្រូវមានគម្រោងរកប្រាក់បន្ថែមទៀត ដើម្បីឲ្យខ្លួនឯងមានលទ្ធភាព ក៏ដូចជាជីវភាពធូរធារជាងមុនៗ៕

ចុចអាន៖ធ្វើបែបណាទើបកុំឲ្យរឿងអនាគតក្លាយជារឿងស្ត្រេស និងស្មុគស្មាញ?

ប្រភព៖ Careergirldaily ប្រែសម្រួល៖ ទ្រី រ៉ាវី