ញ៉ាំសណ្ដែកកួររាល់ថ្ងៃផ្ដល់អត្ថប្រយោជន៍ច្រើនដល់សុខភាព ដូចញ៉ាំឱសថបុរាណ

2017-09-11 14:00:00
ចំនួនមតិ 0 | ចំនួនចែករំលែក 0

សណ្ដែកកួរជាបន្លែបៃតងមួយប្រភេទដែលប្រជាពលរដ្ឋខ្មែរនិយមបរិភោគទាំងឆៅនិងឆ្អិន ដោយមិនដឹងពីអត្ថប្រយោជន៍របស់វា។ ថ្ងៃនេះ កញ្ញា សូមបង្ហាញពីគុណសម្បត្តិនៃបន្លែនេះ ថាមានផលល្អដល់កម្រិតណា៖

១.ជួយថែរក្សាស្បែក

នៅក្នុងសណ្ដែកកួរមានវីតាមីន C ដែលជាសមាសធាតុមួយដ៏ល្អ ហើយវីតាមីន C គឺជាធាតុផ្សំសំខាន់ក្នុងការថែទាំស្បែក។ ដោយអាចជួយបន្ថយស្នាមជ្រួញ ក្រហម និងជួយចិញ្ចឹមស្បែកមិនឲ្យស្ងួត។ ប្រសិនបើបរិភោគអាហារដែលមានវីតាមីន C ខ្ពស់បែបនេះជារឿយៗអាចជួយការពារជំងឺមហារីកស្បែកបាន។

២.ពង្រឹងប្រព័ន្ធភាពស៊ាំ

មនុស្សគ្រប់គ្នាចង់មានប្រព័ន្ធភាពស៊ាំខ្ពស់ ដើម្បីបង្ការជំងឺមែនទេ? ដូច្នេះជម្រើសមួយដ៏ល្អបំផុតនោះ គួរទទួលទានសណ្ដែកកួរឲ្យបានច្រើន។ ព្រោះការញ៉ាំសណ្ដែកប្រភេទនេះនឹងជួយពង្រឹងមុខងាររបស់អេម៉ូក្លូប៊ីន។ ក្នុងសណ្ដែកកួរក៏ផ្ទុកនូវវីតាមីនC ដើម្បីជួយពង្រឹងដល់រាងកាយ និងបងា្ករជំងឺផ្ដាសាយ។

រូបតំណាង

**៣.ជួយឲ្យគេងលក់ស្រួល**

ប្រសិនបើអ្នកខ្វះម៉ាញេសូម អាចបណ្ដាលមានបញ្ហាការគេងមិនលក់។ ដោយសារម៉ាញេសូមគឺជាសារធាតុរ៉ែដ៏សំខាន់ដែលអាចជួយបន្ធូរភាពតានតឹង និងការសម្រាករបស់ខួរក្បាល។ ប្រសិនបើវាបាត់ធ្វើឲ្យមានអាការៈព្រួយបារម្ភ ស្ត្រេស និងមិនអាចដេកបានស្រួល។ ដូច្នេះការបរិភោគសណ្ដែកវែងដែលមានម៉ាញេសូមខ្ពស់ វាជួយខួរក្បាលសម្រាក និងបន្ថយភាពតានតឹង ហើយដេកលក់ស្រួល។

៤.ថែរក្សាភ្នែក

វីតាមីន A និងវីតាមីន B1 អាចចិញ្ចឹមភ្នែកបានយ៉ាងល្អ ហើយវាគឺសម្បូរក្នុងសណ្ដែកកួរនេះតែម្ដង។ មិនតែប៉ុណ្ណោះញ៉ាំសណ្ដែកកួរអាចបង្ការការខ្សោះរោមភ្នែក ទប់ស្កាត់ជំងឺភ្នែកដូចជាភ្នែកឡើងបាយ ជំងឺដក់ទឹកក្នុងភ្នែក និងជួយឲ្យយើងមើលឃើញកាន់តែច្បាស់។ បើនរណាមានបញ្ហាជាមួយភ្នែកញ៉ាំសណ្ដែកនេះឲ្យច្រើនទៅ ដើម្បីជួយឲ្យភ្នែកមានសុខភាពល្អឡើងវិញ។

៥.ជួយឆ្អឹង និងធ្មេញរឹងមាំ

ដោយសារតែនៅក្នុងសណ្ដែកវែងមានជាតិកាល់ស្យូម ជាតិដែក និងផូស្វ័រជាច្រើន ដែលធាតុទាំងបីធ្វើការរួមគ្នាពួកគេជួយធ្វើឲ្យសក់ ធ្មេញ និងឆ្អឹងរបស់យើងកាន់តែរឹងមាំ ថែមទាំងជួយកាត់បន្ថយហានិភ័យនៃការពុកឆ្អឹងបានយ៉ាងល្អទៀតផង។

៦.ការពារជំងឺទឹកនោមផ្អែម

សណ្ដែកកួរមានជាតិកាបូអ៊ីដ្រាត ដែលជាធាតុល្អចំពោះសុខភាពល្អ និងជាតិស្ករធម្មជាតិតិច។ វាក៏មានជាតិសរសៃច្រើន ដែលអាចជួយបន្ថយការរំលាយអាហារ និងអាចគ្រប់គ្រងជាតិស្ករក្នុងឈាមបានល្អ ហើយជួយការពារជំងឺទឹកនោមផ្អែម។

រូបតំណាង

៧.ល្អសម្រាប់ស្ត្រីមានផ្ទៃពោះ

ការសិក្សាបានរកឃើញថាការញ៉ាំអាហារដែលមានជាតិ folate ឬវីតាមីន B9 ច្រើនអាចបន្ថយហានិភ័យនៃបំពង់សរសៃប្រសាទដល់ទៅ ២៦% ។ បំពង់សរសៃប្រសាទមិនត្រូវបានបិទនោះទេទើបវាមិនបង្កគ្រោះថ្នាក់ដល់ទារកក្នុងផ្ទៃ ដោយជួយការពារពិការភាពពីកំណើតរបស់ទារក។ ម្ដាយដែលកំពុងមានផ្ទៃពោះ ឬមានគម្រោងចង់បានកូនគួរបរិភោគអាហារដែលធ្វើពីសណ្ដែក និងអាហារបំប៉នជាញឹកញាប់ ដើម្បីជួយកូនរបស់អ្នកកាត់បន្ថយគ្រោះថ្នាក់នៃជំងឺផ្សេងៗ និងទទួលបានសារធាតុចិញ្ចឹមផ្សេងទៀតបានគ្រប់គ្រាន់។

៨.កាត់បន្ថយគ្រោះថ្នាក់ជំងឺរលាកសន្លាក់

ការហើមជើងគឺបណ្ដាលមកពីជំងឺរលាកសន្លាក់ ដែលបង្កឡើងដោយការប្រមូលផ្តុំជាតិអាស៊ីតអ៊ុយរិចច្រើនពេកនៅក្នុងកជើង។ ការពិតយើងអាចបន្ថយអាស៊ីតអ៊ុយរិច និងបន្ថយហានិភ័យជំងឺរលាកសន្លាក់ ដោយគ្រាន់តែទទួលទានវីតាមីន C បន្ថែម។ យោងតាមការសិក្សាមួយបានរកឃើញថាអ្នកដែលទទួលទានវីតាមីន C ប្រមាណ ១០០០ -១៤៩៩ មិល្លីក្រាមជាប្រចាំ អាចកាត់បន្ថយហានិភ័យជំងឺរលាកសន្លាក់បានដល់ទៅ ៣១% ដូច្នេះគ្រាន់តែបរិភោគបន្លែ - ផ្លែឈើដែលមានវីតាមីន C ខ្ពស់ដូចជាសណ្ដែកកួរអាចការពារនេះបានយ៉ាងងាយស្រួល។

៩.មានសារធាតុប្រឆាំងអុកស៊ីតកម្ម

ទទួលទានសណ្ដែកកួរ នឹងការពារកោសិការបស់រាងកាយពីការពុល ឬសារធាតុពុលដែលបំផ្លាញរ៉ាឌីកាល់សេរីក្នុងខ្លួន រួមទាំងអាចកាត់បន្ថយការរលាកដែលកើតឡើងនៅក្នុងខ្លួនបានទៀតផង។

១០.ពង្រឹងបេះដូង។

ផលប្រយោជន៍នៃសណ្ដែកកួរមួយទៀតគឺអាចកាត់បន្ថយហានិភ័យជំងឺបេះដូងបានប្រសើរបំផុត។ ដោយសារតែប្រភេទនេះមានសារធាតុចិញ្ចឹម ដែលជួយបន្ថយកម្រិតកូឡេស្តេរ៉ុល ហើយកាត់បន្ថយគ្រោះថ្នាក់នៃការកកឈាម និងរក្សាបេះដូងឲ្យមានសុខភាពល្អ៕

ចុចអាន៖ផ្លែឈើរី ជានិមិត្តសញ្ញាផ្លូវភេទល្អបំផុត ប៉ុន្តែសម្រាប់សុខភាពរាងកាយក៏ល្អអស្ចារ្យដែរ!

ប្រភព៖ Kapook ប្រែសម្រួល៖ ទ្រី រ៉ាវី