តិចនិកជួយឱ្យស្បែកនៅតែក្មេងសម្រាប់នារីធ្វើការការិយាល័យ

2017-09-08 00:41:00
ចំនួនមតិ 0 | ចំនួនចែករំលែក 0

បច្ចុប្បន្ននារីធ្វើការក្នុងការិយាល័យភាគច្រើនតែងជួបប្រទះបញ្ហាស្បែក ដូចជា កើតមុន ស្បែកស្ងួត ឬចាស់ជាងវ័យ ដោយការធ្វើការជាមួយម៉ាស៊ីនត្រជាក់ អង្គុយមុខកុំព្យូទ័រយូរពេក ឬអារម្មណ៍តានតឹងជាមួយការងារពេកជាដើម។ អ៊ីចឹង Kanha សូមបង្ហាញវិធីថែរក្សាសម្រស់ងាយៗសម្រាប់នារីៗដែលរវល់នឹងការងារ ហើយឆាប់បានលទ្ធផល។

១- ម៉ាស្សាមុខមុនចូលគេង៖

ប្រើម្រាមដៃម៉ាស្សាថ្នមៗលើផ្ទៃមុខយ៉ាងហោចណាស់១៥នាទីមុនចូលគេងរាល់យប់ ដើម្បីទទួលបានស្បែកមុខទន់ រលោងនៅព្រឹកស្អែក។ ចាប់ផ្ដើមពីថ្ងាស ម៉ាស្សាដេញចុះមកដល់ថ្ពាល់និងចង្កា។ ចំណែកតំបន់ភ្នែក អ្នកអាចយកម្រាមដៃ៣ដាក់សង្កត់ថ្នមៗពីលើភ្នែកទាំងសងខាង ហើយអូសមករកត្រចៀក។ ធ្វើបែបនេះជាប្រចាំ អ្នកនឹងបានស្បែកទន់រលោង និងជួយឱ្យចរាចរណ៍ឈាមដើរបានស្រួល។

២- យកចិត្តទុកដាក់លើចម្ងាយនៃការអង្គុយមុខកុំព្យូទ័រ៖

តាមការសិក្សាថ្មីៗនេះ ចម្ងាយដែលល្អបំផុតរវាងកុំព្យូទ័រនិងភ្នែករបស់អ្នក គឺពី ៥០ទៅ៧០ស.ម។ ដូច្នេះអ្នកគួរចៀសវាងការដាក់អេក្រង់កុំព្យូទ័រកៀកនឹងមុខពេក។ ក្រៅពីនេះ ពន្លឺដែលជះចេញមក ក៏ជារឿងគួរឱ្យចាប់អារម្មណ៍ផងដែរ ដើម្បីគេចផុតពីបញ្ហាភ្នែកដែលបណ្ដាលមកពីចំណុចនេះ។

៣- លាងមុខដោយទឹកក្ដៅឧណ្ហៗ ក្រោយប្រើកុំព្យូទ័ររួច៖

អ្នកមានដឹងទេថា ការធ្វើការជាមួយកុំព្យូទ័រយូរពេកនឹងធ្វើឱ្យស្បែកទទួលរងជាតិវិទ្យុសកម្ម និងជាតិពុលដ៏ច្រើន? នេះមិនបានរាប់បញ្ចូល ម៉ាស៊ីនត្រជាក់ដែលធ្វើឱ្យស្បែកទៅជាស្ងួត និងចាស់ជាងវ័យផង។ ដូច្នេះ ក្រោយពេលប្រើកុំព្យូទ័ររួច គួរលាងសម្អាតផ្ទៃមុខដោយប្រើទឹកក្ដៅឧណ្ហៗ ដើម្បីបន្ថែមសំណើម និងបណ្ដេញជាតិពុលក្នុងស្បែកមុខ។ វានឹងធ្វើឱ្យរន្ធញើសអាចដកដង្ហើមបានស្រួល ហើយចៀសវាងការកើតមុនបានទៀត។

៤- ប្រើទឹករ៉ែសម្រាប់បាញ់មុខ៖

ដូចដឹងស្រាប់ហើយ ការងារក្នុងការិយាល័យនឹងធ្វើឱ្យស្បែកស្ងួត ហើយការផាត់មុខក៏មិនងាយជ្រាបចូលស្បែកបានល្អដែរ។ ដូច្នេះគួរប្រើទឹករ៉ែសម្រាប់បាញ់មុខ ដើម្បីបន្ថែមសំណើម ប៉ុន្តែត្រូវកាន់បាញ់ក្នុងរយៈចម្ងាយ១០ស.មទើបល្អ។

ទម្លាប់យប់ឡើងធ្វើរឿងអស់ទាំងនេះ ធានាថាស្អែកព្រឹកស្អាតបានពេញមួយតួខ្លួន

៥- ញ៉ាំទឹកឱ្យបានគ្រប់គ្រាន់៖

ការញ៉ាំទឹកឱ្យបានច្រើនគឺជាវិធីដ៏ល្អបំផុតសម្រាប់នារី។ ដោយសារទឹកគឺជាផ្នែកសំខាន់សម្រាប់ការលូតលាស់នៃរាងកាយ និងបណ្ដេញជាតិពុល គួរញ៉ាំទឹកឱ្យបានយ៉ាងហោចណាស់ ២លីត្រក្នុងមួយថ្ងៃដើម្បីឱ្យស្បែកនៅស្រស់ថ្លា និងមិនឆាប់ចាស់៕

អាថ៌កំបាំងធ្វើឲ្យសម្រស់មិនចេះចាស់ ស្រីៗមិនគួររំលង

ប្រភព៖ Eva ប្រែសម្រួល៖ សរ សុគន្ធី