កុំឲ្យគេថាយើងសាំ មនុស្សស្រីសម័យនេះត្រូវបោះចោលចរិត៤យ៉ាង

2017-08-31 04:40:00
ចំនួនមតិ 0 | ចំនួនចែករំលែក 0

ឈានចូលដល់សម័យថ្មី ស្រីៗយើងក៏ត្រូវវិវត្តខ្លួនឲ្យទាន់សម័យដែរ គឺត្រូវរឹងមាំ ចេះធ្វើអ្វីដោយខ្លួនឯង មិនចាំបាច់តាមទ្រអង្វរអ្នកណាឲ្យធ្វើឲ្យនោះទេ ហើយក៏មិនបាច់ចំណាយចិត្តទៅគិតរឿងតូចតាចមិនបានការជាច្រើនទៀតដែរ ព្រោះបើរវល់តែគិតសាំញ៉ាំពេក យើងប្រាកដជាដើរមិនទាន់គេទេសម័យនេះ។ ដូច្នេះហើយថ្ងៃនេះ Kanha នឹងបង្ហាញពីគន្លឹះខ្លះៗដើម្បីឲ្យនារីៗអាចផ្លាស់ប្ដូរខ្លួនឯងជាមនុស្សស្រីដ៏រឹងមាំបាន៖

១. មិនចាំទ្រអ្នកណា ជឿជាក់ ធ្វើខ្លួនឯងបាន

ជឿថានារីៗជាច្រើន បើមានសង្សារហើយ ប្រាកដជាចង់ឲ្យសង្សារយើងយកចិត្ត ចង់បានអ្វីក៏លួងលោមចិត្តគេ ឲ្យគេធ្វើតាមចិត្តយើង។ ជាមួយមិត្តភ័ក្ដិក៏ដូចគ្នា ពេលណាត់ជួបគ្នាម្ដងៗ ក៏ត្រូវចាំរហូតមានថ្ងៃជុំគ្នាបានៗទៅ។ អីចឹងៗអីមានធុញខ្លះអត់? បើមិនចង់សាំចិត្ត និងមានអារម្មណ៍បែបនេះញឹកញាប់ទេ ក៏មិនចាំបាច់ខ្វាយខ្វល់ពីអ្នកដទៃឲ្យលើសលប់ពេកដែរ គួរខ្វល់ពីខ្លួនឯងវិញល្អជាង ព្យាយាមធ្វើអ្វីដោយខ្លួនឯង បើគេមិនទៅ យើងទៅម្នាក់ឯងក៏បាន។

២. មាត់ខុសពីចិត្ត

តើទៅចំណាយពេលទ្រាំនឹងអ្វីដែលធ្វើឲ្យយើងពិបាកចិត្ត ឬមិនចូលចិត្តច្រើនធ្វើអី? មិនចូលចិត្តក៏គឺមិនចូលចិត្ត ក្លាហាននិយាយវាចេញមក ឲ្យគេមានអារម្មណ៍ក្រែងចិត្តយើងខ្លះ ព្រោះអ្នកខ្លះទាល់តែនិយាយឲ្យចំៗទើបបាន។ ទម្លាប់និយាយបញ្ឆិតបញ្ឆៀងក៏គួរតែកែប្រែដូចគ្នា។ កុំរំពឹងឲ្យអ្នកដទៃទស្សន៍ទាយចិត្តយើងគ្រប់ពេល និយាយឲ្យត្រង់ៗទៅបញ្ហានឹងឆាប់ចប់។

៣. មិនឆាប់ខឹង និងគិតច្រើនលើបញ្ហាដែលមិនមែនជាបញ្ហា

ជារឿងពិបាកមួយក្នុងការមើលពិភពលោកក្នុងផ្លូវវិជ្ជមានគ្រប់ពេល ក៏ប៉ុន្តែបើគិតវិជ្ជមានឲ្យបានច្រើនជីវិតយើងក៏ដំណើរទៅដោយវិជ្ជមានច្រើនដែរ ដូច្នេះកុំឲ្យបញ្ហាតូចមួយចូលមកបំផ្លាញសតិអារម្មណ៍ និងផ្លូវចិត្តយើងងាយពេក។ គួរបណ្ដោយៗខ្លះ កុំចំណាយពេលជាមួយរឿងដែលគ្មានប្រយោជន៍ទាំងនោះឡើយ ព្រោះពេលវេលាយើងមានតម្លៃ ត្រូវរកអ្វីធ្វើដែលមានប្រយោជន៍ និងអាចឲ្យយើងសប្បាយចិត្តវិញល្អជាង។

៤. ឈប់ដ្រាម៉ា ប្រើពេលវេលាឲ្យមានប្រយោជន៍

ជីវិតគូមិនមែនជារឿងងាយ ហើយក៏មិនលំបាកដែលស្រីៗយើងធ្វើមិនបានដែរ គ្រាន់តែថាកុំទៅដ្រាម៉ាអ្វីឲ្យលើសលប់ពេក។ មនុស្សម្នាក់ៗមានតួនាទីការងារខុសៗគ្នា គាត់ធ្វើការ យើងក៏ធ្វើការ ឬគាត់រៀន យើងក៏រៀន… ហេតុអ្វីត្រូវឲ្យគេទូរសព្ទមក ចង់ដឹងថាគេនៅឯណា កំពុងធ្វើអ្វីគ្រប់ពេល? កុំបណ្ដោយឲ្យសំណួរទាំងអស់នេះមកញាំញីចិត្តរបស់យើងបាន គួរយកពេលទៅធ្វើអ្វីឲ្យមានប្រយោជន៍ និងអារម្មណ៍ល្អឲ្យខ្លួនឯងវិញល្អជាង ដូចជាដើរផ្សារឲ្យសប្បាយចិត្ត ទៅទិញផ្កា ឬដើមឈើមកដាំ ធ្វើសួន អានសៀវភៅ មើលរឿង មើលប្រលោមលោក។ល។ អាចធ្វើអ្វីច្រើនយ៉ាង ហើយពេលនោះអ្នកនឹងភ្លេចអារម្មណ៍ទាំងនោះដោយឯកឯង។

ងាយៗទេ ធ្វើបានប៉ុណ្ណេះធានាថានឹងកាន់តែមានអារម្មណ៍មានក្ដីសុខ ហើយរឹតតែសំខាន់គឺយើងនឹងកាន់តែមានមោទនភាព និងជឿជាក់លើខ្លួនឯង ដែលអាចធ្វើអ្វីៗដោយខ្លួនឯងបានដោយមិនចាំតែពឹងនរណាដូចពីមុន ៕