ប្រុសៗដូចត្រូវឆ្នោតលេខធំអ៊ីចឹង បើមានប្រពន្ធធ្វើចំណុចទាំងនេះបាន

2017-08-30 02:49:49
ចំនួនមតិ 0 | ចំនួនចែករំលែក 0

ត្រូវឆ្នោតស្នេហាគឺអស្ចារ្យជាងត្រូវឆ្នោតលុយទៅទៀត ព្រោះការរកបានមនុស្សដែលអាចយល់ចិត្តនិងធ្វើរឿងល្អៗដើម្បីយើង គឺជារឿងដ៏កម្រណាស់ ហើយទង្វើខាងក្រោមនេះរបស់ភរិយា អាចបញ្ជាក់ថា អ្នកជាមនុស្សមានសំណាងបំផុតដែលអាចរកបាននារីល្អម្នាក់ចូលមកក្នុងជីវិត។

១- នាងតែងធ្វើជាមិត្តដ៏ល្អម្នាក់៖

នាងតែងនៅទីនោះសម្រាប់អ្នក។ បានន័យថា មិនត្រឹមតែដើរតួនាទីជាប្រពន្ធ បម្រើកិច្ចការក្នុងផ្ទះ និងរឿងលើគ្រែ ប៉ុន្តែនាងតែងជួយចាំស្ដាប់រឿងរបស់អ្នក និងធ្វើឱ្យអ្នកមានអារម្មណ៍កក់ក្ដៅពេលនៅក្បែរនាង ដោយមិនចាំបាច់ខ្លាចចិត្ត ឬត្រូវលាក់បាំងរឿងអ្វីឡើយ។

២- អ្នកជាអាទិភាពរបស់នាង៖

គ្រប់រឿងរ៉ាវទាំងឡាយ នាងតែងគិតដល់អ្នក និងពិភាក្សាជាមួយអ្នកជានិច្ច។ នេះបង្ហាញថា នាងចាត់ទុកអ្នកជាមនុស្សសំខាន់បំផុតក្នុងជីវិតនាង ដូច្នេះអ្នកក៏ត្រូវចាត់ទុកនាងជាវត្ថុមានតម្លៃក្នុងជីវិតដូចគ្នាដែរ។

៣- នាងនៅតែប្រើពាក្យផ្អែមល្ហែមដូចពេលស្រលាញ់គ្នាដំបូង៖

មិនមែនរៀបការហើយ ការប្រើប្រាស់ភាសាត្រូវប្ដូរជាធម្មតាទេ។ ការនៅតែប្រើពាក្យផ្អែមចាក់ទឹកមិនលិច ដូចជាអូនស្រលាញ់បង ឬថ្ងៃនេះបងសង្ហាណាស់ ឬបញ្ចេញកាយវិការម្ញ៉ិកម្ញ៉ក់គួរឱ្យក្នាញ់ គឺជាអ្វីដែលប្ដីប្រពន្ធត្រូវនិយាយដាក់គ្នាដើម្បីបង្កើនភាពស្និទ្ធស្នាលជាងមុន។

៤- នាងតែងគាំទ្រអ្នកគ្រប់កាលៈទេសៈ៖

បើពេលអ្នកជួបរឿងតុកសិក ឬពិបាកចិត្តបំផុត ហើយមានតែនាងដែលជាអ្នកញញឹមដាក់ និងលើកទឹកចិត្តអ្នក បានន័យថា អ្នកជាមនុស្សមានសំណាងផុតលេខហើយ។ ភរិយាដែលមិនចាំតែបន្ទោសពេលប្ដីធ្វើខុស ហើយចេះជួយគាំទ្រ និងឱ្យកម្លាំងចិត្ត គឺមិនងាយរកបានច្រើននោះទេ។

៥- ធ្វើរឿងភ្ញាក់ផ្អើលសម្រាប់អ្នក៖

ទោះបីរវល់យ៉ាងណា តែនាងតែងឆ្លៀតពេលធ្វើរឿងភ្ញាក់ផ្អើលសម្រាប់ថ្ងៃពិសេសរបស់អ្នក។ នាងជានារីដែលឱ្យតម្លៃលើស្នេហានិងអាពាហ៍ពិពាហ៍មួយនេះខ្លាំងបំផុតហើយ។ កុំធ្វើអ្វីឱ្យនាងឈឺចាប់ឱ្យសោះ ព្រោះនាងជានារីក្នុងសុបិនដែលមនុស្សប្រុសគ្រប់គ្នាប្រាថ្នាចង់បាន។ បើអ្នកធ្វេសប្រហែស មិនខ្វះទេ អ្នកចង់បាននាង។

៦- ខំប្រឹងធ្វើការ និងចេះទុកដាក់លុយកាក់យ៉ាងចំណាប់៖

បើនាងសុខចិត្តបង្កើនការធ្វើការងារជាងពេលនៅលីវដើម្បីរកលុយ នាងកំពុងបង្ហាញថា នាងស្រលាញ់គ្រួសារនេះខ្លាំង នាងមិនអាចបណ្ដោយឱ្យគ្រួសារតូចរបស់នាងជួបវិបត្តិហិរញ្ញវត្ថុ ឬមានបញ្ហាអ្វីឡើយ។ ដូច្នេះគួរចេះជួយលើកទឹកចិត្តនាង និងពង្រឹងខ្លួនអ្នកបន្ថែមដើម្បីឱ្យនាងឃើញថា អ្នកក៏មិនបណ្ដោយឱ្យនាងលំបាកតែម្នាក់ឯងដែរ គឺសុខចិត្តលះបង់ដើម្បីគ្រួសារជាមួយគ្នា៕

ចុចអាន៖

ប្រភព៖ powerful ប្រែសម្រួល៖ សរ សុគន្ធី