អ្នកណាថាការហើយស្រួល? ៧រឿងពិតពីជីវិតក្រោយរៀបការ ដែលខុសឆ្ងាយពីអ្នកគិត

2017-08-30 01:02:00
ចំនួនមតិ 0 | ចំនួនចែករំលែក 0

នៅក្នុងភាពយន្ត ការរៀបការច្រើនត្រូវបានចាត់ទុកជា Happy Ending ក៏ប៉ុន្តែសម្រាប់ការពិត គ្រប់គ្នាប្រាកដជាបានដឹងហើយថានេះគឺជាការចាប់ផ្ដើមដំណាក់កាលថ្មីមួយទៀតក្នុងជីវិត ហើយសម្រាប់អ្នកដែលមិនធ្លាប់រស់នៅជាមួយគ្នាមុនរៀបការ ប្រាកដជាមិនដឹងឡើយថាជីវិតក្រោយរៀបការនោះវាមានសភាពបែបណា។ ដូច្នេះថ្ងៃនេះ Kanha សូមចែករំលែកខ្លះៗតែម្ដងពីរឿងនេះ៖

១. ចរិតដែលភាគីទាំងសងខាងធ្លាប់លាក់មុនរៀបការនឹងត្រូវបញ្ចេញមក

នៅពេលអ្នកបានរស់នៅជាមួយនរណាម្នាក់មួយរយៈហើយ អាកប្បកិរិយាល្អៗឥតខ្ចោះនឹងចាប់ផ្ដើមរលាយបាត់។ អ្នកនិងគាត់ប្រាកដជាលែងចំណាយច្រើនដើម្បីតែងខ្លួនដូចកាលមុន លែងប្រយ័ត្នប្រយែងពេលញ៉ាំអាហារ ពេលដើរលេង ឬសូម្បីតែពេលនិយាយស្ដី (ដែលអាចប៉ះពាល់ដល់ផ្លូវចិត្តភាគីម្ខាងទៀតដោយមិនដឹងខ្លួន) ឬសូម្បីតែរឿងតូចតាច ដែលអ្នកធ្លាប់មើលរំលង នឹងអាចធ្វើឲ្យអ្នកមិនសប្បាយចិត្ត ព្រោះនឹងត្រូវឃើញវាកាន់តែញឹកញាប់ពេលរស់នៅជាមួយគ្នា។

២. អាចមានភាពអស់សង្ឃឹមកាន់តែច្រើនលើភាគីម្ខាងទៀត

ក្រោយពីបានចាប់ផ្ដើមជីវិតគូជាមួយគ្នាមួយរយៈ អ្នកទាំងពីរនឹងចាប់ផ្ដើមតាំងក្ដីសង្ឃឹមលើភាគីម្ខាងទៀតកាន់តែច្រើន ប៉ុន្តែអ្វីដែលជាការពិតសម្រាប់គូភាគច្រើននោះគឺ ម្នាក់ៗនឹងមានអារម្មណ៍ថាមិនចាំបាច់ទាក់ទាញចំណាប់អារម្មណ៍គ្នាដូចមុនទេ។ ដូច្នេះការចេញញ៉ាំអាហារពេលល្ងាចនៅហាងទំនើបៗ ការទទួលកាដូញឹកញាប់អីជាដើម នឹងត្រូវបានកាត់បន្ថយ។

៣. អ្នកនឹងមិនបាននៅជាមួយគ្នាគ្រប់ពេលគ្រប់វេលានោះឡើយ

បើការងារអ្នកខុសគ្នានោះ វានឹងកាន់តែធ្វើឲ្យអ្នកទាំងពីរមិនបានចំណាយពេលជាមួយគ្នាកាន់តែច្រើនទៀត ព្រោះថាអ្នកត្រូវប្រឹងធ្វើការសន្សំលុយដើម្បីអនាគតគ្រួសារ និងកូន។ អ្នកត្រូវទទួលស្គាល់ថា អ្នកទាំងពីរនឹងគ្មានពេលអង្គុយ Sweet ជាមួយគ្នាដូចក្នុងរឿងភាគ ឬផ្ញើសារឲ្យគ្នាគ្រប់ពេលដូចពេលស្រឡាញ់គ្នាដំបូងៗឡើយ ក្រៅត្រូវប្រាប់គ្នាថា របស់ប្រើប្រាស់ក្នុងផ្ទះអស់ហើយ ភ្លេចបិទទឹក ល្ងាចនេះមានប្រជុំ ឬមានជប់លៀងជាមួយអតិថិជន។ ចំណុចនេះអ្នកអាចនិយាយដោះស្រាយគ្នាដោយត្រង់ៗ បើសិនជាអាកប្បកិរិយាគេកាន់តែសោះអង្គើយ។

៤. រឿងតូចៗនឹងក្លាយជារឿងធំ

នៅពេលអ្នករស់នៅជាមួយគ្នាហើយ វានឹងត្រូវមានរឿងរំខានចិត្ត ដែលពីមុនឡើយអ្នកធ្លាប់តែមើលរំលង ដូចជា ហេតុអ្វីគាត់បត់ជើងតូចហើយអត់ចុចទឹក គាត់គេងស្រមុក គាត់ស្រវឹងហើយធុំក្លិនស្រាឡើងងួង គាត់មិននាំអ្នកចេញក្រៅនៅថ្ងៃសម្រាក តែបែរអង្គុយលេងតែហ្គេម -ល-។ ទាំងអស់នេះបើមិនបាននិយាយគ្នាឲ្យបានល្អតាំងពីដំបូងទេ វាប្រាកដជាអាចក្លាយជាបញ្ហាធំសម្រាប់អ្នកទាំងពីរបាន។

៥. ជីវិតផ្លូវភេទមិនដូចការរំពឹងទុក

ហេតុអ្វីទៅ? ហេតុផលមានច្រើន មួយអាចដោយសារអ្នកនឹងយល់ថាវាដដែលៗគ្មានអ្វីថ្មី ហើយក៏អាចមកពីមូលហេតុជុំវិញខ្លួនច្រើនទៀតដូចជាបញ្ហាការងារ បញ្ហាគ្រួសារ ដែលធ្វើឲ្យជីវិតផ្លូវភេទទាំងគូលែងរំភើបដូចដំបូងៗ។ បើសិនវាធ្ងន់ធ្ងររហូតអ្នកមិនអាចទទួលយកបាន គួរប្រញាប់រកវិធីដោះស្រាយភ្លាម ព្រោះសិចក៏ជាចំណែកសំខាន់មួយដែរសម្រាប់ជីវិតគូ។

៦. អ្នកនឹងចាប់ផ្ដើមគិតដល់ ការបែកគ្នា

ព្រោះមនុស្សយើង ចូលចិត្តអ្វីដែលនៅគង់វង្សហើយក៏តែងមានការភ័យខ្លាច។ នៅពេលអ្នកចាប់ផ្ដើមរស់នៅជាមួយគ្នាមកដល់ចំណុចមួយ យូរៗម្ដងអ្នកនឹងគិតថា “ចុះបើថ្ងៃមួយយើងត្រូវបែកគ្នា?... តើត្រូវធ្វើយ៉ាងណា?” ហើយក៏ចេះតែខ្វល់ខ្វាយចិត្ត។ ដូច្នេះហើយបើជីវិតគូអ្នកមើលទៅគ្មានបញ្ហាអ្វីទេ អ្នកគួរឈប់គិតពីរឿងនេះដើម្បីកុំឲ្យស្ត្រេសខ្លាំងពេក។

៧. ផ្ទះបង ផ្ទះអូន បញ្ហាបង បញ្ហាអូន

ត្រូវទទួលស្គាល់ថា គ្រប់គូប្រាកដជាជួបបញ្ហានេះ មិនថាជាបញ្ហាតូច ឬធំ ក៏សុទ្ធតែអាចបង្ករឿងមិនចុះសម្រុងសម្រាប់អ្នកទាំងពីរទាំងអស់។ ពេលខ្លះអ្នកឬគាត់អាចគ្រាន់តែរអ៊ូឲ្យធូរចិត្ត តែបែរជាធ្វើឲ្យអ្នកម្ខាងទៀតខឹងច្រឡោត ឬមានបញ្ហាខ្លះអ្នកក៏មិនហ៊ានហើបមាត់និយាយប្រាប់ដៃគូរហូតវាក្លាយជាបញ្ហាធំ។ បើមិនមែនបញ្ហារវាងប្ដីប្រពន្ធ ក៏ជាបញ្ហារវាងឪពុកម្ដាយ បងប្អូន សាច់ថ្លៃ ដែលទាំងអស់នេះគឺទាមទារឲ្យអ្នកត្រូវអត់ធ្មត់ច្រើនទើបមានសុភមង្គល។

អាចនៅមានបញ្ហាជាច្រើនទៀតដែល Kanha រៀបរាប់មិនអស់ ក៏ប៉ុន្តែនេះក៏មិនមែនមានន័យថាជីវិតអាពាហ៍ពិពាហ៍ពិតជាគួរឲ្យខ្លាចនោះដែរ គ្រាន់តែអ្នកត្រូវត្រៀមខ្លួនទទួលវាឲ្យបានល្អ។ គ្រប់ជីវិតគូសុទ្ធតែអាចជួបបញ្ហា តែបញ្ហាទូទៅនឹងអាចដោះស្រាយបានដរាបណាមានការយោគយល់ ដឹងចិត្តគ្នា និងព្រមពិភាក្សាគ្នាដោយបើកចំហ ៕

ប្រភព៖ Spiceee ប្រែសម្រួល៖ ស្វាយ វ៉ាន់ថន