ទង្វើច្បាស់ៗបង្ហាញថា អ្នកអត់គូយូរពេកជាមនុស្ស Drama ខ្លាំង

2017-08-28 03:07:19
ចំនួនមតិ 0 | ចំនួនចែករំលែក 0

រឿងស្នេហា គ្មានអ្នកណាអាចចៀសបាន ប៉ុន្តែមិនមែនឱ្យតែដល់វ័យគ្រប់ការ ឬវ័យចេះមានមនោសញ្ចេតនាសុទ្ធតែអាចរកបានមនុស្សដែលខ្លួនពេញចិត្តនោះទេ។ អ្នកអត់គូភាគច្រើនតែងនិយាយលួងខ្លួនឯងថា អត់សង្សារក៏គ្មានអីត្រូវពិបាកចិត្តដែរ ព្រោះមានសេរីភាពពេញទី ប៉ុន្តែការពិតក្នុងចិត្តអាចនឹងអង្គុយកើតទុក្ខផងក៏មិនដឹង។

ទង្វើមួយចំនួនខាងក្រោមនេះ នឹងបង្ហាញយ៉ាងច្បាស់ថា អ្នកដែលអត់គូយូរពេក ឬបរាជ័យរឿងស្នេហាច្រើនដងពេក គឺជាមនុស្សចូលចិត្តស្រមើស្រមៃ និងកុហកខ្លួនឯងខ្លាំង៖

១- មាត់ថាសប្បាយចិត្ត តែចូលចិត្តផុសអ្វី Sad Sad៖

ពីខាងក្រៅ តែងប្រាប់គេថា អត់មានត្រូវខ្វល់ទេ អត់សង្សារក៏មិនបញ្ហាដែរ គឺសប្បាយចិត្តសឹងអី តែបើចូលមើលក្នុង Facebook វិញ ភាគច្រើននៃ Status ម្នាក់នោះ ចូលចិត្តផុសអ្វីចម្លែកៗ ពាក្យខ្លះអត់ក្បាលអត់កន្ទុយ ហើយចូលចិត្តបញ្ចេញអារម្មណ៍ខ្លាំង ទោះរឿងខ្លះមិនធំដុំក៏ដោយ។

២- ចូលចិត្តមើលរឿងស្នេហាជាងរឿងផ្សេង៖

ទោះបីពេលនេះមិនទាន់មានសង្សារក៏ដោយ ប៉ុន្តែរឿងដែលចូលចិត្តមើលបំផុត គឺរឿងស្នេហា ហើយឱ្យតែមើលហើយ ឃើញគូស្នេហ៍នៅក្នុងរឿងតែងនឹកស្រមៃថាខ្លួនអាចមានពេលវេលាដូចគេដែរ រហូតពេលខ្លះយល់សប្ដិផងក៏មាន។

៣- ញ៉ាំច្រើនរហូតឡើងគីឡូ៖

ដោយសារតែគ្មានសង្សារ គ្មានអ្នកណាដាស់តឿនរឿងរូបសម្រស់ ឬគ្មានអ្វីត្រូវផ្គាប់ចិត្តអ្នកណា ពួកគេតែងញ៉ាំច្រើនឱ្យតែពេលឃ្លាន រហូតឡើងគីឡូដោយមិនដឹងខ្លួន។

៤- ពេលមានគេ Add មក ចេះតែស្រមៃថាគេចាប់អារម្មណ៍លើខ្លួន៖

អ្នកអត់គូភាគច្រើនតែងប្រើប្រាស់បណ្ដាញសង្គមដើម្បីចាប់ផ្ដើមទំនាក់ទំនងរបស់ពួកគេ។ ដូច្នេះហើយ ភាគច្រើននៃអ្នកអត់គូ ឱ្យតែមានមនុស្សផ្ទុយភេទ Add មក តែងគិតថា គេអាចនឹងចាប់អារម្មណ៍លើខ្លួន ហើយពេលខ្លះស្រមៃថា អាចក្លាយជាសង្សារគ្នាក៏មាន។

៥- ឱ្យតែគេមកនិយាយរក ឬលេងជាមួយ គិតថាគេចាប់អារម្មណ៍លើខ្លួន៖

នៅក្រៅបណ្ដាញសង្គមវិញ អ្នកអត់គូយូរក៏អាចកើតអារម្មណ៍ស្រមើស្រមៃដែរ។ និយាយរួម ពេលមានមនុស្សផ្ទុយភេទមកលេងសើចជាមួយ ប៉ះដៃប៉ះជើង ឬសរសើរបន្តិច នឹងគិតថាគេចាប់អារម្មណ៍លើខ្លួន ហើយពេលណាគេព្រងើយមិនសូវលេងជាមួយ បែរជាកើតចរិតខឹង ឬធ្វើងរប្រចណ្ឌគេ ពេលឃើញគេលេងជាមួយអ្នកផ្សេង ទាំងដែលគេមិនដឹងខ្លួនសោះ៕

ចុចអាន៖

អត្ថបទ៖ សរ សុគន្ធី