ស្រីៗអត់គូយូរ ងាយកើតជំងឺស្រមើស្រមៃ

2017-07-07 10:50:51
ចំនួនមតិ 0 | ចំនួនចែករំលែក 0

គ្រាន់តែគេសួរសុខទុក្ខបន្តិច យកចិត្តទុកដាក់បន្តិច គឺដឹងតែគិតថាគេលួចស្រលាញ់យើងតែម្ដង។ ដឹងខ្លួនឡើងបងប្អូនស្រីទាំងអស់គ្នា នេះគ្រាន់តែជាសុជីវធម៌របស់មនុស្សគ្រប់រូបនោះទេ។ កុំចេះតែស្រមើស្រមៃហើយឈឺតែម្នាក់ឯងនោះ។

នឹងទៅជាយ៉ាងណាចំពោះស្រីនៅលីវយូរឆ្នាំ? មិត្តភ័ក្ដិគិតថាវាយឫក ឪពុកម្ដាយគិតថារើសពេក សាច់ញាតិគិតថា ចាស់ហើយនៅរើសទៀត។ តែការពិតចំពោះស្រីនៅលីវយូរ អត់អ្នកស្រលាញ់យូរទៅក៏ធ្លាប់ ពេលខ្លះគិតថាខ្លួនក៏មិនអី មិនស្អាតពេកតែក៏មិនអាក្រក់ តែហេតុអីអត់មានអ្នកស្រលាញ់?

តែដល់ពេលអត់គូយូរទៅ ចាប់ផ្ដើមកើតជំងឺស្រមើស្រមៃ។ បើទោះបីជាចង់បដិសេធយ៉ាងណាក៏ដោយ ក៏មាននារីចំនួនមិនតិចទេដែលកើតជំងឺនេះ។ ជាក់ស្ដែងដូចជា គ្រាន់តែគេសួរនាំប៉ុន្មានម៉ាត់ ញញឹមដាក់ម្ដងឬ២ដង ដឹងតែគិតថាគេមានចិត្តលើខ្លួនតែម្ដង។ ដល់ពេលអញ្ចឹងទៅ ចាប់ផ្ដើមទៅនិយាយរកគេ ហើយត្រូវគេធ្វើហីមិនរវីរវល់ជាមួយ បើមិនដូច្នោះទេក៏ត្រូវគេបដិសេធតាមត្រង់តែម្ដងក៏មាន។

ហើយនៅពេលមានគេប៉ះដៃបន្តិច ក៏មានអារម្មណ៍ថាដូចត្រូវភ្លើងឆក់ គិតថាគេលួចចាប់ចិត្តលើខ្លួនយូរហើយ មិនមែនអញ្ចឹងទេ គឺអចេតនា អចេតនាតែប៉ុណ្ណោះ។ ត្រូវអស់សង្ឃឹមជាច្រើនដង តែជំងឺនេះនៅតែកើតមាន ហើយមានតែធ្ងន់ជាងមុនទៅទៀត។

តែកុំបន្ទោសស្រីៗអត់គូយូរអី ព្រោះពួកគេក៏ទន់ខ្សោយណាស់ដែរ មាត់ឆ្នាស ហើយកុហកចិត្តខ្លួនឯងថាមិនត្រូវការស្នេហា តែការពិតពួកគេក៏ឯកាណាស់ដែរ។ ពេលឃើញគូគេដើរកាន់ដៃលើផ្លូវក៏កើតមានចិត្តចង់មានគូនឹងគេ តែធ្វើម៉េចគូយើងមិនទាន់មកដល់ មានតែរង់ចាំបន្តទៀត៕