រឿងមួយចំនួនដែលស្រីៗគួរដឹងបើចង់សាក់រូប

2017-07-19 08:53:03
ចំនួនមតិ 0 | ចំនួនចែករំលែក 0

រូបសាក់អាចជាគ្រឿងលម្អមួយពេញនិយមសម្រាប់យុវវ័យដែលចង់លេងស្ទីលប្លែកៗ។ ទោះយ៉ាងណាក៏ដោយ មានរឿងមួយចំនួនដែលអ្នកគួរពិចារណាមុនពេលសម្រេចចិត្តសាក់រូប៖

១. ធ្វើការស្រាវជ្រាវជាមុន៖ ស្វែងរកព័ត៌មានឲ្យបានច្រើនពីហាងដែលយើងចង់ទៅសាក់ និងអ្នកជំនាញសាក់រូបជាដើម។ គួរកុំខ្លាចនឹងចំណាយពេលស្វែងរកឲ្យបានល្អិតល្អន់អី។

២. ចំណាយពេលទៅសួរនាំនៅហាងនោះផ្ទាល់៖ បន្ទាប់ពីរកបានព័ត៌មានហើយគឺត្រូវទៅដោយផ្ទាល់ដើម្បីមើលថាហាងនោះមានអនាម័យទេ អ្នកសាក់នោះមានជំនាញទេ ហើយតម្លៃវិញយ៉ាងណា។ កុំខ្លាចនឹងដើរមើលឲ្យបានច្រើនហាងសិនចាំសម្រេចចិត្ត។

៣. ធ្វើការណាត់ជួប៖ ជាពិសេសសម្រាប់អ្នកដែលសាក់ដំបូង។ ខាងអ្នកសាករូបនឹងពិភាក្សា ហើយឲ្យពេលយើងពិចារណាម្ដងទៀតមុនចាប់ផ្ដើមសាក់។

៤. ត្រូវប្រាកដក្នុងចិត្តថាអ្នកពិតជាចង់បានវា៖ ព្រោះវានឹងជាប់ខ្លួនយើងមួយជីវិត។ ម្យ៉ាងទៀត អ្នកក៏ត្រូវសួរខ្លួនឯងដែរថា តើវាប៉ះពាល់នៅកន្លែងធ្វើការទេ?

៥. គួរយកស្នាមសាក់ដែលយើងចង់បានទៅបង្ហាញអ្នកសាក់៖ ព្រោះបើយើងចេះតែរៀបរាប់ព្រាវៗនោះ លទ្ធផលចេញមកអាចខកចិត្ត។

៦. វាឈឺ៖ ប៉ុន្តែការឈឺចាប់អាចខុសគ្នាទៅតាមផ្នែកផ្សេងៗលើរាងកាយរបស់យើង។

៧. វានឹងជាប់រហូត៖ ពិតណាស់ថាអ្នកអាចនឹងលុបវានៅពេលក្រោយ តែអ្នកនឹងត្រូវចំណាយច្រើន ឈឺចាប់ខ្លាំង ហើយមិនអាចស្អាតដូចដើមទៀតផង។ យល់ល្អអ្នកគួរចាក់សាក់បណ្ដោះអាសន្នសិនដើម្បីមើលថាអ្នកពេញចិត្តវាទេ។

៨. ធ្វើតាមការណែនាំឲ្យបានខ្ជាប់ខ្ជួនបន្ទាប់ពីសាក់ហើយ៖ ឧទាហរណ៍ស្នាមសាក់ថ្មីៗមិនត្រូវឲ្យប៉ះពន្លឺថ្ងៃ ឬប៉ះនឹងទឹកសមុទ្រទេ៕