ថែទាំសុខភាពផ្លូវចិត្តឲ្យល្អ នោះអ្នកនឹងមិនជួបការភ័យខ្លាចហួសហេតុអំឡុង Covid-19កំពុងផ្ទុះ
- 2020-03-23 02:30:00
- ចំនួនមតិ 0 | ចំនួនចែករំលែក 0
ថែទាំសុខភាពផ្លូវចិត្តឲ្យល្អ នោះអ្នកនឹងមិនជួបការភ័យខ្លាចហួសហេតុអំឡុង Covid-19កំពុងផ្ទុះ
វីរុសកូរ៉ូណាបានធ្វើឲ្យពិភពលោកធ្លាក់ចុះក្នុងភាពអាប់អួរ ពិសេសនៅលើប្រព័ន្ធបណ្តាញសង្គមនានាគឺពោរពេញទៅដោយព័ត៌មានរាតត្បាតរបស់វីរុសមួយប្រភេទនេះ។ ស្របពេលគ្នានេះដែរ ព័ត៌មានអស់ទាំងនោះធ្វើឲ្យប្រជាពលរដ្ឋមានការភិតភ័យស្លន់ស្លោរជាហេតុធ្វើឲ្យពួកគេលែងគិតពីសុខភាពផ្លូវចិត្តយ៉ាងដំណំ។ ដូច្នោះតើគួរធ្វើយ៉ាងណាទើបថែរក្សាសុខភាពផ្លូវចិត្តរបស់អ្នកឲ្យបានល្អអំឡុងពេលការរីករាលដាលវីរុសកូរ៉ូណា? វីធីអស់ទាំងនោះមានដូចជា៖
១. កំណត់ព័ត៌មាននិងប្រុងប្រយ័ត្នរាល់ព័ត៌មានដែលអ្នកអាន
អ្នកត្រូវកំណត់ចំនួនពេលវេលានៃការអាននិងមើលព័ត៌មានទាំងឡាយណាដែលធ្វើឲ្យអារម្មណ៍អ្នកមិនសប្បាយចិត្ត។ ដូច្នោះ អ្នកត្រូវជ្រើសរើសពេលវេលាណាមួយដើម្បីពិនិត្យមើលព័ត៌មានអស់ទាំងនោះ។ ទន្ទឹងនឹងគ្នានេះដែរ រាល់ការអាននិងជឿលើព័ត៌មានណាមួយ អ្នកត្រូវស្វែងរកប្រភពព័ត៌មានឲ្យច្បាស់លាស់ដូចជា ក្រសួងសុខាភិបាលព្រះរាជាណាចក្រកម្ពុជា ក្រសួងសុខាភិបាលពិភពលោកជាដើម។
២. ផ្អាកប្រើប្រាស់បណ្តាញសង្គមមួយរយៈនិងនៅឲ្យឆ្ងាយពីរឿងកំពុងកើតឡើង
ស្ថិតនៅក្នុងស្ថានភាពបែបនេះ នៅតាមប្រព័ន្ធផ្សព្វផ្សាយសង្គមនានាតែងតែមានព័ត៌មានបង្ហោះជាច្រើន។ អ្នកនឹងទទួលបានសារឬសញ្ញានៅលើទូរស័ព្ទឬកុំព្យូរទ័ររបស់អ្នក ដូច្នោះ អ្នកដើម្បីកុំឲ្យរំខាន អ្នកអាចដាក់ mute notification ឬឈប់ប្រើគណនីយរបស់អ្នកមួយរយៈសិន។ ម្យ៉ាងវិញទៀត ប្រសិនបើអ្នកតាមដានព័ត៌មានណាងាយធ្វើឲ្យអ្នកឆាប់រំជួលចិត្តពេកនោះ អ្នកអាចលាក់ការបង្ហោះ (hide post) វាបាន។
៣. ថែរក្សាអនាម័យផ្ទាល់ខ្លួនឲ្យបានខ្ជាប់ខ្ជួន
អនាម័យផ្ទាល់ខ្លួនពិតជាមានសារៈសំខាន់ណាស់សម្រាប់ខ្លួនអ្នកនិងអ្នកនៅជុំវិញខ្លួន។ ត្រូវឧស្សាហ៍លាងដៃឲ្យបានស្អាតរាល់ពេលអ្នកចាប់កាន់របស់របរអ្វីមួយ ទទួលទានទឹកក្តៅឲ្យច្រើន សម្រាកឲ្យបានគ្រប់គ្រាន់ ពិសេសអ្នកក៏ត្រូវទទួលទានអាហារដែលផ្តល់សុខភាពអ្នកដែរ។
៤. រក្សាទំនាក់ទំនងជាមួយមនុស្សនៅជុំវិញខ្លួន
ត្រង់ចំណុចនេះមិនមែនឲ្យអ្នកជួបជុំផ្ទាល់នោះទេ មានន័យថា អ្នកគួរតែមានការប្រាស្រ័យទាក់ទងជាមួយក្រុមគ្រួសារ បងប្អូន មិត្តភក្ត័ និងមនុស្សជាទីស្រឡាញ់របស់ខ្លួន។ អ្នកអាចទាក់ទងពួកគេតាមលេងទូរស័ព្ទ អ៊ីម៉េល និងបណ្តាញសង្គមណាមួយ។
៥. ចៀសវាងការអស់កម្លាំង
ចំណុចចុងក្រោយនេះគឺអ្នកត្រូវរក្សាខ្លួនឯងឲ្យមានកម្លំាងក្នុងការបំពេញការងារផ្សេងៗ។ ទោះបីជាមានការធ្វើការពីផ្ទះក៏ដោយ អ្នកត្រូវតែថែរក្សាសុខភាពផ្លូវកាយនិងផ្លូវចិត្តឲ្យបានល្អដូចជា ធ្វើលំហាត់ប្រាណនៅផ្ទះដើម្បីបញ្ចេញជាតិពុល ញុំាអាហារប៉ូវៗឲ្យបានល្អ ពិសេសសូមឲ្យក្នុងខ្លួនមានសំណើមគ្រប់គ្រាន់ក្នុងអំឡុងស្ថានការណ៍បែបនេះ៕
រូបភាព៖ EMMA RUSSELL, Pinterest
ចុចអានបន្ត៖
ហេតុផលនៅពីក្រោយ ការផ្ទុះឡើងយ៉ាងលឿននៃកូវីដ១៩នៅអ៉ីតាលី