របស់ចាំបាច់ ៥ យ៉ាង គួរដាក់ក្នុងកាបូបយកតាមខ្លួនជានិច្ច ដើម្បីការពារកូវីដ១៩

  • 2020-03-20 08:20:00
  • ចំនួនមតិ 19 | ចំនួនចែករំលែក 840

ក្នុង​អំឡុង​ពេល​ដែល​វីរុស​កូរ៉ូណា កំពុង​តែ​វាយ​ឡុក​​ទៅ​ដល់​​គ្រប់ទិសទី រួម​ទាំង​​ប្រទេស​កម្ពុជា​ផង​នោះ ដូច្នេះ​​មាន​តែ​ការ​​ការពារ​​ និង​ប្រុង​ប្រយ័ត្ន​ឲ្យ​​បាន​ខ្ពស់​ប៉ុណ្ណោះ ទើប​ជា​អ្វី​ដែល​​មនុស្ស​គ្រប់​គ្នា​ត្រូវ​​ធ្វើ​​ពិត​ប្រាកដ។ មិន​មែន​​ត្រឹម​តែ​រក្សា​​អនាម័យ​នៅ​ក្នុង​ផ្ទះ​សម្បែង​នោះ​ទេ​ សូម្បី​តែ​ពេល​ចេញ​ទៅ​ខាង​ក្រៅ​ម្តង​ៗ មិន​ត្រូវ​​ភ្លេច​ដាក់​របស់​ចាំបាច់​ ៥ យ៉ាង​នេះ​ជាប់​ខ្លួន​ដាច់​ខាត។

១. ម៉ាស់​ការពារ

បើ​អ្នក​មិន​ពាក់​ម៉ាស់​ក្នុង​គ្រា​ដែល​​មាន​ហានិភ័យ​​ខ្ពស់​នឹង​​ការ​ឆ្លង​ជំងឺ​បែប​នេះ ហាក់​បី​ដូច​ជា​ប្រថុយ​នឹង​គ្រោះ​ថ្នាក់​ពេក​ហើយ។ ត្រូវ​ពាក់​ម៉ាស់​​នៅ​លើ​ខ្ទង់​ច្រមុះ​ឲ្យ​បាន​ជិត​ល្អ​​ដើម្បី​ការពារ​វីរុស​និង​មេរោគ​ផ្សេងៗ។ ត្រូវ​ដាក់​ម៉ាស់​សាគួរ​ផ្សេង​មួយ​ទៀត ដើម្បី​ផ្លាស់​ប្តូរ​​ថ្មី​បន្ទាប់​ពី​អ្នក​បោះ​ចោល​​​ម៉ាស់​ដែល​ពាក់​រួច​។

២. សំឡី​សម្លាប់​មេរោគ

មាន​មនុស្ស​ជា​​ច្រើន​មិន​​សូវ​បាន​ចាប់​អារម្មណ៍​នឹង​របស់​មួយ​នេះ ប៉ុន្តែ​​អ្នក​អាច​រក​ទិញ​បាន​នៅ​តាម​កន្លែង​លក់​ថ្នាំ​ពេទ្យ​មួយ​ចំនួន​។ វា​មាន​លក្ខណៈ​ជា​បន្ទះ​ៗ និង​មាន​ភាព​ងាយ​ស្រួល​សម្រាប់​សម្អាត​របស់របរ​ផ្សេង​ៗ ដែល​អ្នក​ប្រើ​ប្រាស់​​​ប៉ះ​​ញឹក​ញាប់​។

៣. ស្រ្ពៃយ៍​សម្លាប់​មេរោគ

ប្រសិន​​បើ​​មិន​ចង់​ប្រើ​ប្រាស់​​សាប៊ូ​ឬ​ទឹក​លាង​ដៃ អ្នក​ក៏​អាច​ជ្រើស​រើស​ការ​បាញ់​ស្រ្ពៃយ៍​ ១-២ ដង​​នៅ​លើ​បាត​ដៃ​​ហើយ​ត្រដុស​ចុះ​ឡើង​​ជា​ការ​ស្រេច។ ជាពិសេស​​អ្នក​​អាច​​យក​​វា​បាញ់​ទៅ​លើ​​របស់​របរ​រួម​ទាំង​​កន្លែង​ផ្សេងៗ​ផង​ដែរ។

៤. ទឹក​លាង​ដៃ

​​​មិន​អាច​ខ្វះ​បាន​ទេ ព្រោះ​ទឹក​លាង​ដៃ​មាន​តួនាទី​​​សំខាន់​ខ្លាំង​ណាស់​​​ក្នុង​ការ​សម្លាប់​មេរោគ​និង​បាក់ តេរី​នានា។ វា​​​មាន​ភាព​ងាយ​ស្រួល​​និង​អាច​​ប្រើ​ប្រាស់​ញឹកញាប់​ តាម​ដែល​អ្នក​ត្រូវ​ការ។

៥. កន្សែង​សើម

ពាក់​ម៉ាស់​និង​សម្អាត​ដៃ​ ប៉ុន្តែ​កុំ​ភ្លេច​​យក​​កន្សែង​សើម​ដែល​អាច​សម្លាប់​មេរោគ ទៅ​ជូត​លើ​សម្ភារ​ដែល​អ្នក​ប្រើប្រាស់​ជា​ប្រចាំ​​ផង។

ត្រូវ​យ​ក​ចិត្ត​ទុក​ដាក់​ប្រុង​ប្រយ័ត្ន​ការពារ​​ឲ្យ​បាន​ល្អ​បំផុត ដើម្បី​ខ្លួន​​ឯង ក្រុម​គ្រួសារ សង្គម​ជាតិ​និង​ពិភពលោក​ទាំង​មូល​៕​​​

ចុចអានបន្ត៖ តើនរណាខ្លះដែលមានហានិភ័យខ្ពស់ក្នុងការប្រឈមនឹងជំងឺ កូវីដ១៩?

ប្រភព៖ akerufeed ប្រែ​សម្រួល៖ ដេត ឈុនអ៉ី