វិធីបង្ការយ៉ាងមានប្រសិទ្ធភាពសម្រាប់មនុស្សចាស់ចៀសឆ្ងាយពី Covid-19

2020-03-20 06:15:00
ចំនួនមតិ 0 | ចំនួនចែករំលែក 0

តាំងពី Covid-19 ផ្ទុះឡើង អត្រាមនុស្សចាស់ស្លាប់និងឆ្លងកើនឡើងយ៉ាងគំហុកស្ទើរពេញពិភពលោក។ បើទោះជាមិនទាន់មានភស្តុតាងអះអាងថា មនុស្សចាស់ងាយរងហានិភ័យពី Covid-19 ក៏ដោយ តែក្រុមគ្រូពេទ្យចង្អុលបង្ហាញថា មនុស្សចាស់អាយុលើសពី៦០ឆ្នាំ គួរប្រុងប្រយ័ត្នខ្ពស់។ លើសពីនេះ អ្នកដែលមានជំងឺប្រចាំកាយដូចជា ជំងឺបេះដូង ទឹកនោមផ្អែម សួត ថ្លើម តម្រងនោម គឺត្រូវប្រយ័ត្នខ្ពស់ផងដែរ។ ដោយសារប្រព័ន្ធការពារមានភាពចុះខ្សោយជាងមនុស្សទូទៅ។

រូបតំណាង

ដូច្នេះ តើគេអាចយកចិត្តទុកដាក់មនុស្សចាស់ក្នុងគ្រួសារដើម្បីចៀសវាងការរងឥទ្ធិពលពី Covid-19 យ៉ាងដូចម្ដេច? ផ្អែកតាមមជ្ឈមណ្ឌលការពារនិងគ្រប់គ្រងស្ថានភាពជំងឺ (CDC) និងអង្គការសុខភាពពិភពលោក (WHO) បានបង្ហើបតិចនិកពីវិធីការពារសុខភាពសម្រាប់មនុស្សចាស់ នៅក្នុងផ្ទះរបស់អ្នកដូចខាងក្រោម៖

រូបតំណាង

១. យ៉ាងហោចណាស់ឲ្យមនុស្សចាស់លាងដៃនឹងសាប៊ូ ឬជែលឲ្យបាន២០វិនាទី ដើម្បីលាងជម្រះមេរោគបានសព្វល្អ។

២. កុំឲ្យមនុស្សចាស់យកដៃទៅប៉ះផ្ទាល់ ឬប៉ះរាងកាយរបស់អ្នកដទៃ។

៣. កុំឲ្យមនុស្សចាស់ទៅចូលរួមកន្លែងដែលមានមនុស្សច្រើនប្រមូលផ្ដុំ ឬទីសាធារណៈឲ្យសោះ។

៤. លាងឧបករណ៍ដែលមនុស្សចាស់ តែងប៉ះជារៀងរាល់ថ្ងៃ (យ៉ាងហោចម្ដងក្នុងមួយថ្ងៃ)

៥. កុំឲ្យមនុស្សចាស់ចៀសវាងការប្រើមធ្យោបាយសាធារណៈដូចជា ឡានក្រុង រថភ្លើងជាដើម

៦. ហាមការដើរលេងកម្សាន្តជាក្រុម ដូចជាដើរលេងក្រៅប្រទេស តាមកប៉ាល់ជាមួយភ្ញៀវទេសចរបរទេសជាដើម។

រូបតំណាង

៧. ចៀសវាងឲ្យមនុស្សចាស់ជួបមនុស្សនៅខាងក្រៅមួយរយៈ ឬសាច់ញាតិដែលកំពុងមានជំងឺ។

រូបតំណាង

៨. ប្រសិនបើមនុស្សចាស់ត្រូវចេញក្រៅដូចជាទៅផ្សារ ត្រូវរក្សាចម្ងាយឆ្ងាយពីគ្នាយ៉ាងហោចមួយម៉ែត្រ តាមដែលអាចទៅរួច។

៩. ប្រសិនបើមនុស្សចាស់តែងមានការណាត់ជាប្រចាំជាមួយវេជ្ជបណ្ឌិតដើម្បីបើកថ្នាំ សូមធ្វើការប្រឹក្សាជាមុនថាតើគួរទៅជួបផ្ទាល់ទៀត ឬមានវិធីណាមួយផ្សេង។ តើអាចប្រឹក្សាតាមរយៈ Video Call ឬក៏ស្នើឲ្យខាង Delivery ដឹកថ្នាំមកផ្ទះ? ឬអ្នកជំងឺអាចរកទិញប្រភេទថ្នាំទាំងនោះតាមឱសថស្ថានស្របតាមវេជ្ជបញ្ជា? ដើម្បីចៀសវាងធ្វើដំណើរទៅមន្ទីរពេទ្យ ដែលកំពុងវឹកវរដោយ Covid-19។

រូបតំណាង

១០. ប្រុងប្រយ័ត្នកុំឲ្យមនុស្សចាស់នៅឯកោ។ បើទោះវិធីនៅដាច់ដោយឡែកជាជម្រើសមានសុវត្ថិភាពប៉ុន្តែក៏ជះឥទ្ធិពលដល់ផ្លូវចិត្តរបស់មនុស្សចាស់ផងដែរ ដូច្នេះសមាជិកគ្រួសារត្រូវមើលថែទាំ ជជែកលេង ជាដើម ។ សាច់ញាតិគួរឧស្សាហ៍សួរសុខទុក្ខតាមរយៈ Video Call , Chat ជាដើម។

១១. ជំរុញឲ្យមនុស្សចាស់នៅបន្តសកម្មភាពដូចរាល់ដង ដូចជាហាត់ប្រាណ ឬគាត់តែងចូលចិត្តស្រោចផ្កានៅមុខផ្ទះជាដើម ។

១២. ប្រសិនបើឃើញមនុស្សចាស់មានចេញរោគសញ្ញាមិនប្រក្រតីដូចជាក្ដៅខ្លួន ហៀរសំបោរ ក្អក កណ្ដាស់ ឈឺក ពិបាកដកដង្ហើម គួរប្រញាប់ទាក់ទងទៅលេខ ១១៥ ជាបន្ទាន់។