កុំអាលខឹងមួម៉ៅពេលជួបរឿងខ្មៅងងឹត គួរសាកធ្វើបែបនេះសិន
- 2020-01-31 08:30:00
- ចំនួនមតិ 0 | ចំនួនចែករំលែក 0
កុំអាលខឹងមួម៉ៅពេលជួបរឿងខ្មៅងងឹត គួរសាកធ្វើបែបនេះសិន
មនុស្សជាច្រើនមានចិត្តដូចគ្នាមួយត្រង់ថា ចង់បានថ្ងៃណាក៏សប្បាយចិត្ត និងរឿងល្អៗដែរ។ តែទាស់ត្រង់ថា ស្ថានភាពខ្លះមិនមែនគ្រប់យ៉ាងសុទ្ធតែស្រស់បំព្រងគ្រប់ពេលឯណា រហូតពិបាកចៀសវាងធ្វើឲ្យខូចអារម្មណ៍ពេញមួយថ្ងៃ។ ម្ល៉ោះហើយ អ្នកក៏ត្រូវឆ្លាតវៃដោះស្រាយ បំផ្លាញគំនិតស្មុគស្មាញទាំងនោះចោល។
**១. កុំឲ្យការឆេវឆាវមកគ្របសង្កត់លើខួរក្បាលរបស់អ្នកបាន**
គេតែងនិយាយថា មនុស្សមានសិទ្ធជ្រើសរើសថាត្រូវធ្វើ ឬមិនធ្វើ។ បើអ្នកមិនចង់ទេ កុំឲ្យវាមកជះឥទ្ធិពលលើជីវិតរបស់អ្នកបានឲ្យសោះ។ ដោះស្រាយការឆេវឆាវក៏ដូចគ្នា។ បើអ្នកមិនចង់ពិបាកចិត្តទេ កុំអនុញ្ញាតឲ្យគំនិតអវិជ្ជមានគ្របដណ្ដប់លើអ្នកបានឲ្យសោះ។
២. បើកចិត្តមើលពិភពលោកដោយអព្យាក្រឹត្យ
ឈប់សម្លឹងពិភពលោកថា ខ្មៅហួសសម្រាប់អ្នកទៀតទៅ ព្រោះវិធីនេះមិនបានជួយអ្នកឲ្យដោះស្រាយគំនិតចង្អៀតចង្អល់បានឡើយ។ ត្រូវរកហេតុនិងផល កុំដាក់សម្ពាធលើខ្លួនឯងពេក។ គំនិតគិតអីមិនល្អ នឹងចាកចេញពីផ្លូវចិត្តរបស់អ្នកដោយឯកឯងមិនខាន បន្ទាប់ពីអ្នកលើកលែងឲ្យខ្លួនឯងដែរ។
៣. ឈប់រំខាន
បើអ្នកដឹងរួចហើយថា បញ្ហាដែលកំពុងប្រឈមបណ្ដាលមកពីផ្នត់គំនិតអវិជ្ជមានរបស់អ្នក ដូច្នេះសូមឈប់ផ្ដោតនិងគិតពីវាទៀតទៅ។ យកខ្លួនឯងចេញពីបញ្ហាទាំងនោះ ដោយឲ្យពេលវេលាខ្លួនឯងសម្រាក១០នាទី រក្សាចិត្តស្ងប់ប្រហែលជួយអ្នកបាន ហើយគិតថាមិនគួរបណ្ដោយខ្លួនឯងឲ្យខ្ជះខ្ជាយពេលលើរឿងអ៊ីចឹងៗទៀតទេ។
៤. ស្វែងរកអ្វីដែលជួយបន្លប់ចិត្តអ្នកបាន
ពេលកំពុងដុនដាបផ្លូវចិត្ត វិធីសាស្ត្រដោះស្រាយគឺលើកទឹកចិត្តខ្លួនឯងឲ្យមានថាមពលឡើងវិញ ដោយការស្ដាប់បទចម្រៀង ដើម្បីបន្ធូរបន្ថយ ឬរកអ្នកណាម្នាក់មកជជែកគ្នាលេង។ អ្នកនឹងមានអារម្មណ៍ធូរស្រាល ផ្លូវចិត្តល្អប្រសើរវិញ។
៥. រៀបចំខ្លួនឯងឡើងវិញ
អ្នកត្រូវសម្លឹងមើលខ្លួនឯងវិញម្ដង ដែលនេះពិតជាឥទ្ធិពលជ្រាលជ្រៅលើការគិតរបស់អ្នកខ្លាំងណាស់។ បើអ្នកមិនចង់ក្លាយជាមនុស្សគិតអីសូញសាញ ហើយមិនចង់ឲ្យវាជ្រាបចូលក្នុងជីវិតទេ ដូច្នេះត្រូវរៀនពង្រឹងអត្តចរិត និងការគិតសុទិដ្ឋិនិយម។ កុំអាលវិនិច្ឆ័យអ្វីជាមុន កុំគិតអីតែម្នាក់ឯង កុំគិតតែលើរឿងដដែរៗហ្នឹងទៀត ហើយក៏កុំអាលគិតតែលើលទ្ធផលអាក្រក់ៗពេកដែរ។ ចង់ក្លាយជាមនុស្សមានចិត្តស្ងប់ លុះត្រាតែអ្នកយល់ពីរឿងរ៉ាវដែលកំពុងប្រឈមនោះសិន៕
អានបន្ត៖ បញ្ឈប់ចរិតមនុស្សស្រីរឡិករឡក់ ឲ្យក្លាយជានារីចាស់ទុំម្នាក់ តាមវិធីទាំងនេះ