មនុស្ស ៥ប្រភេទ ដែលតែងជួបរឿងពិបាកចិត្ត ខូចចិត្តច្រើនជាងអ្នកដទៃ

2020-01-03 03:00:00
ចំនួនមតិ 0 | ចំនួនចែករំលែក 0

បុគ្គល ៥ប្រភេទខាងក្រោមនេះ ត្រូវបានគេសង្កេតឃើញថារងការពិបាកច្រើនជាងបុគ្គលទូទៅ។ ពួកគេមាននិស្ស័យល្អពីកំណើត ប៉ុន្តែចំណុចខ្សោយរបស់ពួកគេគឺខ្វះជំហរការពារខ្លួនឯង ដែលធ្វើឲ្យផ្លូវចិត្តរបស់ខ្លួនឆាប់រងសម្ពាធ។

១. មនុស្សចិត្តល្អពេក

អ្នកដែលចូលចិត្តបង្ហាញទឹកចិត្តល្អ ទន់ភ្លន់ រួមទាំងការឱនលំទោនចំពោះអ្នកដទៃ ច្រើនត្រូវបានមនុស្សជុំវិញខ្លួនមើលឃើញថាជាមនុស្សល្អ និងអាចពឹងពាក់បាន ដូច្នេះហើយមានមនុស្សមិនតិចទេ ដែលតែងចូលចិត្តសុំជំនួយពីបុគ្គលប្រភេទនេះ។ ពេលខ្លះដោយសារខ្លួនជាមនុស្សចិត្តល្អ ហើយពិបាកបដិសេធ ខ្លាចអ្នកដទៃខូចចិត្ត វាក៏បែរជាធ្វើឲ្យខ្លួនឯងធ្លាក់ក្នុងស្ថានភាពលំបាកចិត្តទៅវិញ។

២. មនុស្សត្រចៀកស

មនុស្សប្រភេទនេះ នឹងក្លាយជាមនុស្សដែលគេងាយបង្វិលបាន មិនថាអ្នកណានិយាយអ្វី គឺដឹងតែងាករេតាមគេគ្រប់យ៉ាង រហូតពេលខ្លះក៏ត្រូវខុសឆ្គង នាំការលំបាកឲ្យខ្លួនឯង ក៏ដូចជាអ្នកនៅជុំវិញខ្លួនទៀត ដោយសារជឿសម្ដីអ្នកដទៃខ្លាំងពេក។

៣. អ្នកខ្វល់តែពីអារម្មណ៍អ្នកដទៃ

មានមនុស្សមិនតិចទេ ដែលមានចរិតចូលចិត្ត Care ពីអារម្មណ៍អ្នកដទៃ រហូតលួចធ្វើបាបអារម្មណ៍របស់ខ្លួនឯងដោយមិនដឹងខ្លួន។ គុណវិបត្តិសម្រាប់មនុស្សក្រុមនេះ គឺតែងមើលឃើញតម្លៃនៃអារម្មណ៍អ្នកនៅជុំវិញខ្លួន ច្រើនជាងខ្លួនឯង។ មនុស្សបែបនេះអាចនឹងឆាប់ពិបាកចិត្ត នៅពេលមានអ្នកត្រូវការអ្វីដែលខ្លួនមិនអាចផ្ដល់ឲ្យគេបាន ហើយចុងក្រោយក៏មានអារម្មណ៍ថាខ្លួនឯងខុស ទាំងមិនបានធ្វើអ្វីខុសសោះ។

៤. អ្នកពូកែក្រែងចិត្តអ្នកដទៃ

ការជាមនុស្សប៉ិនក្រែងចិត្តអ្នកដទៃខ្លាំងពេក ច្រើនតែត្រលប់មកធ្វើបាបខ្លួនឯងវិញជាញឹកញាប់ ព្រោះការដែលមិនចេះនិយាយបដិសេធខ្លះ និងការដែលរវល់តែខ្លាចអ្នកដទៃអារម្មណ៍មិនល្អ នេះហើយគឺជាការកសាងការពិបាកក្នុងចិត្តរបស់ខ្លួន។ ជាពិសេសមនុស្សដែលចូលចិត្តធ្វើតាមចិត្តអ្នកដទៃ បើទោះបីជាអ្វីដែលខ្លួនមិនយល់ស្រប ហើយមិនហ៊ាននិយាយពីអារម្មណ៍របស់ខ្លួនឲ្យគេដឹងទៀត។

៥. មនុស្សចិត្តទន់

ជាមនុស្សដែលតែងត្រូវគេធ្វើបាបផ្លូវចិត្តជាញឹកញាប់ ព្រោះតែភាពចិត្តទន់ និងចរិតឆាប់ខឹង ឆាប់បាត់ រហូតពេលខ្លះអាចធ្វើឲ្យអ្នកដទៃមើលឃើញចំណុចខ្សោយ និងបែរយកចំណុចខ្សោយនោះមកប្រើជាឧបករណ៍ដើម្បីស្វែងរកផលប្រយោជន៍។

អ្វីក៏ដោយដែលលើសពេកគឺមិនដែលល្អទេ។ អ្នកត្រូវធ្វើជាមនុស្សល្អ ក៏ប៉ុន្តែក៏ត្រូវចេះបត់បែន ចេះទទួលស្គាល់ការពិត ថាជីវិតយើងតែមួយមិនអាចផ្គាប់ចិត្តមនុស្សគ្រប់គ្នាបាននោះទេ ៕