មូលហេតុដែលអាយុ ២៨-៣២ឆ្នាំ គឺវ័យល្អបំផុតសម្រាប់ការរៀបការ

2019-12-27 09:00:00
ចំនួនមតិ 0 | ចំនួនចែករំលែក 0

ប្រិយមិត្តកញ្ញាប្រហែលជាធ្លាប់ឮច្រើនហើយថា អំឡុងវ័យ ៣០ឆ្នាំ គឺជាពេលវេលាដ៏សក្ដិសមសម្រាប់ការកសាងជីវិតគូ។ មិនតែប៉ុណ្ណោះលទ្ធផលនៃការសិក្សាជាច្រើនបានគាំទ្រចំពោះការលើកឡើងនេះ។ ដូច្នេះថ្ងៃនេះ យើងមកមើលទាំងអស់គ្នាថាតើហេតុអ្វីបានជាអំឡុងពេលនេះគឺជាពេលវេលាដ៏សក្ដិសមសម្រាប់ការរៀបការ?

ការសិក្សារបស់លោក Nick Wolfinger សាស្ត្រាចារ្យផ្នែកសង្គមវិទ្យានៃសាកលវិទ្យាល័យ Utah សហរដ្ឋអាមេរិក បានរកឃើញថា អាយុដែលសក្ដិសមសម្រាប់ការចាប់ផ្ដើមជីវិតគូ គឺចន្លោះ ២៨ឆ្នាំ- ៣២ឆ្នាំ។ តាមរយៈការសិក្សាលើការស្ទង់មតិពីគ្រួសារនៅសហរដ្ឋអាមេរិក លោកបានរកឃើញថាប្ដីប្រពន្ធដែលរៀបការក្នុងវ័យនេះ មានអត្រាលែងលះទាបបំផុតប្រៀបធៀបនឹងអ្នកដែលរៀបការនៅវ័យផ្សេងៗ។ ចំណែកវ័យដែលមានអត្រាលែងលះខ្ពស់បំផុតគឺ ១៥ - ១៩ បន្ទាប់មកគឺវ័យ ២០ - ២៤, ២៥ - ២៩ និង ៣៥ - ៣៩។

៣មូលហេតុដែលគួររៀបការនៅអាយុ ២៨ - ៣២ឆ្នាំ

យល់អារម្មណ៍ខ្លួនឯង

ក្នុងវ័យនេះមនុស្សមានភាពចាស់ទុំគ្រប់គ្រាន់ក្នុងការយល់ពីអារម្មណ៍ខ្លួនឯងថាអាចនៅចុះសម្រុងជាមួយអ្នកម្ខាងទៀតបានឬអត់ ឬវាគ្រាន់តែជាអារម្មណ៍ឈ្លក់វង្វេងតែមួយឆាវ។

មានទំនួលខុសត្រូវកាន់តែខ្ពស់

គាត់ ឬនាងបានជ្រើសរើសផ្លូវជីវិតដែលខ្លួនឯងត្រូវការហើយ ហើយចាប់ផ្ដើមមានទំនួលខុសត្រូវលើរឿងផ្សេងៗ និងមានស្ថិរភាពផ្នែកហរិញ្ញវត្ថុមួយកម្រិតហើយក្នុងវ័យនេះ។

អាចសម្របខ្លួនចូលគ្នាបាន

ពួកគេមិនទាន់មានអាយុចាស់ជ្រុលក្នុងការផ្លាស់ប្ដូរចរិត ទម្លាប់រស់នៅខ្លះៗក្នុងជីវិតប្រចាំថ្ងៃ ដើម្បីអាចចុះសម្រុងជាមួយដៃគូរបស់ខ្លួននោះឡើយ ដែលនេះគឺជាកត្តាដ៏សំខាន់ក្នុងការប្រើជីវិតគូ ៕

ចុចអានបន្ត៖

ប្រភព៖ Sanook ប្រែសម្រួល៖ ស្វាយ វ៉ាន់ថន