ទម្លាប់កែមិនឡើងទាំង ៨ ដែលធ្វើឲ្យគូស្នេហ៍បែកគ្នាញឹកបំផុត

2018-10-31 06:05:00
ចំនួនមតិ 0 | ចំនួនចែករំលែក 0

គេយល់ព្រមស្រលាញ់អ្នកហើយ មិនមែនមានន័យថាអ្នកអាចធ្វើខ្លួនយ៉ាងម៉េចក៏បាននោះទេ។ ទម្លាប់ខ្លះពិតជាធ្វើឲ្យគូស្នេហ៍អ្នកមិនអាចទ្រាំតទៀតបាន ហើយចុងក្រោយក៏លែងមានសូម្បីចិត្តស្រលាញ់។

រូបតំណាង

**១. តាមតែចិត្តខ្លួនឯង**

វាជារឿងធម្មតាទៅហើយដែលគ្រប់គ្នាចង់ធ្វើអ្វីៗតាមចិត្តខ្លួនឯង គ្រាន់តែអ្នកខ្លះតាមតិច អ្នកខ្លះតាមច្រើនប៉ុណ្ណោះឯង។ អ្នកខ្លះគិតថាខ្លួនធ្វើតាមចិត្តខ្លួនឯងតិចតួចប៉ុណ្ណោះ ប៉ុន្តែមិនបានដឹងទេថាការពិតខ្លួនបានបង្ខំឲ្យដៃគូធ្វើអ្វីៗតាមចិត្តខ្លួនឡើងក្លាយជាទម្លាប់ទៅហើយ។

២. តាមស្អិតខ្លាំងពេក

ការដែលអ្នកបង្ហាញឲ្យមនុស្សគ្រប់គ្នាដឹងថា អ្នកនិងគេគឺជាគូស្នេហ៍ វាក៏មិនមែនជារឿងប្លែកដែរ ប៉ុន្តែពេលខ្លះវិធីដែលអ្នកបង្ហាញភាពជាម្ចាស់កម្មសិទ្ធិនោះ មានលក្ខណៈដូចជាស្រមោលអន្ទោលតាមប្រាណ ដូចជាទៅណាមកណាត្រូវតែទៅជាមួយគ្នាដូចនំឆាខ្វៃ ដោយមិនឲ្យគេមានពេលវេលាផ្ទាល់ខ្លួនសូម្បីបន្តិច។ នេះក៏អាចជាបញ្ហាបានដូចគ្នា។

៣. ប្រចណ្ឌគ្មានដែនកំណត់

មនុស្សស្រលាញ់គ្នា ប្រាកដជាមិនអាចហាមឃាត់ឡើយរឿងប្រចណ្ឌ ប៉ុន្តែវាក៏ត្រូវមានដែនកំណត់ដែរ មិនមែនគ្រាន់តែគេនិយាយជាមួយមិត្តភ័ក្ដិក៏យើងធ្វើមុខក្រញ៉ូវ មួម៉ៅដាក់គេ ឬអ្នកខ្លះតាមឆែកទូរសព្ទ និងតាមខលសួររហូត បែបនេះក៏ធ្វើឲ្យដៃគូពិបាកទ្រាំដែរ។

៤. ឈ្លោះគ្នាម្ដងណាក៏និយាយពាក្យបែក

ភាគច្រើនពាក្យបែកគ្នាគឺចេញពីមាត់មនុស្សស្រីច្រើនជាង។ ការពិត នាងនិយាយដូច្នេះគឺគ្រាន់ដើម្បីឲ្យគេលួងប៉ុណ្ណោះ។ ប៉ុន្តែវិធីនេះប្រើបានផលតែដំបូងៗទេ តែញឹកញាប់ពេកទៅនឹងអាចឮពាក្យថា “ចង់បែកក៏បែកទៅ” មិនខាន។

៥. មានអ្នកក្រៅ

ចំណុចនេះបង្ហាញថាអ្នកមិនបានផ្ដល់កិត្តិយសឲ្យមនុស្សជាទីស្រលាញ់ឡើយ។ ពេលខ្លះយើងគ្រាន់តែចង់ធ្វើឲ្យអ្នកម្ខាងទៀតប្រចណ្ឌលេងៗ ឬចង់បញ្ជាក់ថាខ្លួនឯងនៅតែមានតម្លៃសម្រាប់គេ ប៉ុន្តែប្រយ័ត្នទៅ ព្រោះបើសំឡឹងមើលក្នុងផ្លូវមួយទៀតគឺអ្នកមិនបានគិតពីអារម្មណ៍របស់ដៃគូខ្លួនឯងឡើយ។

រូបតំណាង

៦. ខឹងគ្នាមិននិយាយរកគ្នា

នេះអាចជាមូលហេតុដែលធ្វើឲ្យគូស្នេហ៍ត្រូវបែកគ្នាច្រើនបំផុតក៏ថាបាន។ អាការស្ងៀមស្ងាត់បែបនេះនឹងធ្វើឲ្យអ្នកម្ខាងទៀត មានអារម្មណ៍ថាខ្លួនឯងគ្មានតម្លៃ ឬពេលខ្លះរឿងដែលខឹងគ្នានោះគឺគ្រាន់តែជារឿងយល់ច្រឡំ ប៉ុន្តែបែរជាមិនបាននិយាយដោះស្រាយគ្នាឲ្យបានត្រឹមត្រូវ មិនហ៊ាននិយាយសុំទោសខ្លាចអន់ ក៏ធ្វើឲ្យជីវិតគូពិបាកចុះសម្រុង។

៧. និយាយអាក្រក់ដាក់ដៃគូនៅមុខអ្នកដទៃ

ពេលខ្លះអាចគ្រាន់តែបង្អាប់គ្នាលេងសើច ប៉ុន្តែអ្នកខ្លះលេងសើចដោយប្រើសម្ដីអាក្រក់ខ្លាំងពេក ដែលនាំឲ្យមានបញ្ហាឈ្លោះគ្នាបាន ហើយរឿងតូចៗទាំងនេះ ក៏ចេះតែនាំឲ្យមានរឿងធំទៅៗ។

៨. កុហក

មនុស្សមួយចំនួននិយាយកុហកឡើងក្លាយជាទម្លាប់ ពេលខ្លះរឿងមិនត្រូវកុហកក៏កុហក។ ការទម្លាប់និយាយកុហកជាមួយដៃគូរបស់ខ្លួនគឺជាការបង្ហាញឲ្យឃើញច្បាស់ថាយើងគ្មានភាពស្មោះត្រង់ ឬមិនទុកចិត្តដៃគូឡើយ ដូច្នេះហើយជីវិតគូក៏ពិបាកបន្តជាមួយគ្នាដែរ ៕

ចុចអានបន្ត៖

ប្រភព៖ rugyim ប្រែសម្រួល៖ ស្វាយ វ៉ាន់ថន