មិនស្មានអ្នកតបស្នងក្តីស្រលាញ់ស្មោះរបស់ខ្ញុំ នូវទង្វើឆ្អែតចិត្តដល់ម្លឹង
- 2019-10-04 05:20:00
- ចំនួនមតិ 0 | ចំនួនចែករំលែក 0
មិនស្មានអ្នកតបស្នងក្តីស្រលាញ់ស្មោះរបស់ខ្ញុំ នូវទង្វើឆ្អែតចិត្តដល់ម្លឹង
មនុស្សប្រុសមានច្រើនណាស់ មិនគួរណាខ្ញុំតស៊ូស្រលាញ់គេដល់ថ្នាក់នេះទេ។ រំលឹកឡើងវិញនូវប្រវត្តិដ៏ឈឺចាប់គឺ ស្ទើរតែមិនគួរឲ្យជឿថា ខ្ញុំល្ងង់ដល់ថ្នាក់ហ្នឹង ដើម្បីមនុស្សប្រុសម្នាក់ដែលគ្មានទំនួលខុសត្រូវ។
គេជាមនុស្សម្នាក់ដែលឆ្លាតហើយរៀនពូកែ មកពីគ្រួសារដែលធូរធារមួយដែរ ។ ប្រវត្តិរៀនសូត្រក៏ល្អ មិត្តភ័ក្ដិក៏ជាជំពូកមនុស្សដែលចូលចិត្តរៀនទៀតផង ប៉ុន្តែអ្នកទាំងអស់គ្នាដឹងទេ គេជាមនុស្សអាត្មានិយមបំផុតដែលខ្ញុំបានស្គាល់។ គេចិត្តដាច់ គេមិនខ្វល់ថា អ្នកណាឈឺ អ្នកណាយំដើម្បីគេនោះទេ ។ គេគ្រាន់តែនិយាយមួយម៉ាត់ថា "គិតខ្លួនឯងទៅ" ហើយគេក៏ចាកចេញ។
ចាកចេញដោយប្រាប់ខ្ញុំថា "ឈប់រញ៉េរញ៉ៃនឹងគេ ហាមមិនឲ្យChatរកគេ ហាមCallរកគេ ហើយហាមខ្ញុំមិនឲ្យនិយាយជាមួយគេនៅនឹងមុខអ្នកដទៃ"។ និយាយទៅ គឺធ្វើដូចអ្នកដទៃសុទ្ធសាធ។ ទទួលស្គាល់ថា គេពិតជាពូកែ គឺពូកែធ្វើខ្លួនជាមនុស្សពីរនាក់ដាច់ពីគ្នា។ ពេលនៅជាមួយខ្ញុំគេធ្វើគ្រប់សព្វដើម្បីយកចិត្តខ្ញុំ ។ ពេលនៅក្រៅ គេនិងខ្ញុំគឺមនុស្សមិនស្គាល់គ្នា ហើយក៏ជាគេដូចគ្នា ជាអ្នកកំណត់រឿងលាក់ទំនាក់ទំនងមួយនោះ ។ ក៏ព្រោះតែស្រលាញ់គេ ខ្ញុំព្រមតាមសំណូមពរគេ។
ទោះដឹងថាវានឹងក្លាយជារឿងដែលធ្វើឲ្យខ្ញុំខូចចិត្តក៏ដោយ ក៏ខ្ញុំនៅតែព្រមតាមគេដដែរ។ គេលេងសើចជាមួយស្រីផ្សេងទាំងនៅមុខខ្ញុំ គេព្រមឲ្យអ្នកផ្សេងបង្អាប់គេជាមួយស្រីផ្សេងនៅនឹងមុខខ្ញុំ គេជិះម៉ូតូឌុបម្នាក់នោះជាច្រើនលើក គេតែងតែព្រមរាល់ការសុំជំនួយពីម្នាក់ស្រីនោះ ។ ប៉ុន្តែសំរាប់ខ្ញុំ គេឆ្លើយថា "ធ្វើខ្លួនឯងទៅ" ។
ខ្ញុំមិនយល់ទេ ថាហេតុអីគេធ្វើបែបនោះ ទាំងដឹងថាខ្ញុំខូចចិត្តប៉ុណ្ណា ខូចចិត្តទាំងនិយាយមិនចេញ យំមិនចេញ។ ក្រោយពីបែកគ្នាមួយរយៈ គេក៏ត្រឡប់មករកខ្ញុំវិញ ខ្ញុំក៏ឲ្យឱកាសទៅគេ គិតថាគេនឹងកែ ប៉ុន្តែមិនដូចអ្វីដែលខ្ញុំគិតនោះទេ គេនៅតែអាត្មានិយមដដែរ។ រយៈពេល៣ឆ្នាំ វាក៏គ្រប់គ្រាន់ឲ្យខ្ញុំឆ្អែត។ ទីបំផុតខ្ញុំក៏ចាកចេញ ហើយបើអ្នកសួរថាខ្ញុំខូចចិត្តទេ? ខ្ញុំប្រាកដជាឆ្លើយថា ខូចចិត្ត តែវាដល់ពេលដែលគេត្រូវទទួលវេនកម្មគេម្ដងហើយ។ សង្ឃឹមថា គេនឹងអាចរកឃើញស្រីដែលគេ ស្រលាញ់ពិតប្រាកដទៅចុះ ព្រោះពេលនេះខ្ញុំមិនគិតថា មានស្រីដែលស្មោះនឹងគេនៅក្បែរគេនោះទេ៕
ចុចអាន៖ ៨ សញ្ញានេះនឹងកើតឡើង ពេលគេអស់ចិត្តស្រលាញ់អ្នក