ស្រលាញ់គ្នាមែនពិត ចាំបាច់ប្រកូកប្រកាសធ្វើអី ពីរនាក់យល់គ្នាគឺគ្រប់គ្រាន់ហើយ

2019-08-20 09:20:00
ចំនួនមតិ 0 | ចំនួនចែករំលែក 0

ខ្ញុំពិតជាស្ញប់ស្ញែងស្នេហាដែលជាមួយគ្នាបានយូរ តែមិនកក្រើកមេឃ កក្រើកដីខ្លាំងណាស់។ ព្រោះនៅក្នុងសង្គមមួយដែលមានអ្វីក៏ប្រកាសឲ្យគេដឹងឮនោះ ពិតជាកម្ររកបានខ្លាំងណាស់។ ស្ងាត់ៗដើរជាមួយគ្នា ហើយបញ្ចប់ដោយមង្គលការក៏នៅប្រសើរជាង ដើរស្រែកឆោឡោថាខ្លួនស្រលាញ់គ្នា ហើយបែកគ្នា អង្គុយលុបរូបលើបណ្ដាញសង្គមគិល។

ដៃគូជីវិត ការពិតគឺជាបុគ្គលម្នាក់ដែលតែងនៅក្បែរ និងមើលថែទាំគ្នារាល់គ្រាមានអាសន្ន និងពឹងផ្អែកលើគ្នាដើម្បីរស់។ ការដែលស្រលាញ់គ្នាក្នុងភាពស្ងាត់ស្ងៀម អាចសង្កេតឃើញថាគឺដើរបានយូរអង្វែង ជាងអ្នកដែលធ្វើឲ្យពិភពលោកទាំងមូលដឹងពីរឿងរបស់ពួកគេ។

រឿងស្នេហាមួយមិនមែនមានសុទ្ធតែពាក្យផ្អែមល្ហែមរហូតនោះឡើយ ពេលខ្លះក៏រង្គោះរង្គើ ពេលខ្លះក៏មិនមើលមុខគ្នា។ អ្វីដែលពិសេសនោះគឺ មនុស្សយើងគ្រប់រូបសុទ្ធតែមើលមិនដឹងពីថ្ងៃអនាគតទាំងអស់ ដូចនេះបើយើងស្រលាញ់គ្នាស្ងាត់ៗ ទោះបីជាមានអ្វីកើតឡើង ក៏យើងមិនសូវជាបាក់មុខ ដូចគូស្នេហ៍ដែលគ្រប់គ្នាបានដឹងដែរ។

អ្នកខ្លះខ្លាចថា ស្រលាញ់គ្នាបើមិនប្រកូកប្រកាស ខ្លាចគេយករបស់ខ្លួន។ តែនេះគឺសម្រាប់មនុស្សដែលមិនជឿជាក់នឹងស្នេហាខ្លួនប៉ុណ្ណោះ ព្រោះគេរាប់រយគូ មិនខ្ចីប្រកាសជាសាធារណៈនៅតែឈានដល់មង្គលការ នោះទើបហៅថាជោគជ័យពិតប្រាកដ។

រាល់ព្រឹកបានឃើញមនុស្សដែលយើងស្រលាញ់នៅក្បែរ គឺជាសុភមង្គលមួយទៅហើយ មិនចាំបាច់បង្ហោះរូបមួយអាល់ប៊ុមជិត១០០សន្លឹកឲ្យគេឃើញ ទើបហៅថាសុភមង្គលនោះឡើយ។ តែបើអ្នកចង់បង្ហោះ ក៏មិនជាអ្វីដែរ ព្រោះជាសិទ្ធិរបស់អ្នក។