វិធីសម្របខ្លួនជាមួយ Ex ដោយជឿជាក់ ទោះធ្លាប់ឈឺចាប់រាប់ពាន់ដងដោយសារគេក៏ដោយ

2019-06-04 09:30:00
ចំនួនមតិ 0 | ចំនួនចែករំលែក 0

នៅពេលជួប Ex ដោយចៃដន្យ ហើយគេចូលមកនិយាយរកអ្នកធម្មតាតាមរបៀបអ្នកស្គាល់គ្នា អ្នកប្រហែលជាមានអារម្មណ៍ថាពិបាកសម្របបន្តិច ព្រោះមនុស្សធ្លាប់ស្រលាញ់គ្នាហើយបែកគ្នាទៅវិញ។ ប៉ុន្តែបើគេដាក់ចិត្តថាចង់រាប់អានអ្នកជាមិត្តទៅហើយ ដូច្នេះខ្លួនអ្នកផ្ទាល់ក៏ត្រូវបើកចិត្តឲ្យទូលាយផងដែរ។ ចៀសវាងបង្ហាញអាកប្បកិរិយាឆ្គងៗ ខាងក្រោមនេះជាវិធីខ្លះៗ ជួយអ្នកឲ្យជជែកលេងជាមួយ EX បានដូចមិត្តភ័ក្កិធម្មតា ៖

១. ចាត់ទុកគាត់ ប្រៀបដូចមនុស្សថ្មីដែលអ្នកទើបស្គាល់ថ្ងៃនេះ

កុំឲ្យអតីតកាលចូលមកលាយឡំនឹងការសន្ទនារបស់អ្នក អ្នកត្រូវចាត់ទុកថាគាត់ជាមនុស្សម្នាក់ដែលអ្នកមិនធ្លាប់ស្គាល់ពីមុន ហើយទើបជួបថ្ងៃនេះ។ ដូច្នេះធ្វើឲ្យអារម្មណ៍អ្នកមិនទើសទាល់ ឬនឹកឃើញរឿងឈឺចាប់ចាស់ៗ ដែលនាំឲ្យល្អក់កករពេលជជែកគ្នា។

២. រក្សាការសម្លឹងមុខគ្នា

ត្រូវសន្ទនាដោយការសម្លឹងមុខគ្នា មិនមែនម្នាក់មើលទៅលើ ម្នាក់អោនមុខចុះនោះទេ។ បង្ហាញពីភាពរឹងមាំរបស់អ្នក ទើបធ្វើឲ្យ Ex កោតស្ងប់ស្ងែងអ្នកថាពិតជាមនុស្សរឹងមាំ មិនទន់ជ្រាយ មិនឆាប់បាក់ស្បាតពេលបែកបាក់ស្នេហា។

៣. ចិត្តស្ងប់

ទោះជាអតីតកាលកន្លងមកអ្នកធ្លាប់យំដោយសារគេច្រើនដង ធ្លាប់ត្រូវគេកុហក និងបោកប្រាស់ចិត្តក៏ដោយ តែត្រូវចាត់ទុកថា វារឿងកន្លងហួស រឿងឥតប្រយោជន៍។ ដូច្នេះ មិនត្រូវឲ្យ Ex ចាប់ចំណុចខ្សោយពីអារម្មណ៍ក្រោធរបស់អ្នកនោះទេ អ្នកគួរតែរក្សាចិត្តឲ្យត្រជាក់ និងស្ងប់ស្ងាត់បំផុត។

៤. រក្សាស្នាមញញឹម

គេធ្វើឲ្យអ្នកខូចចិត្តខ្លាំងប៉ុណ្ណឹងហើយ តែពេលជួបអ្នក អ្នកបែរជានៅតែអាចសើច និងញញឹមដាក់គេធម្មតា ។ ឃើញអ្នកធ្វើបែបនេះបាន Ex មានតែរអៀសខ្លួនដែលអ្នកនៅតែចិត្តទូលាយរក្សាស្នាមញញឹមចំពោះគាត់ យ៉ាងស្រស់ស្អាតលើផ្ទៃមុខ ទោះគ្មានវត្តមានគាត់ក្នុងបេះដូងក៏ដោយ។

៥. សួរសំណួរទាក់ទងនឹងសុខទុក្ខ

ដើម្បីឲ្យការជជែករបស់អ្នកមានភាពរលូន មិនដូចសម្ដែង យ៉ាងហោចណាស់អ្នកគួរមានសំនួរខ្លះៗសួរទៅ Ex របស់អ្នកខ្លះ។ អាចសូរគាត់ថា សុខសប្បាយជាទេ? មានគម្រោងធ្វើអីខ្លះថ្ងៃចុងសប្ដាហ៍ ឬសួរពីការងារ ការសិក្សាយ៉ាងម៉េចហើយជាដើម។ បង្កើតសំនួរធម្មតាៗ ប្រៀបដូចអ្នកទើបស្គាល់គាត់លើកទីមួយ ដែលមិនមែនចង់បង្ហាញថាអ្នកចាប់អារម្មណ៍ពីជីវិតគាត់ទេ គ្រាន់តែជាការគួរសមប៉ុណ្ណោះ។

ថ្វីត្បិតអ្នកនិងគាត់ក្លាយជា Ex ក៏ដោយ តែមិត្តភាពក៏គួរតែរក្សា ជាជាងធ្វើមុខយក្សដាក់គ្នា ដៀមដាមពេលជួបគ្នាម្ដងៗ ដែលធ្វើឲ្យគ្មានសន្តិភាពផ្លូវចិត្ត។ យើងរាប់អានគេជាមិត្ត និយាយរកគេធម្មតាមិនមែនមានន័យថាយើងអត់ឱនឲ្យរាល់អំពើគេធ្លាប់ធ្វើឲ្យយើងឈឺចាប់ទេ តែវាជាការសងសឹកយ៉ាងចិត្តត្រជាក់ និងឃោរឃៅបំផុត នៅពេលយើងអាចបំភ្លេច Ex ជាមនុស្សសំខាន់បាន ហើយចាត់ទុកគេត្រឹមអ្នករាប់អានគ្នាដែលទើបស្គាល់គ្នាថ្ងៃនេះ៕

ចុចអាន៖ ល្អបំផុតគឺនៅពេលមនុស្សស្រីស្រលាញ់ អាក្រក់បំផុតគឺនៅពេលមនុស្សស្រីអស់ចិត្ត

អត្ថបទ៖ លឹម សុនា