សុខភាពបេះដូងកំពុងប្រឈមនឹងគ្រោះថ្នាក់ បើអ្នកមានសញ្ញា ៤យ៉ាងនេះ

2019-05-23 05:00:00
ចំនួនមតិ 0 | ចំនួនចែករំលែក 0

ជំងឺដាច់សរសៃឈាមបេះដូង គឺជាជំងឺដ៏កាចសាហាវមួយ ដែលអាចកាត់ផ្តាច់ជីវិតរបស់អ្នកក្នុងពេលមួយរំពេច។ ហេតុនេះហើយ ការថែរក្សាសុខភាពបេះដូងឲ្យបានល្អ គឺសំខាន់ខ្លាំងណាស់ ដើម្បីបញ្ចៀសពីគ្រោះថ្នាក់ផ្សេងៗ ដែលនឹកស្មានពុំដល់។ ខាងក្រោមនេះ ជាសញ្ញា ៤យ៉ាង ដែលអ្នកគួរយកចិត្តទុកដាក់ប្រុងប្រយ័ត្នលើសុខភាពបេះដូង រួមទាំងគន្លឹះថែរក្សាបេះដូងដែលមិនគួរមើលរំលងនោះទេ។

១. ពិបាកដកដង្ហើម

ពេលអ្នកកំពុងហាត់ប្រាណធម្មតា ឬបញ្ចេញសកម្មភាពតិចតូចក៏ដោយ អ្នកតែងមានអារម្មណ៍ថា ពិបាកដកដង្ហើម ឆាប់ហត់ ដង្ហក់ ចង់ផុតម្តងៗ ដែលមិនធ្លាប់ជួបប្រទះទាល់តែសោះពីមុនមក។ ស្ថានភាពមិនប្រក្រតីបែបនេះ ប្រហែសយូរមិនបានឡើយ។ គួរទៅមន្ទីរពេទ្យពិនិត្យមើលឲ្យបានច្បាស់លាស់ទើបអាចទប់ស្កាត់មិនឲ្យជំងឺកាន់តែធ្ងន់ធ្ងរ។

២. មានអារម្មណ៍ថាតឹងណែន ឬឈឺដើមទ្រូង

បើនៅសុខៗស្រាប់តែ មានអារម្មណ៍ថាតឹងណែន ឬឈឺត្រង់បរិវេណដើមទ្រូង ខុសពីធម្មតា ក្នុងរយៈពេល២-៣នាទីហើយនៅតែមិនធូរស្រាល មានន័យថាបេះដូងរបស់អ្នក កំពុងតែជួបនឹងបញ្ហា។ ករណីនេះដែរ កាន់តែមិនត្រូវធ្វេសប្រហែសយូរទៀតទេ។ អ្នកចាំបាច់ទៅពិភាក្សា ពិនិត្យជាមួយគ្រូពេទ្យជំនាញជាបន្ទាន់។

៣. ចង្វាក់បេះដូងលោតញាប់ជាងមុន

ទោះបីជាអ្នកមិនមានសកម្មភាពអ្វីក៏ដោយ ប៉ុន្តែចង្វាក់បេះដូងប្រែជាលោតញាប់ដោយគ្មានហេតុផល។ មិនថាពេលអ្នកអង្គុយស្ងៀម នៅពេលគេង អ្នកអាចសង្កេតឃើញថា បេះដូងពិតជាលោតញាប់គួរឲ្យកត់សម្គាល់។

៤. បេះដូងលោតដុកដាក់ខុសធម្មតា

ការកើតស្រ្តេស និងក្តីបារម្ភផ្សេងៗ មានទំនាក់ទំនងជាមួយផ្លូវចិត្ត ដែលអាចបណ្តាលឲ្យបេះដូងមានសម្ពាធ លោតដុកដាក់ខុសធម្មតា អាចលឿនឬខ្លាំងជាងមុន ប៉ុន្តែបើអារម្មណ៍របស់អ្នកនឹងន ហើយនៅតែមានបញ្ហាបែបនេះកើតឡើងទៀត នោះទើបជាអ្វីដែលអ្នកត្រូវខ្វាយខ្វល់។

**តើអ្នកអាចការពារជំងឺបេះដូងបានដោយរបៀបណា?

ការតមអាហារ

ការតមអាហារប្រចាំថ្ងៃ គឺជារឿងសំខាន់បំផុត។ មិនត្រូវញ៉ាំអាហារដែលមានជាតិខ្លាញ់ច្រើនពេកទេ ព្រោះវានឹងធ្វើឲ្យជាតិកូលេស្តេរ៉ុលកើនឡើងនៅក្នុងសរសៃឈាម បង្កបញ្ហាដល់សុខភាពបេះដូង។ វិធីល្អ គឺត្រូវព្យាយាមញ៉ាំបន្លែផ្លែឈើ ជាពិសេសអាហារដែលមានជាតសរសៃ ព្រោះវាមាននាទី កាត់បន្ថយកូលេស្តេរ៉ុលក្នុងរាងកាយ និងការពារបេះដូងផងដែរ។