ពាក្យបងស្រីផ្ដាំ! មុនដាក់ចិត្តស្រលាញ់បុរសណាម្នាក់ សូមអូនចាំពាក្យទាំងនេះក្នុងចិត្ត

2019-04-30 07:21:10
ចំនួនមតិ 0 | ចំនួនចែករំលែក 0

ប្អូនស្រី! រៀបការប្រើពេលតែ១យប់ ១ថ្ងៃប៉ុណ្ណោះគឺនឹងអាចបញ្ចប់ហើយ តែចំណងអាពាហ៍ពិពាហ៍នឹងត្រូវនៅចងរឹតរួតប្អូនអស់មួយជីវិត។ ការរៀបការមិនមែនជាបញ្ហាអាយុទេ ក៏មិនមែនសំដៅលើភាពចាស់ទុំរបស់ខាងណាម្នាក់ដែរ តែជាការទទួលស្គាល់ភាពចាស់ទុំរបស់មនុស្សពីរនាក់ដែលអាចគិត និងធ្វើរឿងដូចគ្នាបាន។

រូបតំណាង

មិនថាអូនអាយុប៉ុន្មានទេ អ្វីដែលសំខាន់គឺអូនអាចទទួលយក និងទទួលស្គាល់ពីការផ្លាស់ប្ដូរខ្លួនឯងពីក្មេងស្រីម្នាក់ ហើយនិងការបោះជំហានទៅធ្វើជាប្រពន្ធគេ ហើយបន្តទៀតនឹងក្លាយជាម្ដាយគេនោះឯង។

ចុចអាន៖ ស្រលាញ់គ្នាដោយមិនយករឿងឈឺក្បាលដាក់ក្នុងខ្លួន គួរទន្ទិញពាក្យទាំងនេះក្នុងចិត្ត

បើពេលនេះ អូនអាយុខ្ទង់២០ឆ្នាំហើយ ក៏អាចទទួលយកការផ្លាស់ប្ដូរបានដែរហើយ អាចពិចារណាពីតួនាទីធ្វើជាប្រពន្ធ និងម្ដាយគេបាន នោះគឺដល់ពេលអាចរៀបការបានហើយ។ ប៉ុន្តែបើទោះបីអូនអាយុ៣០ឆ្នាំ តែនៅចង់សប្បាយ ដើរលេងដាច់យប់ជាមួយពួកម៉ាក នៅចង់បានសេរីភាព នៅមិនទាន់ចង់គិតគូររឿងទុកដាក់ផ្ទះសម្បែង យកល្អកុំទាន់សម្រេចចិត្តថារៀបការអី!

រូបតំណាង

ប្អូនស្រីបង! អូនត្រូវចាំថា រៀបការនៅអាយុប៉ុន្មានក៏មិនសូវសំខាន់ដែរ ដែលសំខាន់គឺការតាំងចិត្តក្នុងដំណើរជីវិតជាប្ដីប្រពន្ធនឹងគ្នានេះទៅវិញទេ។ មនុស្សប្រុសអាចយកប្រពន្ធដែលនៅរឡិករឡក់ មិនទាន់ចាស់ទុំ ហើយអាចនៅជាមួយគ្នាយូរអង្វែងបាន តែសម្រាប់មនុស្សស្រីវិញណា បើយកប្ដីនៅមិនទាន់ចេះគិត នៅចង់សប្បាយ ភ្លើតភ្លើននៅឡើយគឺពិបាករស់ចុះសម្រុងគ្នាណាស់។

ហេតុផលព្រោះថា ភាពចុងក្រោយរបស់មនុស្សស្រីគឺគ្រួសារ ទោះបីពេលរៀបការមិនទាន់ចាស់ចិត្តចាស់គំនិត តែក្រោយរៀបការរួច ពេលក្លាយជាម្ដាយគេ នាងនឹងផ្លាស់ប្ដូរការគិតរបស់នាងដោយឯកឯង។ តែសម្រាប់មនុស្សប្រុសវិញ គោលដៅរបស់គេមានរបស់ច្រើន ដូចជារឿងជីវិតឯកជន ការងារ មិត្តភ័ក្ដិ ត្រូវការសប្បាយ ហើយពេលខ្លះអាចទុកប្រពន្ធកូនចោលឱ្យតែបានដើរសប្បាយជាមួយអ្នកក្រៅ តែមនុស្សស្រីវិញពិបាកធ្វើបែបនេះណាស់។

ចុចអាន៖ អានមួយៗហើយគិត! គំនិតល្អៗគួរយល់ដឹងមុនពេលចង់រៀបការ

រូបតំណាង

អ៊ីចឹងហើយ មុនសម្រេចចិត្តជ្រើសរើសបុរសណាម្នាក់ឱ្យចូលមកក្នុងជីវិតប្អូន អូនត្រូវតោងគិត និងពិនិត្យមើលឱ្យបានម៉ត់ចត់ថា គេជាមនុស្សអាចកាន់ដៃអូនដើរទៅមុខជាមួយគ្នាបានឬអត់ គេរឹងមាំ និងអាចជាដៃគូប្រឹក្សាដ៏ល្អសម្រាប់អូនដែរអត់ ថាតើគេលះបង់ដើម្បីអូន ដូចដែលអូននឹងលះបង់ដើម្បីគេសម្រាប់គ្រួសារមួយនេះដែរអត់ ថាតើគេនៅចង់សប្បាយដូចពេលនៅលីវខ្លួនមួយដែរអត់?

នេះគឺជាសំណួរដែលត្រូវសួរខ្លួនឯងឱ្យរកចម្លើយឱ្យឃើញជាមុនសិន ព្រោះមិនមែនគ្រាន់តែរៀបការដើម្បីបានថ្នាក់ថ្នម ថើបបបោសអង្អែលគ្នាតែមួយមុខទេ តែជាពេលវេលាវែងឆ្ងាយដែលត្រូវប្រឈមទាំងរឿងកើតទុក្ខ រឿងសើចសប្បាយ រឿងបាក់ទឹកចិត្តទាំងឡាយដែលនៅខ្លួនមួយអូនមិនដែលបានជួប៕

អត្ថបទ៖ សរ សុគន្ធី